UN COMEZO PROMETEDOR

Hoxe foi un día especial pois tivo lugar a primeira reunión do club de lectura de manga no CPI O Cruce. Xa van ben anos que botou a andar o club pero ata o de agora non tivera cabida este novo formato do manga que resulta tan atractivo a moita rapazada.

Como vén sendo habitual ás nosas reunións asisten fundamentalmente mozas pero temos algún rapaz que se sumou á actividade, ademais de contar cun representante masculino do profesorado.

Nesta primeira sesión Sabela Carrondo, alumna de 3º ESO e responsable do club, comentounos algúns aspectos curiosos tanto de Sailor Moon como do mundo dos manga en xeral: explicou por que as onomatopeas aparecen tanto en xaponés como traducidas, a presenza de anglicismos, as notables diferenzas entre o manga e o anime da mesma serie, etc. Pero tamén tratamos elementos propios da historia que lemos: cal foi o noso momento preferido, como son os personaxes principais, que buscan os antagonistas...

Ademais acordamos dedicar parte do tempo do club a aprender a debuxar este tipo de historias, pois contamos coas habilidades de Sabela para guiarnos.

Por último comentouse que outros aspectos de detalle sobre as lecturas serían publicadas no blog do club: http://paralelasnocruce.blogspot.com/.