A Consellería de Educación, Universidade e Formación Profesional, mediante a Orde de 3 de maio de 2019 (DOG 94,  de 20/5/2019), convoca axudas para adquirir libros de texto e material escolar e regula a participación no fondo solidario de libros do alumnado de centros sostidos con fondos públicos, matriculado en  EP, ESO e EE para o curso 2019/20.

·          Tipos de axuda e destinatarios.

-          Fondo solidario de libros: alumnado matriculado en 3ºe  4ºde EP e todos os cursos de  ESO. O alumnado de 5º e 6º de Ed. Primaria están excluídos da participación no fondo solidario de libros dado que participarán no proxecto EDixgal (libros dixitalizados e gratuítos para todo o alumnado).

-          Axudas para libros de texto: alumnado matriculado en 1º e 2º de EP, Educación Especial e con necesidades específicas de apoio educativo (NEAE).

-          Material escolar: alumnado matriculado en EP, ESO e E. Especial.

·          Requisitos.

-          Ser pai/nai/titor legal dun alumno matriculado nun centro sostido con fondos públicos.

-          Renda per cápita igual ou inferior a 9000 €, agás no caso de discapacidade superior ao 65% e alumnado en garda/tutela da Xunta de Galicia ou de Educación Especial, que poderá ter calquera tipo de renda:

o    Os datos son os do exercicio fiscal de 2017.

o    Sumaranse os recadros 415 e 435 de cada un dos membros da familia con ingresos e dividirase o resultado da suma polo número de membros da unidade familiar a 31/12/17.

o    No caso de non prestar declaración, teranse en conta os ingresos de acordo cos datos tributarios facilitados pola Axencia Estatal  de Administración Tributaria.

·         Presentación de solicitudes.

-          Cada pai/nai/titor cubrirá unha única solicitude para todos os seus fillos, que poderá recoller no centro ou accedendo á aplicación Fondolibros  da Consellería de Educación.

-          Poden optar polas seguintes formas de presentación:

a)       No centro, en soporte papel, ata o 21 de xuño de 2019 (este incluído), agás o alumnado procedente de centros privados ou os repetidores de 4º de ESO, que terán un mes de prazo desde a matrícula.Virán debidamente asinadas e coa documentación requirida; se se cubriu na propia aplicación Fondolibros, imprimirase  e entregarase cuberta co número que lle foi asignado para que o centro a poida recuperar.

b)       Na Sede Electrónica da Xunta de Galicia, que enviará un aviso ao correo electrónico do centro.

·         Documentación que se debe achegar.

-          Anexo I, que acompaña á solicitude, para a comprobación de datos de membros computables. Este está disponible nas dependencias de Administración do centro, na páxina web http://www.edu.xunta.gal/centros/cpicernadascastro e na propia aplicación de fondo libros, https://www.edu.xunta.es/fondolibros/

-          Copia do libro de familia ou documento que acredite número de membros computables a 31 de decembro de 2017 (sentenza de divorcio ou separación, certificado de convivencia, …).

-           Certificado acreditativo do grao de discapacidade dalgún dos membros da unidade familiar e/ou acreditación de violencia de xénero, de ser caso.

-          Acreditación de violencia de xénero, se fose preciso.

-          De non autorizar a consulta telemática,  á documentación anterior debe engadirse o DNI dos membros computables da unidade familiar e a declaración da renda do exercicio 2017 e o resto da documentación xustificativa.

·         Contía das axudas.

-          Libros de texto (só alumnado de 1º, 2º EP e NEAE):

o    170 € para as rendas per cápita inferiores a 5400 €

o    90 € para as rendas entre 5400 € e 9000 €

·         O alumnado de Educación Especial ou con discapacidade igual ou superior ao 65% recibirá unha axuda de 250 € e axuda para adquirir  material escolar, con independencia da renda per cápita familiar.

·         Fondo solidario de libros.

-          Participan nel todos os alumnos dos cursos 3º e 4º de EP e todos os cursos da ESO que presenten a solicitude pertinente.

-          A este alumnado asignaráselle os libros por orde inversa á renda per capita da unidade familiar ata esgotar as existencias do centro, se ben teñen preferencia os alumnos en garda e tutela da Xunta de Galicia ou aqueles cunha discapacidade igual ou superior ao 65%.

-          Cando os libros non cheguen, o centro adquirirá os libros complementarios necesarios para entregar: 6 libros ás rendas inferiores a 5400 € e 4 libros ás situadas no tramo entre 5400€ e 9000 €.

·         Obrigas dos beneficiarios:

-          En caso de recibir vales para material ou libros de texto, deben adquirir os libros de texto indicados polo centro e o material escolar necesario.

-          Os participantes no Fondo deben devolver en bo estado os libros de texto recibidos ou mercados co Fondo do curso 2018/19 e comprometerse a conservar os que reciben para o curso 2019/2020. A non devolución será causa de exclusión da participación no fondo.

Deben ter en conta que a data límite de entrega é o 21 de xuño e que esta vén marcada pola propia Consellería,  de ser entregada con posterioridade a aplicación está pechada e dende o centro non poderiamos  facer nada ao respecto. Tampouco podemos tramitar solicitudes que estén incompletas por falta de documentación.