![](/centros/ceiplopezestrada/system/files/u41/0.jpg)
O día 30 de outubro celebramos no CEIP Francisco López Estrada o Magosto. Ao longo da semana o alumnado foi traendo unhas cabazas moi orixinais e terroríficas que xuntamos nunha exposición.
![](/centros/ceiplopezestrada/system/files/u41/1.jpg)
Ademais este ano as nenas e nenos viñeron disfrazados para a ocasión: sangue, feridas, cicatrices, caras pálidas... Destacou a gran variedade e orixinalidade dos disfraces. Algunhas mestras tamén trouxeron as súas mellores galas.
![](/centros/ceiplopezestrada/system/files/u41/2.JPG)
A primeira actividade da mañá foi protagonizada pola Bruxa Esdrúxula. Encargouse de recoller os medos que cada alumno previamente escribira nun papel e procedeu a queimalos. Medo ás matemáticas? Queimado! Medo ás verduras do comedor? Queimado! Medo a esquecerse dos deberes? Queimado!
![](/centros/ceiplopezestrada/system/files/u41/3.jpg)
A bruxa Esdrúxula encargouse de queimar os medos, iso si, nada de maxia, un simple chisqueiro acorde aos nosos tempos.
![](/centros/ceiplopezestrada/system/files/u41/4.JPG)
Despois de queimar os medos relaxámonos un pouco co grupo Odaiko, que nos amenizou a xornada cunha serie de contos... aínda que moi relaxados non quedamos xa que eran auténticos contos de medo!
![](/centros/ceiplopezestrada/system/files/u41/5.JPG)
E pola tarde, mantendo a tradición, pasamos un bo intre cuns xogos populares variados e para todos os gustos. Os máis pequenos portáronse moi ben e pasárono estupendamente.
![](/centros/ceiplopezestrada/system/files/u41/6.JPG)
Os máis maiores tomárono moi en serio e participaron dunha competición sa e deportiva.
![](/centros/ceiplopezestrada/system/files/u41/7.JPG)
Os zancos sempre son un reto. Fixérono moi ben, demostraron unha gran habilidade e alegrámonos moito de que ningún nocello resultase prexudicado.
![](/centros/ceiplopezestrada/system/files/u41/8.JPG)
Tamén houbo momentos para descansar. Non todo vai ser emoción e aventuras, o corpo ademais necesita recuperarse, especialmente o dos máis pequenos.
![](/centros/ceiplopezestrada/system/files/u41/9.JPG)
As familias trouxeron unhas sobremesas deliciosas con produtos de tempada. Cada ano supéranse. Nin en MasterChef teñen tanto nivel!
![](/centros/ceiplopezestrada/system/files/u41/10.JPG)
As nenas e os nenos elixiron as súas sobremesas favoritas e probaron uns alimentos tradicionais que non só eran saudables senón tamén deliciosos.
A continuación tedes todas as imaxes da celebración na siguinte ligazón: magosto