No grupo de 1º ESO, comezamos a traballar sobre a convivencia, relacións interpersoais e resolución de conflitos a través da mediación. Comezamos traballando sobre os prexuízos con distintas dinámicas, tomando conciencia da importancia de aceptar e non xulgar aos demais. Por unha banda tomamos conciencia de como inflúen as etiquetas sociais nas relacións interpersoais cos demais mediante a dinámica Discoetiqueta, para na seguinte sesión continuar a aprender sobre os prexuízos coa actividade Fóra etiquetas!, onde comprobamos como ás veces xulgamos de forma incorrecta e sen coñecer aos demais. 

Publicada a Resolución do 27 de xaneiro de 2024, da Dirección Xeral de FP, pola que se convocan as probas para a obtención do título de graduado en ESO para maiores de 18 anos nas convocatorias de maio e setembro, e se ditan instrucións para a súa realización. 

Prazos de presentación de solicitudes de inscrición nas probas:  

• Para a primeira convocatoria: do 5 ao 21 de febreiro de 2024, ambos incluídos
• Para a segunda convocatoria: do 8 ao 19 de abril de 2024, ambos incluídos

Tamén te podes informar no departamento de orientación. 

Convocadas as probas de acceso a ciclos formativos de grao medio e superior de formación profesional.

Prazo de presentación de solicitudes: 

• Probas de acceso a ciclos formativos de grao medio: do 26 de febreiro ao 8 de marzo de 2024.
• Probas de acceso a ciclos formativos de grao superior: do 29 de xaneiro ao 9 de febreiro de 2024.

Data de realización das probas: 

• Probas de acceso a grao medio: 23 de maio de 2024.
• Probas de acceso a grao superior: 18 de abril de 2024.

Podes consultar todas as datas relevantes para cada caso no calendario. 

Para máis información, consulta no departamento de orientación ou nesta ligazón. 

A CIUG (Comisión Interuniversitaria de Galicia), ven de publicar na súa páxina web os parámetros de ponderación das materias troncais de modalidade e materias de opción que se terán en conta para o acceso ao sistema universitario de Galicia no curso 2024/25. 

Consulta as ponderacións nesta ligazón. 

Dende o centro organizamos o Nadal solidario, unha iniciativa consistente na doazón de alimentos non perecedoiros e/ou xoguetes usados en bo estado para axudar ás familias que o necesitan do Concello. Hoxe, o persoal de Servizos Sociais achegouse ao centro para recoller as doazóns, coas que facer un Nadal máis agradable a algunhas persoas. 

Grazas a aquelas persoas que aportaron un grao de area! De seguro a súa humanidade xerará sorrisos!

Atención, atención! A mediación está de volta! Un curso máis seguimos a traballar na mediación. Nesta ocasión retomamos o traballo do profesorado do equipo de mediación, e a que non sabedes....xa fixemos algunha cousiña moi produtiva! Acondicionouse un espacio como aula de mediación e xa se realizou algunha intervención con alumnado en conflito, a fin de contribuir ás boas relacións e clima nas aulas. Polo momento vaise recollendo algún froito!

Asemade, estamos a facer máis sinxelo o proceso e adaptando os documentos do protocolo para que o proceso sexa máis rápido e operativo. Tamén comezamos a intervir en 1º da ESO nas titorías, para traballar en convivencia e resolución de conflitos e que coñezan a mediación.

Seguiremos a traballar nos próximos trimestres, co obxectivo de que tamén o alumnado participe activamente como mediador e contribuir á expansión da cultura da mediación. 

Podedes coñecer máis sobre este proxecto nesta ligazón do apartado de Convivencia da web do centro. 

Pola importancia que ten a educación afectivo-sexual e a súa relevancia principalmente na etapa adolescente, este curso decidimos participar no programa Quérote +, que se desenvolverá con alumnado de 3º da ESO e FP Básica.

Deixamos por aquí un documento gráfico das primeiras sesións, nas que o alumnado tivo a oportunidade de coñecer os Centros Quérote (non deixedes de visitar a súa web:  https://xuventude.xunta.es/querote-mais) e fixemos un primeiro achegamento ao por que do programa e ao que implica a EDUCACIÓN SEXUAL e......SORPRESA! Non se refire só ao plano físico da persoa ou as relacións coitais, senón que implica moito máis, abarcando tamén o plano emocional e relacional.

Podedes descubrir o que estivemos a traballar a un clic!

Da man do alumnado e profesorado do ciclo medio de Atención a persoas en situación de dependencia conmemoramos o Día da diversidade funcional, que se celebra o 3 de decembro, baixo o lema "Baixo o mesmo paraugas. Vila de Cruces pola diversidade". 

O alumnado do centro tivo a oportunidade de disfrutar dun obradoiro práctico pensado para coñecer os distintos tipos de diversidade e poñerse na pel das persoas con algún tipo de capacidade diversa, para o que pasaron por varios postos desenvolvendo actividades nas que se achegaron aos distintos sistemas de comunicación e coñeceron material de apoio e adaptado. 

Foi unha xornada de concienciación coa finalidade de promover a empatía, respecto e normalización, favorecida pola aprendizaxe entre iguais, agradecendo a implicación do ciclo de APSD, con mención especial ás alumnas do 2º curso, que tiveron un papel clave na realización da actividade, transmitindo valores aos compañeiros/as das distintas etapas do centro. Premendo nesta ligazón podedes ver o post no blog da biblioteca e o vídeo sobre a actividade. 

Nesta semana seguimos a falar de masculinidades diversas con alumnado da ESO. Leváronse a cabo as últimas sesións do obradoiro, cun marcado carácter reflexivo sobre o traballado nas distintas sesións anteriores.

Sen dúbida, quedamos con grandes aprendizaxes, como a importancia do respecto e o bo trato entre os xéneros, sempre en igualdade e tolerando a diversidade!

No día de hoxe, 25 de novembro, conmemórase o Día Internacional da Eliminación da Violencia contra a Muller. No noso centro sabedores da importancia de educar na igualdade, levamos toda a semana realizando tarefas en materia de educación e prevención na materia. Así, deron comezo os obradoiros sobre masculinidades diversas co alumnado da ESO, que da man de Marc e traballando en grupo, reflexionaron sobre os estereotipos de xénero e as distintas formas da expresión de xénero, concluíndo na importancia do respecto á diversidade. 

E proseguindo coa importancia do respecto entre persoas, no día de onte o alumnado de 2º e 3º da ESO participou nun scape room de prevención da violencia de xénero, descubrindo as palabras clave mediante o traballo colaborativo, para avanzar nas probas e quedar no mellor posto posible. A sesión foi moi produtiva, facendo consciente ao alumnado da importancia das relacións afectivas igualitarias, independentemente do xénero das persoas que conforman a parella. 

A xornada de onte rematou coa entrega de pulseiras a todo o alumnado do centro, remitidas dende a Fundación Anar no marco da súa campaña "La violencia de género no tiene edad", nas que se indica o teléfono contra a violencia de xénero para menores de idade (900 20 20 10). 

Sen dúbida foi unha semana intensa! Para a próxima continuaremos traballando na materia!