EN GRUPO REDUCIDO

A última reunión do club de manga foi un pouco diferente pois coincidiu con varias excursións planeadas no centro polo que nin o alumnado de 1º nin parte do de 4º puido estar presente. Así que eramos menos pero iso non restou interese ao encontro.

Nesta ocasión o manga que lemos foi Haikyu. Con esta palabra desígnase ao voleibol en xaponés, polo que está claro de que trata o volume.

Resultou curioso que a temática, en lugar de tratarse de superheroes ou situacións fantásticas como vén sendo habitual, fose deportiva polo que o contido se fixo máis próximo e cotián. Este feito ten aspectos positivos e negativos. Como negativo algún membro do club sinalou a falta de acción. Como positivo está que as situacións e os sentimentos mostrados no manga son válidos na nosa realidade: o afán de superación, a rivalidade, o traballo en equipo, entre outros, son parte do noso día a día.