CPI Plurilingüe Cernadas de Castro

Documentación de matrícula para os cursos de Educación Primaria.

Documentación de matrícula para os cursos de Educación Infantil.

Documentación de matrícula para os cursos de ESO

Rematamos o curso cun acto que tivo lugar no noso centro o xoves 20 de xuño e que contou coa presenza do alumnado de 3º e 4º ESO que estiveron acompañados por algúns familiares, membros da corporación local ademais da presenza de Ana Estévez, responsable do festival MICE-Escola do Museo do Pobo Galego. 
O noso alumnado presentou os seus traballos que realizaron baixo a proposta e supervisión do departamento de Xeografía e Historia coa axuda da dirección do centro. 
Os alumnos e alumnas de 3º ESO explicaron o proceso de elaboración da reportaxe que fixeron sobre as minas de San Finx mentres que o alumnado de 4º fixo o propio sobre a peza audiovisual que exploraba a súa relación coas minas a través  memoria dos seus avós e avoas. 
O acto pechouse cunha rolda de intervencións nas que se comentaron posibles ideas de traballo para o próximo curso. 
Grazas ao Museo do Pobo e ao Concello de Lousame pola súa implicación neste proxecto que pretendía implicar ao alumnado no estudo do patrimonio local.

Premendo na imaxe pódese ver o vídeo elaborado polo alumnado de 4º ESO

O pasado venres 14 de xuño o grupo de 3º ESO participou  no Multiusos do Sar na cerimonia de entrega de premios do concurso Xornalismo na Escola de La Voz de Galicia. 
O traballo "San Finx, unha mina con moita historia" foi elexido como gañador de dito concurso na categoría pronvincial e nel o alumnado explorou a historia da mina así como a problemática ambiental presente. O xurado valorou o traballo e a investigación sobre a historia local realizada polo alumnado desde unha perspectiva interxeneracional. 

 Parabéns ao alumnado!

O venres 31 de maio de 2024 tivo lugar a entrega de premios ao alumnado participante na 29ª edición do Certame Literario Alberto Romasanta. Este certame organízase anualmente entre os Equipos de Dinamización Lingüística dos institutos públicos de Noia: o IES Virxe do Mar e o IES Campo de San Alberto; ademais o CPI Plurilingüe Cernadas de Castro é centro convidado a participar no mesmo, ao igual co IES Poeta Añón de Outes.

Co certame búscase estimular a creatividade literaria en poesía e prosa e a expresión escrita en lingua galega entre a xente nova.
Nesta edición a participación acadou case un cento de textos, que foron preseleccionados polo profesorado coordinador. De todos eles acadaron a categoría de finalistas cincuenta textos de importante calidade, entre eles, oito pertencentes a alumnado do noso centro.

        Na modalidade B de poesía recibiron premio dúas alumnas de 2º ESO do noso centro, Noelia Fernández Rey, cun 2º premio e a súa compañeira, María García Grela, cun 3º premio.

        Parabéns a todos eles por ser finalistas e a estas dúas alumnas, especialmente, por estar entres os tres primeiros na categoría de poesía.

Está aberto o prazo para a solicitude de axudas para libros de texto e material escolar para o curso 2024-2025.

Data límite para entrega de solicitudes: 21 de xuño de 2024.

O procedemento está rexido pola Orde do 7 de maio (DOG 20 de maio de 2024)

Formas de presentación de solicitudes:

• Sede electrónica: necesitará ter conta Chave365 ou cetificado dixital ou DNI electrónico e máis a aplicación Autofirma.
• Presencial con asistencia da aplicación: cubrindo os datos na aplicación, imprimindo os Anexos I e II e presenteos no centro.
• Presentación no centro educativo.

As persoas interesadas deberán achegar coa solicitude (Anexo I) a seguinte documentación:

• Anexo II (comprobación de datos dos membros computables da unidade familiar. En caso de separación ou divorcio, ademais, deberán achegar a sentencia xudicial e ou convenio regulador onde conste a atribución da custodia do/a menor.
• Copia do libro de familia ou documentación equivalente , onde figuren a/o alumno/a e os demais membros computables da unidade familiar.

Horario de atención: 9:00h a 14:00h.