O martes 5 de novembro de 2023 o alumnado de Tecnoloxía e Enxeñería II de 2º de Bacharelato visitou o Museo didáctico das Telecomunicacións da Coruña, sito no corazón do noso propio barrio, nunha actividade organizada polo Departamento de Tecnoloxía do IES Monte das Moas.
A derradeira semana de novembro 3º ESO C, coordinados pola súa titora Mar Hermida Pico, tivo a sorte de participar no proxecto VINTE 23. Visións, soños e mentiras. Un proxecto de intervención escénica e recuperación da memoria do territorio habitado polo pequeno Pablo Ruíz Picasso na Coruña.
O luns, 27 de novembro, Sete e Antonio viñeron ao instituto para amosar un petisco do que o alumnado ía ver na Casa Museo Picasso o xoves 30 de novembro. Pertencen á compañía “Os náufragos teatro”. Este proxecto foi seleccionado como de especial interese cultural na provincia polo departamento de Cultura da Deputación da Coruña.
O noso instituto serviu de antesala para as intervencións escénicas que a compañía realizou ao longo da semana en varios puntos do territorio picassiano, no centro da cidade e coa colaboración da Casa Museo Picasso e dos Museos históricos da Coruña e nos que participaron diversas entidades sociais e educativas da provincia.
No IES Monte das Moas celebrouse o venres 24 de novembro a conmemoración do 25N Moas, Día da Violencia Contra as Mulleres con diversas actividades como unha exposición de cartaces e recomendacións de lecturas arredor do tema do feminismo ou novelas con historias que visibilizan e denuncian toda forma de violencia contra as mulleres. Tamén, entre outras iniciativas, se fixeron sesións de fotos reivindicativas en contra da violencia sobre as mulleres nas que participou o alumnado, profesorado e persoal non docente; exposición na pantalla do vestíbulo do centro das actividades e fotografías realizadas sobre esta problemática no curso 2022-2023 e das realizadas no presente curso 2023-2024; e desde a Biblioteca e o EDLG ofrecéronse materiais de traballo sobre a cuestión para traballar nas titorías do noso Instituto.
As actividades estiveron dirixidas e coordinadas polo Equipo da Biblioteca e o EDLG.
Na conmemoración participou gran parte da comunidade escolar (alumnado, profesorado, persoal non docente) que veu vestida de violeta ou rosa este venres para mostrar o seu apoio á loita contra esta lacra.
Aquí tedes un video sobre a conmemoración do 25N en Moas; tamén tedes un ficheiro adxunto con máis fotografías sobre a conmemoración.
Os días 14 e 16 de novembro de 2023 o alumnado de 1º ESO recibiu charlas de sensibilización sobre Educación Viaria a cargo da asociación Stop Accidentes no marco do Programa sobre "Mobilidade sostible e segura" promovido polo Departamento de Orientación vinculado ao Plan Proxecta do curso 2023-2024.
O EDLG e o Equipo da Biblioteca do Instituto convocaron un curso máis no mes de outubro de 2023 o Concurso de Taboleiros de Terror para 1º de ESO e 2º de ESO.
As bases do concurso foron as seguintes:
- Participantes: Poderán participar todos os grupos de 1º e 2º ESO coordinados polo/a seu/súa titor/a
- Límite de participación: Os taboleiros deberán estar decorados antes do 31 de outubro
- Poderase empregar calquera material aínda que se valorará o uso de material reciclado
- A decoración debe incluír un lema de medo en lingua galega
- A decoración será só do taboleiro da aula sen estenderse polas paredes nin teitos nin portas e deberá facerse de modo que non dane o mobiliario da aula.
- Establecerase un xurado formado por membros do EDLG, Biblioteca e alumnado de cursos superiores que decidirán os taboleiros gañadores.
1º ESO B
Gañaron os taboleiros máis orixinais, máis traballados e que trataron o tema do Samaín: maxia, medo, Santa Compaña, lendas de inspiración galega… E o que tivo mellor lema en lingua galega.
Os taboleiros gañadores no Concurso de Taboleiros de Terror foron os das aulas de 1º ESO B e 2º ESO B.
Aquí tedes un video cos taboleiros e grupos participantes.
O mércores, 15 de outubro, 50 alumnas e alumnos de 3º de ESO asistiron no Centro Ágora da Coruña ao concerto da Banda AldaoLado nunha actividade organizada conxuntamente polo Departamento de Lingua Galega e Literatura e o EDLG.
Esta actividade parte do Servizo de Normalización Lingüística do Concello da Coruña e pertence ao programa “Falamos Secundaria” de EducaCoruña que pretende promover a interacción entre a escola e a súa contorna para facer máis rendibles os recursos e os esforzos deses dous ámbitos en prol da normalización do galego.
A Banda AldaoLado está formada polas poetas Lucía Aldao e María Lado e polas músicas Violeta Mosquera na batería, Macarena Montesinos no baixo e Rubén Abad na guitarra. En 2019 Aldaolado centráronse en compoñer cancións con letra e música propia, temas que inclúen poemas da súa autoría. Así chegaron a xuntar un bo feixe de pezas que recolleron en dous discos de estudio. O primeiro deles, 'CASA!', foi publicado en 2021. E neste 2023 presentaron 'Forestal', o seu segundo traballo en formato banda, unha proposta máis expansiva para vestir as creacións das dúas poetas con novas texturas e acompañamentos sen ter que renunciar á proximidade de sempre.
Desde que, no ano 2001, a UNESCO declarou o 10 de Santos como Día Mundial da Ciencia para a Paz e o Desenvolvemento, novembro pasou a ser para todos nós o Mes da Ciencia. En consonancia con isto, desde hai 11 anos o profesorado de Galicia celebra en novembro o Mes da Ciencia en Galego. O obxectivo desta conmemoración é o de mostrar que a lingua galega é útil e tan válida como calquera outra para facer pescuda, ensino e divulgación científica.
Como vén sendo habitual, a Secretaría Xeral de Política Lingüística, a través dos Equipos de Dinamización da Lingua Galega, colabora con Igaciencia na organización dunha serie de webinarios de dinamización científica en galego, dirixidos aos centros educativos, especialmente aos de Secundaria e Bacharelato. En dous deles participou o alumnado de Ciencias de 1º de Bacharelato do IES Monte das Moas nunha colaboración conxunta do Departamento de Bioloxía e Xeoloxía co EDLG.
O alumnado de 1º Bach A do itinerario científico asistiu este venres, 17 de novembro ás 12:00 a unha videoconferencia do doutor Francisco Javier de Toro Santos, xefe do Servizo de Reumatoloxía do CHUAC e vicepresidente do Colexio de Médicos da provincia da Coruña. A actividade foi organizada conxuntamente polo Departamento de Bioloxía e Xeoloxía e o Equipo de Dinamización Lingüística.
O título da videoconferencia coordinada por Igaciencia foi Historia de vocación dun médico reumatólogo e o profesor explicou que a reuma non existe e disertou sobre a importancia da investigación en reumatoloxía.
Ao longo de toda a conferencia lanzou diferentes preguntas que o alumnado dos centros asistentes podía responder a través do chat e así participar dun xeito máis dinámico.
Relatou como é a aprendizaxe dos médicos e reflexionou sobre a importancia da existencia dos colexios médicos e da súa función na sociedade. Explicou algúns dos proxectos que desenvolven dirixidos fundamentalmente a público adolescente.
Un deses proxectos é "Risco 0" que xurdiu ao constatar o elevado número de abortos entre mozas e o abuso do emprego da pílula do día despois. "Risco cero" conta cunha app destinada a aprender sobre educación sexual para evitar embarazos non desexados, infeccions de trasnmisión sexuais e para concienciarnos da necesidade de desenvolver relacións sexuais sas.
Outro proxecto dos que organizan é "Dálle ao teu corpo vida macarena" que tamén convocou concursos dirixidos a centros escolares para traballar sobre o coñecemento da RCP en cuxa 1ª edición gañou o CPI do Cruce de Cerceda.
Aquí tedes o enlace á videoconferencia se queredes volver asistir a ela. Aprendemos moito da excelente charla do doutor Francisco Javier de Toro quen no final da videoconferencia respondeu amabelmente as preguntas que lle chegaron das escolas participantes.
O Equipo da Biblioteca e o EDLG do IES Monte das Moas convocaron no mes de novembro de 2023 o tradicional Concurso de Microrrelatos de Terror do Samaín. A participación do noso alumnado foi moi activa e nos fixeron tremar de medo cos seus breves relatos.
A alumna Irene López Sanmartín de 3º ESO B resultou gañadora do certame de Microrrelatos de Terror do Samaín con este arrepiante relato ilustrado.
Parabéns a Irene que nos deixou arrepiados co seu relato.
Aquí tedes un video coa exposición das obras participantes.
O mércores 8 de novembro de 2023 tivo lugar a participación dos nosos alumnos de 4º ESO A, David Freire Ríos, David Hernando Alvariñas e Elías Joglar Yuan no III Concurso de drons do XIV Obradoiro e Concurso Galego de Robótica “A Maxia da Robótica e dos drons” organizado por Igaciencia e o Concello da Coruña no IES Ramón Menéndez Pidal (Zalaeta) da Coruña. A actividade estivo promovida e desenvolvida polo Departamento de Tecnoloxía do iES Monte das Moas.
A participación deste alumnado, baixo a supervisión da nosa compañeira Teresa Díaz Valiña, foi totalmente exitosa e gañaron o III Concurso de drons na categoría de 4º de ESO, Bacharelato e FP.