O CENTRO
-ANPA
Resumo | |
---|---|
Lectura e Familias (Marzo-Abril) |
Queridas familias! Temos unha boa nova que darvos. Estes meses de marzo e de abril levaremos a cabo unha serie de obradoiros organizados con motivo da nosa participación no proxecto "LECTURA E FAMILIAS". O obxectivo principal deste proxecto é fomentar a colaboración familias-centro e por iso, animámosvos a que participedes nalgún dos seguintes obradoiros e así, continuar compartindo experiencias todas xuntas. A continuación, aparecen detallados os diferentes obradoiros e un breve resumo dos mesmos. Se queredes obter máis información, podedes premer aquí. COCIÑANDO RECEITAS DE CAMBIO con Lucas Requejo de Ultralimento (Martes 15 de marzo): un obradoiro que prentende orientar ás nais e pais na muda de hábitos cara unha vida saudable e sostible, a través da lectura. Horario: 16:00-17:30. PLAN DIRECTOR a cargo da Garda Civil (Martes 29 de marzo): charla na que se proporcionarán ferramentas orientadas a previr problemas relacionados cos seguintes temas:
E-TÉXTILES con Paola Guimeráns (Mércores 6 de abril): os/as participantes aprenderán a construír un circuíto, experimentar con novos materiais e explorar os potenciais creativos que ofrece a integración da electrónica en téxtiles. Durante a iniciativa, pensada para que todos os membros da familia participen de forma activa e en equipo, propoñerase o deseño de accesorios luminosos (roupa con "superpoderes"). Para o desenvolvemento do exercicio, cada familia participante recibirá un kit cos compoñentes electrónicos e materiais necesarios para deseñar o seu proxecto. Horario: 16:00 - 18:00. CONTAR NO SÉCULO XXI con Paula Carballeira (Mércores 20 de abril): este curso pretende chamar a atención sobre os aspectos máis relevantes á hora de contar unha historia e ofrecer indicacións e consellos para desfrutar o momento de compartir un conto entre diferentes xeracións. Horario: 16:30 - 17:30. OBRADOIRO DE RADIO PARA FAMILIAS con Damián Alonso de Ponte nas Ondas (Mércores 27 de abril): obradoiro sobre o coñecemento da parte técnica e de locución da radio. Horario: 16:00 - 18:00. Cabe dicir que durante o tempo dos obradoiros, as nenas e nenos poderán quedar co mestre/a de garda. A maiores, indicarvos que podedes apuntarvos a máis dun obradoiro e que o número máximo de participantes é de 25/obradoiro (tendo en conta a orde de inscrición). Outra das novidades que vos presentamos é que estamos a crear un PUNTO LECTOR para facilitar e promover o acceso á lectura para adultas/os, mediante o préstamo de libros, en horario de 16:00 a 18:00, de martes a venres. Para facer uso de dito punto lector ides empregar un carnet da biblioteca e para iso, necesitamos os seguintes datos (estes datos serán os mesmos que precisaremos en caso de que vos anotedes aos obradoiros): |
Lectura e Familias 2023 |
Boas familias! Este curso volvemos a estar dentro do Programa Lectura e Familias! Queredes saber en que consiste? Grazas a este programa podemos propoñervos unha serie de charlas, talleres e obradoiros e, por suposto, abrirvos as portas á nosa escola. Este curso contamos coas seguintes formacións: XOGANDO NAS NUBES. Queredes ideas para xogar coas vosas nenas e nenos? Non sabedes que xogos son aconsellables para cada idade? Deixamos gañar ou tamén perder? Iria Orizales poderá dar resposta a todas estas cuestións a través da explicación dos xogos, do seu papel no desenvolvemento de habilidades, de como ler e interpretar as instrucións, de xogos de mesa no fomento da lectura e a través de situacións reais de xogo, diversión e aprendizaxe. Os datos deste obradoiro son os seguintes:
DISCIPLINA POSITIVA. Gustaríavos entender o comportamento das vosas fillas e fillos? Ser amables e firmes ao mesmo tempo? E mellorar o ambiente do fogar a través de estratexias respectuosas? A mestra Paula Otero Freijomil amosaranos a través da Disciplina Positiva, novas dinámicas para a resolución de conflitos na casa. A información deste taller é:
AGADIX. A Asociación Galeda da Dislexia explicaranos en que consiste este trastorno específico da linguaxe. Que é a dislexia? Que dificultades presenta unha nena ouneno con dislexia? Como podemos axudarlles? A estas a outras preguntas poderemos responder coa axuda das rapazas de AGADIX. Os datos desta charla son:
RAIOLAS. A Asociación de pais, nais e persoas con Trastorno do Espectro Autista (TEA) e Trastorno da Comunicación Social (TCS) visitarán o noso centro para axudarnos a coñecer un pouco máis ditos trastornos, a entender a súa realidade e o seu día a día.
Agardamos a vosa participación (poderedes anotarvos a todas as formacións que sexan do voso interese) e, para iso, necesitamos que cubrades o seguinte formulario:
|
OndaPucaRadio! |
|
Lectura e Familias - Maio |
Bo día familias. Comezamos novo mes e maio ven cheíño de novas... Queredes saber cales? Hoxe imos presentarvos os novos obradoiros que hai grazas á participación de Bibliocervo no proxecto "Lectura e Familias". A continuación, aparecen detallados os diferentes obradoiros e un breve resumo dos mesmos. Se queredes obter máis información, podedes premer aquí. LIBROS DE FAMILIA con Pablo Otero (Xoves 5 de maio). Obradoiro no que teremos a posibilidade de crear o noso propio libro cheo de relatos valiosos e significaivos para nós. Un libro obxecto artesán e colectivo. *Se queredes anotarvos a este obradoiro, cabe que leades esta información, premendo aquí. Horario: 16:00-18:00. OBRADOIRO SOBRE DISLEXIA a cargo de Esther López Carbajales (Presidenta de AGADIX) (Xoves 26 de maio). Charla na que se abordarán aspectos como a detección temperá da dislexia, evolución natural, dificultades asociadas e pautas para traballar dende a aula/escola. Horario: 16:00-18:00. Cabe dicir que durante o tempo dos obradoiros, as nenas e nenos poderán quedar co mestre/a de garda. A maiores, indicarvos que podedes apuntarvos a máis dun obradoiro e que o número máximo de participantes é de 25/obradoiro (tendo en conta a orde de inscrición). Todos as sesións terán lugar en Bibliocervo. Para anotarvos a algún dos obradoiros, pasar un momento agradable e compartir experiencias, non o dubidedes e cubride os seguintes datos neste formulario: |
Lectura e Familias 2024 |
Boas familias! Este curso volvemos a estar dentro do Programa Lectura e Familias! Grazas a este programa podemos propoñervos unha serie de charlas, talleres e obradoiros e, por suposto, abrirvos as portas á nosa escola. Este curso contamos coas seguintes formacións: PLAN DIRECTOR. Recibiremos a visita da Garda Civil para continuar profundando nos perigos presentes nas redes e e as causas e consecuencias do ciberacoso escolar. Os datos deste obradoiro son os seguintes:
EDUCACIÓN AFECTIVO-SEXUAL. Contaremos con Carlos Fernández, educador afectivo-sexual e o encargado de impartir o obradoiro "Coñécete" para que nos proporcione estratexias e información sobre o ámbito da sexualidade. Os datos desta charla son:
EDUCACIÓN EMOCIONAL. Recibiremos a visita de UniSer Coaching para falar sobre o autocoñecemento, de relacións, das crenzas limitantes, do intercambio de opinións e de como medrar. A información deste taller é:
ALAS A CORUÑA. A asociación ALAS A Coruña virá de visita á nosa escola para conceptualizar a diversidade, para explicar a importancia do acompañamento no descubrimento da orientación sexual e/ou identidade de xénero, identificar o acoso escolar na comunidade LGTBI+ e proporcionar ferramentas para frear a LGTBIfobia. Os datos desta charla son:
Agardamos a vosa participación (poderedes anotarvos a todas as formacións que sexan do voso interese) e, para iso, necesitamos que cubrades o seguinte formulario:
|
Club de Lectura Familias |
Ola familias! Como estades? Agardamos que ben! Dende Bibliocervo estamos a organizar unha nova edición dos nosos Clubs de Lectura, que este curso levan por nome LER É LECER. Fainos moita ilusión informarvos de que o Club de Lectura para adultos terá lugar durante este segundo trimestre os luns, de 19:30 a 20:30 horas (días alternos) e en formato online. Animámosvos a que participedes nesta iniciativa e disfrutedes dun marabilloso tempo de lecer compartindo lecturas e conversas. Durante a primeira xuntanza, que terá lugar o 31 de xaneiro, escolleremos a novela á que adicaremos as sesións deste club. A escolla realizarase entre dúas novelas que versan sobre a vida e a situación da muller en Afganistán: El secreto de mi turbante de Nadia Ghulam e Agnès Rotger e Mil soles espléndidos de Khaled Hosseini. Se premedes na portada do libro poderedes ver un breve resumo dos mesmos para que vos fagades unha idea. IMPORTANTE! Para participar só precisades completar a seguinte información antes do 26 de xaneiro: |
25N Día Internacional para a Eliminación da Violencia contra a Muller |
Boas de novo a todas e todos! Mañá conmemoramos un día moi importante, o 25N que é o DÍA INTERNACIONAL PARA A ELIMINACIÓN DA VIOLENCIA CONTRA A MULLER. En relación a esta data, a Axenda 2030 ten como obxectivo número 5 lograr a IGUALDADE DE XÉNERO e conseguir as seguintes metas:
A pesar das melloras que se van dando en moitos aspectos, aínda queda moito traballo por facer para que haxa unha igualdade real: os medios de comunicación están tinguidos, habitualmente, de novas pouco alentadoras que nos mostran a situación da muller ao largo e ancho do globo e que nos fan dar de cara contra a realidade. Como mestras e mestres, temos na nosa man a oportunidade de educar para crear sementes violetas de igualdade que se vaian espallando e medrando, dende o cole de Cervo ata os demais recantos do mundo. Para saber máis e poder investigar, déixovos varios recursos que vos poden ser útiles: Recursos para traballar a Educación en Valores: Igualdade. Tamén podedes ir ata o Punto Lector da escola, onde atoparedes moitos máis recursos como os da seguinte imaxe:
A maiores, quero aproveitar para darvos a noraboa polo traballo tan marabilloso que leváchedes a cabo ao longo destes días. Queredes ver o resultado? Aquí tedes o noso propio videoclip coa canción de "De festa" de Uxía Lambona e a Banda Molona.
Xa por último, darlle as grazas ás nenas e nenos de 6ºEP por poñerlle voz a moitas mulleres a través de cancións cunha importante mensaxe. Se queredes gozar con este agasallo tanto coma min, aquí poderedes visualizalo e comprobar que está feito con moito amor.
Bicos e apertas (con distancia) a moreas. |
Mes da Ciencia |
Boas de novo raparigas e raparigos! Comezamos novembro cargadiño de novas... Este mes (o primeiro do período Nadal Maker) celebramos o Mes da Ciencia en Galego nas Bibliotecas. Dende o blog de Bibliotecas Escolares de Galicia, proporciónannos unha morea de recursos para traballar este mes, destacando o manifesto de Amparo Alonso Betanzos, que podedes visualizar aquí.
Dende a páxina de IGACIENCIA, tamén nos achegan información sobre esta data, ademais de presentarnos o ano 2021 como o Ano Internacional da economía creativa para o desenvolvemento sostible, a Intelixencia Artificial e os novos poliedros. Ben sei que algunhas e algúns de vós xa estades a investigar sobre esta temática e traballando arreo... ides convertervos nuns e nunhas expertas no ámbito da ciencia! Pero se aínda precisades ou queredes ver algo máis de información, atoparédela nas seguintes ligazóns: Recompilación de materiais de ciencia en galego. Máis información sobre Alan Turing. Canto sabes sobre Alan Turing? Mulleres de ciencia: Tarsy Carballas. Experimentos científicos Ed. Infantil. Experimentos científicos Ed. Primaria. Polo momento, nada máis... Vémonos pola biblio!
Bicos e apertas (con distancia) a moreas! |
Día da Paz e da Non Violencia |
Bo día a todas e todos! Como estades? Lembrades que día conmemoramos este domingo? Creo que non hai ningunha dúbida despois de todo o que estivemos a traballar este mes. A continuación, vou facer un recorrido por algunhas das actividades e elaboracións que levamos a cabo ao longo desta primeira parte do período PAZ, AMOR e ROCKSALÍA. Parécevos? Despois de investigar varias semanas sobre a paz, a paz interior, o ioga, o mindfulness... o venres, Nuria (profe de ioga), puxo o "broche de ouro" visitándonos e facendo con nós unha práctica na cal aprendimos a facer diferentes Asanas e comprobamos a forza que teñen os Mantras para axudar a relaxarnos. Hoxe, serán as/os maiores do cole os que poderán disfrutar desta sesión de relaxación e conexión con si mesmas e mesmos.
Ese mesmo día, o venres, achegámonos ata a praza do Concello de Cervo para ler unhas verbas, sacar unha foto e para berrar ben alto: NON Á VIOLENCIA E SI Á PAZ!
A maiores, gustaríame amosarvos algúns dos traballiños feitos por nenas e nenos do cole. Apetécevos botarlles un ollo? As nenas e nenos de 1ºEP e 2ºEP crearon o Emocionario Musical, que consiste en expresar a través da arte e da pintura o que simbolizan para unha/un os diferentes estilos musicais. Cada nena e neno foi plasmando no papel o que lle facía sentir unha canción determinada. Sodes unhas e uns artistas!
As nenas de 3ºEP e 4ºEP investigaron moito ao longo deste mes e visitaron OndaPucaRadio para poñerlle voz a todo ao aprendido. Neste vídeo, ademáis de transmitir información moi interesante sobre a India, amósannos imaxes sobre dito país. Sabedes cal é a comida típica? Que disciplina famosa naceu alí? Cantos millóns de habitantes hai? Se queredes dar resposta a todas estas cuestións, premede no seguinte vídeo.
As nenas e nenos de 5ºEP tamén acudiron a OndaPucaRadio no tempo de lecer do venres para levar a cabo o seu primeiro programa de radio, no cal nos contaron moitas cousiñas sobre a India e sobre o Día da Paz e da non Violencia. Bo traballo rapazada!
As nenas e nenos de 6ºEP ensínannos que unha boa e pequena acción pode axudar moito a quen nos rodea e que, ademáis, é contaxiosa, dando lugar a unha Cadea de Favores. Apetéceche continuar a ti a cadea de favores que comezaron elas/es? Mirade o vídeo ata o final, que hai tomas falsas incluídas!
Como vedes, no cole de Cervo non paramos pero ao que si que lle decimos STOP é á violencia (de calquera tipo). O noso é un cole de PAZ e faremos todo o posible para que contiúe así, hoxe e todos os días do ano. Bicos e apertas (con distancia) a moreas. |
Club de Lectura Familias - Segunda Edición |
Ola a todas e todos de novo! Despois dun tempiño, volvemos a andar por estes lares... e con boas novas! Sabedes a que imos dar comezo o vindeiro luns 2 de maio? Á segunda volta do Club de Lectura para Familias co libro "A viaxe de Gagarin" de Agustín Fernández Paz. Gustaríavos pasar un tempo agradable, compartindo experiencias con outras familias e charlando sobre un libro moi interesante? Entón, non o dubidedes e anotádevos! Para máis información, premede enriba da seguinte imaxe. IMPORTANTE! Para participar só precisades completar a seguinte información antes do 30 de abril: |
Familias que contan! |
Queridas familias de Bibliocervo! Estou aquí para presentarvos unha novidade deste curso, a proposta... "FAMILIAS QUE CONTAN!" En que consiste esta nova actividade? Aquí tedes toda a información! QUEN? Nesta proposta pode participar calquera membro da Comunidade Educativa: mamás, papás, avoas, avós, tías, tíos, primas, primos, mestras, mestres, persoal non docente... que teña gana de pasar un tempo agradable connosco! QUE? A finalidade será contar un conto. CANDO? Preferiblemente na hora de ler (de 12:30 a 13:00) pero adaptámonos aos vosos horarios, sempre que sexan dentro do horario lectivo. ONDE? Pódese facer de maneira presencial en Bibliocervo ou a través da proxección dun vídeoconto previamente gravado. COMO? A persoa "contacontos" será a que escolla tanto o formato (presencial ou cun vídeo), como a maneira de contar o conto (a través da lectura, dunha representación teatral, de títeres, cantando, recitando...). Todas as opcións son válidas! PARA QUEN? Este punto tamén será escollido pola persoa "contacontos". Pode ser un conto para todo o cole ou un conto para o grupo da nena/o co que garda a relación. Se queres formar parte deste "Club de Contacontos", non o penses máis... Cumprimenta o seguinte formulario cos datos requeridos e eu, Puca, poñereime en contacto contigo para concretar a actividade. Agardamos os vosos contos, queridas familias! Bicos e apertas a moreas. |
En busca da Paz Interior |
Boas a todas e todos! Que tal a volta das vacacións? Descansáchedes? Tedes as baterías cargadas? Agardo que si porque comezamos un novo período bimensual chamado PAZ, AMOR E ROCKSALÍA e teño moitas novas que darvos. Para facervos unha idea, a continuación amósovos un InfoPuca.
Ioga, Paz Interior, Mindfulness... Coñecedes estas palabras? Algunhas seguro que si porque xa practicáchedes ioga con Brinco pero... Sabedes os seus beneficios? Para descubrir as segredos que gardan todos estes termos, invítovos a pasar polo punto lector e polos andeis de Meses Temáticos xa que atoparedes moito material para comezar a investigar. Así, de paso, tamén vedes as novidades lectoras que chegaron a Bibliocervo.
Tamén podedes empregar os ordenadores ou as PDI para dar resposta a todas as preguntas que vos xurdan sobre este tema. Para iso, premede enriba destas ligazóns: Día da Paz: Por que celebramos o 30 de Xaneiro? Mapa de Paz Mental para temibles trols infelices Actividade: a escola como lugar de paz O valor de todas as persoas: "A historia de punto" Uso excesivo das TIC (Tecnoloxías da Información e Comunicación) Rosa Parks: a loita contra o racismo Guía de recursos: a salvo na escola Recursos para educar na tolerancia Como podemos manexar a ansiedade e o estrés? Vídeo "Tranquilo e atento como unha ra" Como vedes, o obxectivo deste mes é investigar e intentar atopar a nosa PAZ INTERIOR, xa que desta maneira, tamén lograremos estar en paz coas persoas que nos rodean e co noso medio. E para celebralo, o día 28 de xaneiro, levaremos a cabo un obradoiro de Ioga onde aplicaremos todo o aprendido ao longo do mes e onde unha experta na materia nos dará algún consello para levar a cabo esta práctica. Que vos parece? Estades preparadas e preparados? Pois comezamos o 2022 cheas e cheos de enerxía e moita paz. Bicos e apertas (con distancia) a moreas. |
Que din as lendas? |
Boas raparigas e raparigos! Estamos nos momento de "Habelas Hailas", de falar dos medos e de meterlle un bo susto á comida lixo... Parece que todo está moi relacionado cunha festividade moi típica da nosa terra, o Samaín. Para afondar máis sobre esta celebración chea de misterio, podedes darlle un clic aquí e responder as cuestións que Puca ten para vós a través de: - Puca quere saber sobre o Samaín para nenas e nenos de Ed. Infantil. - Puca quere saber sobre o Samaín para nenas e nenos de Ed. Primaria.
Pero que é unha festa de Samaín sen lendas, sen historias de misterio, sen contos das avoas e avós...? Sabedes que unha das cousas que más me apaixona é ler, pero que me conten historias, lendas ou mitos tamén me encanta. Por iso, propóñovos un reto, un "Puca Quere Saber sobre as lendas" e "Puca quere saber sobre seres mitolóxicos". Que vos parece se nos mergullamos na nosa cultura e se descubrimos tradicións e costumes propias da nosa terra a través destes contos. Apetécevos?
Aquí vos deixo algunhas páxinas que vos poden ser de gran axuda para a vosa investigación. - Lendas galegas, lendas de Galicia (swred.com) - MEDIATECA. Contos, mitos e lendas galegas (galiciaencantada.com) - Contos Galegos. Mitos e Lendas galegas. Galicia Encantada. Fantasía popular de Galicia. - Mitos, contos e Lendas galegas - Galicia Encantada Todas esas lendas e mitos podémolos amosar ao resto de compañeiras e compañeiros a finais deste mes a través dun apadriñamento lector (que sei que vos gusta) ou a través dun podcast en OndaPucaRadio (que xa está a piques de comezar a funcionar). Estades preparadas e preparados? Pois comecemos a somerxernos no marabilloso mundo das lendas Bicos e apertas (con distancia) a moreas. |
Plan Director 2023 |
Queridas familias! Estamos encantadas de anunciarvos que o xoves 23 de febreiro terá lugar a charla do Plan Director dirixido a familias por parte da Garda Civil. Gustaríache afondar sobre sobre o tema do acoso escolar? Agardámosvos ás 16:00 en Bibliocervo. E a charla informativa terá unha duración dunha hora.
Para anotarvos, teredes que cubrir o seguinte formulario cos seguintes datos. |
8M Día Internacional da Muller |
Boas a todas e todos! Sabedes que celebramos o 8M? Si, o Día Internacional da Muller! E aínda que no CEIP de Cervo defendemos os dereitos das mulleres e a igualdade todos os días do ano, temos preparadas varias actividades. Queredes saber de que tratan? Pois ollos ben abertos!
O luns 7 de marzo recibiremos a visita de dúas rapazas do equipo feminino de Pescados Rubén Burela FS. Primeiro farémoslles unha entrevista en OndaPucaRadio para coñecer máis delas, do equipo e da súa traxectoria profesional e despois, levaremos a cabo xogos con elas para que nos amosen algún truquiño coa pelota. O martes 8 de marzo, o DO tennos preparado unha actividade para coñecer mellor a varias mulleres deportistas e todos os seus logros. Recibiredes as instrucións ese mesmo día pero déixovos por aquí un adianto.
Se queredes indagar máis sobre esta temática ou pasar un momento agradable facendo algún xogo relacionado con esta data, consultade as ligazóns que aparecen a continuación. Recursos feminismo - Lapiz de ELE Homenaxe ás mulleres fortes da historia Agardo que vos gusten as actividades e lembrade, sempre: valentes, ceibes e bravas! Bicos e apertas (con distancia) a moreas! |
Habelas Hailas! |
Boas rapazada! Rematamos o período de "Habelas Hailas", que se corresponde cos meses de setembro e outubro, e gustaríame facer un pequeno resumo das últimas actividades levadas a cabo na nosa escola. Imos alá! Samaín. O venres 29 celebramos esta festividade, tan típica da nosa terra, vestindo disfraces terroríficos. Estabades irrecoñecibles (e as mestras e mestres tamén).
Queima de medos. Como xa expliquei anteriomente, este mes aproveitamos para intentar identificar algún dos nosos medos e buscarlle unha solución. Despois de ler os medos de todas as nenas e nenos do cole e de investigar a través de contos, de páxinas web, coa axuda de expertas na materia e doutras fontes de información, chegou o momento de queimalos e botalos fóra a través dun conxuro... Foi un momento moi especial, ademais de máxico. Grazas a Raquel e a Viki pola súa posta en escena e por facernos pasar un bo intre.
Apadriñamentos lectores. Ao final de cada período, levaranse a cabo os apadriñamentos lectores entre as aulas irmás. Algúns cursos aproveitaron a temática dos medos e das lendas para facer a súa lectura compartida e amosarlle ás nenas e nenos máis peques do cole contos descoñecidos e moi interesantes.
Formación de usuarios. A apertura de Bibliocervo sempre vai acompañada da formación de usuarios. Nestas sesións de formación, analizamos cales son as normas da biblio para este curso, como podemos facer uso do espazo e dos recursos de Bibliocervo, recibimos as mochilas viaxeiras cheas de libros, xogos e outros materiais, o pasaporte lector para ir rexistrando os libros lidos por cada clase, o itinerario lector con material para empregar na hora de ler e un pequeno agasallo que agardo que vos gustara.
Lendas. Os cursos máis altos, informáronse sobre algunhas lendas da nosa terra (máxica). Para amosarllas ao resto de pícaras e pícaros, acudiron a OndaPucaRadio, colocaron cascos, abriron micros e puxéronse mans á obra. A continuación, amósovos o resultado... Que alegría vervos de novo no estudo de OndaPucaRadio, como expertas e expertos locutores!
Como vedes, este último mes de "Habelas Hailas" foi intenso e cheo de actividade. Agora, comezamos novembro, o mes da ciencia en galego, e con el, o período de "Nadal Maker"... Que estaremos argallando en Bibliocervo para estes dous meses? Estade pendentes porque en nada sairán novos InfoPuca e máis novidades! Vémonos polo cole! Bicos e apertas (con distancia) a moreas! |
Imos de festa! |
Queridas nenas e nenos! O 25N está á volta da esquina... Lembrades que conmemorabamos ese día? Si, si! É o Día Internacional para a Eliminación da Violencia contra a MULLER. E para celebralo, este ano pensamos en crear unha coreografía entre todos os cursos do cole coa canción "De festa!" de Uxía Lambona e a Banda Molona. Con este baile, apoiado da Lingua de Signos, faremos un manifesto non só en contra da violencia cara a muller, senon de todo tipo de violencia.
Para a preparación de dita coreografía, aproveitaremos algúns dos descansos activos que temos ao longo da semana e, ao mesmo tempo, poder enchernos de boa onda. As nenas e nenos de 1ºEP, que están aprendendo un pouquiño de Lingua de Signos e da Comunicación Bimodal, amósannos os xestos que teriamos que facer ao longo da canción... Grazas rapazada!
Tamén quero lembrarvos que nunha das entradas do antigo blog hai unha morea de recusos para traballar este día, por se algún curso quere profundar un pouquiño máis no tema. Se premedes na seguinte imaxe, poderedes acceder directamente na entrada. Xa por último, decirvos que ese día poderemos visualizar o resultado final do noso videoclip colaborativo e gozar dunha pequena sorpresa que nos terá preparada o alumnado de 6ºEP. Estade atentas e atendos, porque as novidades continúan Bicos e apertas (con distancia) a moreas! |
Mételle medo á comida lixo! |
Boas a todas e todos! Como ides? Eu xa estou un pouquiño máis tranquila porque vexo que o cole está cheo de vida e que en Bibliocervo estanse a programar un montón de cousas para este novo curso. Comezamos co meu primeiro obxectivo: mellorar os meus hábitos de alimentación, e dicir, aprender a comer e saber que alimentos son sans e cales debo evitar. Como podemos facelo?
Que vos parece se empezamos polas vosas merendas? Podería comelas eu? Como poderíamos melloralas? A continuación, déixovos dous carteis que vos poden das algunha pista e unha táboa onde poderedes rexistrar todas as merendas sas de cada día.
Para levar a cabo a investigación, poderedes pasarvos por Bibliocervo para coller prestado e consultar aqueles libros que poden responder ás vosas dúbidas e, tamén, podedes consultar as ligazóns que aparecen aquí abaixo. - https://www.educaciontrespuntocero.com/recursos/recursos-para-llevar-una-alimentacion-sana/ - https://www.consumer.es/alimentacion - https://realfooding.com/tema/alimentacion-realfooder/ - https://www.consumer.es/alimentacion/el-azucar-de-los-alimentos-infantiles.html - https://www.manipulador-de-alimentos.es/blog/grasas-saturadas-e-insaturadas/ - https://www.consumer.es/gl/alimentacion-gl/graxas-trans.html - https://www.abc.es/salud/noticias/20141120/abci-grasas-trans-alimentos-201411191507.html - https://kidshealth.org/es/kids/fat.html - https://kidshealth.org/es/parents/fat.html - https://www.consumer.es/gl/alimentacion-gl/que-son-as-graxas-hidrogenadas.html - http://www.cadernoverde.gal/actividades4/Conto-infantil%20compostaxe.pdf Ao longo deste mes tamén contaremos coa visita de expertas e expertos en nutrición que nos axudarán a entender mellor como funciona o noso corpo, que necesitamos proporcionarlle para que funcione correctamente e como podemos elaborar, de maneira moi sinxela, merendas deliciosas e cheas de nutrientes. Imos converternos en cociñeiras e cociñeiros de primeira! E para rematar, que vos parece se todo o que aprendemos o deixamos reflexado nun receitario? Sería xenial que entre todas e todos recompilemos aquelas receitas saudables que máis nos gustan e así ter sempre algunha idea rica e saborosa para traer de merenda ao cole. Gústavos o modelo de receitario?
Pois comezamos! Estou desexando ver esas bolsiñas cheas de merendas sas e deliciosas. Bicos e apertas (con distancia) a moreas. |
Obradoiros con Saray de Nutretuplato |
Bo día a todas e todos! Xa tedes entretemento para esta fin de semana, quen se anima a facer algunha destas receitas? Podedes subir foto ás redes e etiquetar ao CEIP de Cervo e a Nutretuplato para ver o resultado final. |
Comezamos! |
Benvidas a todas e todos! Para comezar este curso gustaríame darvos a benvida a este novo espazo. A partir de agora, todas as novas que vos presentarei, publicareinas neste blog, espero que vos guste e que gocedes moito con el. Tamén aproveito para amosarvos o fermoso cartel das Bibliotecas Escolares de Galicia deste ano... que vos parece? O seu lema é “A BIBLIOTECA ESCOLAR TEN A PALABRA”. En Bibliocervo palabras non nos faltan e máis agora, con OndaPucaRadio.
Continuamos con máis novidades! Queredes saber o que imos facer ao longo destes meses? Teño milleiros de sorpresas para darvos, aventuras que vivir, experiencias para non esquecer e moita, moita aprendizaxe pero sempre con emoción e diversión. Para que vos vaiades facendo unha idea, aquí vos deixo o PAL (Plan Anual de Lectura) deste curso. Botádelle un ollo! Pero raparigas e raparigos, non todo son boas novas... Este verán, non sei que me pasou, que estiven todos os días pechada en Bibliocervo, comendo e xogando á consola. Creo que as mestras e mestres do cole déronse conta de que algo estaba funcionando mal e organizaron un montón de actividades para axudarme: descansos activos, milla diaria, as emocións, hábitos de vida saudables... Creo que con vós ao meu carón, serei capaz de superar todos estes desafíos! Axudarédesme para non seguir así?
Polo de agora, nada máis. Bo comezo de curso a todas e todos e agardo vervos pola biblio moi pronto. Bicos e apertas (con distancia) a moreas. |
Obradoiros con Lucas Requejo de "Ultraalimento" e Visita á Cofraría de Pescadores de Celeiro |
Queridas nenas e nenos. A semana pasada foi unha semana tan chea de aprendizaxe e de experiencias que non sei nin por onde comezar a contarvos... O martes visitounos Lucas Requejo que, co mandil posto e unha mesa chea de alimentos, axudounos a descubrir cousas que algunhas e algúns de nós descoñeciamos. Unha vez presentada a materia prima que tiñamos diante, Lucas propúxonos un reto: facer a nosa receita de cociña saudable, transformando un ultraprocesado nun produto san. Ao comezo, parecíanos imposible pero o traballo en equipo sempre é un éxito e logramos facer receitas espectacularmente deliciosas. Entre as receitas elaboradas atopamos: Nocela de Cervo, Bol Energy, Cocailet, Limoada e Pan-Cracio. A continuación, déixovos unha imaxe do resultado das mesmas para que probedes a facelas na vosa casa!
As nenas e nenos máis peques do cole tamén gozaron dun obradoiro no que cociñaron alimentos coa imaxinación, a través de contos onde os personaxes eran alimentos de tempada. Pasámolo en grande!
Para dar peche á semana, o venres, as nenas e nenos de 3ºEP, 4ºEP, 5ºEP e 6ºEP foron de visita á Cofraría de Pescadores de Celeiro. Comezamos o percorrido na lonxa, onde nos falaron do seu funcionamento, das especias capturadas, dos barcos pesqueiros, da pesca sostible... Ata vivenciamos a simulación dunha poxa!
De aí, continuamos a ruta polo peirao, onde vimos un pesqueiro atracado. Máis adiante estaban os viveiros de marisco, onde apreciamos nécoras, camaróns e santiaguiños.
Xa para rematar, visitamos a Cofraría de Celeiro onde repasamos todo o aprendido ao longo da visita e falamos dos 100 anos de antigüidade da Cofraría, da importancia de coidar o mar, o saudable de comer peixe... Ademais, agasalláronnos con gorras, camisetas e libretas
Grazas a todos os expertos que nos proporcionaron un montón de información e que nos amosaron moitas curiosidades sobre o ámbito da alimentación e da pesca. Agardamos vervos de novo! Bicos e apertas (con distancia) a moreas. |
Apertura de Bibliocervo! |
Nenas e nenos do CEIP de Cervo! Chegou o momento... Bibliocervo abre as súas portas Iso significa que o Día das Bibliotecas está moi próximo! Lembrades cando era? E sabedes por que o celebramos? Se queredes descrubir máis sobre este día tan especial, premede enriba do cartel deste ano.
Como podedes observar, o seu lema é "BIBLIOTECAS: LER, APRENDER, DESCUBRIR". Cando o lin, lembreime moito de vós porque... ler, aprender e descubrir, non é o que facemos en Bibliocervo? A partir deste venres 22 de outubro, a biblioteca do cole abrirá as súas portas e eu comezaréi a repartir ilusión, aventuras e moita diversión a través das mochilas viaxeiras, dos pasaportes e dos itinerarios lectores. Estou desexando ver as vosas caras!
Pois nada máis pequenas e pequenos... vémonos pola biblio e polos corredores da escola! Bicos e apertas (con distancia) a moreas! |
Café con libros 2023/2024 - Primeira xuntanza |
Queridas familias. Estamos de novo por aquí para darvos unha nova! Este ano temos unha proposta froito das peticións que algunhas de vós nos levades facendo ao longo destes últimos cursos: un CAFÉ CON LIBROS! Moitas veces botamos en falta un espazo para compartir experiencias, diferentes puntos de vista ou, simplemente, anécdotas. É por iso que Puca, vai organizar un "Café con libros" trimestral coa finalidade de xuntarnos, compartir e de gozar dun delicioso café. Que vos parece a idea? A continuación, deixamos toda a información sobre a xuntanza deste primeiro trimestre e, se queredes anotarvos, só teredes que cubrir a información que vedes na parte inferior da entrada. Que? Xuntanza para compartir inquedanzas e reflexións sobre o libro "Sentir" de Miriam Tirado, acompañadas dun café e/ou té e de saudables petiscos. Como? Con gana de pasar un tempo agradable e co único requisito de ter lido previamente o libro de Miriam Tirado. Cando? O xoves 14 de decembro de 16:00 a 18:00. Onde? En Bibliocervo. Teredes ata o luns 11 de decembro para anotarvos. Se queredes ler máis información sobre a obra de Miriam, premede na seguinte imaxe. Agardámosvos! Bicos e apertas a moreas. |
Nadal Maker! |
Ola, ola, raparigas e raparigos! Que tal o comezo das vacacións de Nadal? A escola queda moi silenciosa e aburrida sen vós pero aproveitarei este tempo e argallarei novas cousiñas para amosarvos á volta. Hoxe gustaríame facer unha ruta por todas as actividades que levamos a cabo ao longo do período de "NADAL MAKER". Que vos parece? Pois comezamos! ALIMENTACIÓN CONSCIENTE E SAUDABLE. A finais do mes de novembro rematamos as tarefas relacionadas coa alimentación sa. Cada curso investigou sobre un aspecto relacionado coa alimentación, e toda esa información foi recollida en forma de Padlet. Queredes saber máis sobre ultraprocesados e comida real? Azucres? Pirámide alimenticia? Etiquetado dos alimentos? Propiedades da froita? Botade un ollo! Posteriormente, para darlle forma e sabor a todo o aprendido ao longo desta tempada, as nenas e nenos elaboraron receitas chea de nutrintes. Desta maneira, puidemos comprobar que comer saudable e rico é algo totalmente compatible. Aínda se me fai a boca auga cando recordo o arrecendo dos mugcakes, do pan con chocolate, dos gofres de avea...
MES DA CIENCIA. No mes de novembro tamén celebramos o MES DA CIENCIA e levamos a cabo diversas actividades. Entre elas, destacamos a investigación dos volcáns, o análise da fermentación do pan, o descubrimento e elaboración de poliedros e cúpulas xeodésicas... Despois de todas estas tarefas, observamos que a ciencia está en todos os recunchos, verdade?
RRR. Todas e todos estades traballando arreo para cumprir o obxectivo de converternos nunha escola con RESIDUOS 0. Os contedores de pilas, de tapóns e de material escolar xa están prácticamente cheos, o composteiro tamén está a recibir restos de materia orgánica das vosas merendas saudables e os agasallos da amiga/o invisible feitos con material de refugallo foron unha verdadeira obra de arte. Sen dúbida, as 3R viñeron para quedarse!
eTwinning. As nenas e nenos máis maiores do centro comezaron un novo proxecto relacionado coas "Fake News" e para iso, elaboraron un vídeo no cal presentan o noso cole, amosando cada un dos seus espazos e segredos. Que vos parece o resultado? It's very beautiful, isn't it?
APADRIÑAMENTOS LECTORES. As nenas e nenos de 5ºEI e 6ºEI agasallaron cunha posta es escea dos contos "A mellor sopa do mundo" e "O monstro de cores" aos cursos máis altos. Todos os grupos gozaron moito desta experiencia e están desexando repetir o apadriñamento. OUTRAS CONMEMORACIÓNS. A maiores, ao longo destes dous meses, celebramos o Magosto cunha boa ración de castañas e xogos populares, o 25N coa elaboración do videoclip da canción de "De Festa" e o 3D coa visita de Alex. Se queredes saber máis sobre o que fixemos estas datas, podedes botar un ollo nas seguintes entradas: - Magosto. - 25N: Día Internacional para a eliminación da Violencia contra a muller. - 3D: Día Internacional das persoas con (dis)capacidade. Hala! E despois destes meses tan intensos é o momento de descansar, é o momento de gozar do tempo libre, de rir, de xogar, de brincar, de durmir... E se estades aburridas e aburridos e non sabedes que facer, déixovos por aquí algunhas RECOMENDACIÓNS LECTORAS que vos van a encantar. Premede na imaxe ou escaneade o código QR e listo! Agora si nenas e nenos, aproveitade para cargar as baterías porque asegúrovos que o 2022 vai a estar cheíño de sorpresas e experiencias inolvidables no Ceip de Cervo BO NADAL e bicos e apertas (con distancia) a moreas!
|
Febreiro, febreiriño. |
Ola nenas e nenos! Comezamos o segundo período de PAZ, AMOR E ROCKSALÍA!!! Sabedes todo o que nos depara este mes? Nin imaxinades a de cousiñas que teño preparadas para todas e todos vós. Queredes que vos vaia adiantando algunha información? Pois... ollos ben abertos! DÍA DA INTERNET SEGURA. O día 8 de febreiro conmemórase internacionalmente o Día da Internet Segura baixo o lema "Together for a better internet" (xuntas/os por unha internet mellor). Aproveitamos este día para lembrarvos de todos os recursos que podemos atopar na rede e tamén, de todos os riscos que existen cando facemos un mal uso da mesma. Se queredes saber máis, premede nas seguintes ligazóns: Guía para acompañar ás familias no uso da Internet. Vídeo de Phineas & Ferb: regras de xogo para o uso da Internet. E ti... Fas un bo uso da Internet? Averíguao cun xogo. Cyberscouts: aprender xogando a facer un bo uso da rede. A escola das RRSS: recursos para docentes. Aprende a recoñecer Fake News. Alfabetización mediática: buscar na Internet non é só premer nun botón. Recursos para ensinar ao noso alumnado a navegar con seguridade. 10 consellos para sobrevivir aos perigos das novas tecnoloxías. DÍA DA MULLER E DA NENA NA CIENCIA. O 11 de febreiro celébrase o Día Internacional da Muller e da Nena na Ciencia. Esta día proclamouse coa fin de lograr o acceso e a particpación plena e equitativa na ciencia para as mulleres e as nenas, e para lograr a igualdade de xénero e o empoderamento das mesmas. Para consultar máis información sobre este día, pulsade enriba da seguinte imaxe. DÍA DE ROSALÍA DE CASTRO. O 23 de febreiro festexamos o nacemento de Rosalía de Castro. Este ano, ademáis de cantar o mítico RockSalía, queremos ir un pouco máis alá e deseñar unhas camisetas onde aparecerán versos desta marabillosa poeta. Seredes vós, queridas nenas e nenos, as que ides estampar os versos e a imaxe da escritora nas camisetas. A que non se vos ocurre unha mellor vestimenta para ese concerto rockeiro. ENTROIDO. A última semana do mes damos paso a unha das festividades máis desexable: o entroido! Queredes saber como o imos celebrar este ano? O Meco xa está en proceso de creación e as súas consignas xa están listas. Estade atentas e atentos para non esquecervos de nada! A maiores, o venres 25, levaremos a cabo o desfile para amosar os disfraces elaborados con material de refugallo sobre a temática "Deportes pouco coñecidos" e así continuar traballando no PDI deste curso "Mens sana in corpore sano". Polo momento, é que o teño para contarvos. Que vos parece? Se estades un pouco perdidas e perdidos e non sabedes por onde comezar, tranquilas/os! Visitade as baldas de Meses Temáticos e alí atoparedes milleiros de ideas. E de paso, podedes botar un ollo á balda de Novidades e ver os libros que acaban de chegar a Bibliocervo. Ah! A maiores comentarvos que este mes tamén comezaremos coa Escola de Familias cun taller de Disciplina Positiva. Dentro de pouco teredes máis información ao respecto. Agora, a gozar da fin de semana e a cargar as baterías para comezar o luns cheas e cheos de enerxía. Vémonos rapazada! Bicos e apertas (con distancia) a moreas.
|
Lun | Mar | Mér | Xov | Ven | Sáb | Dom |
---|---|---|---|---|---|---|
1 | 2 | 3 | 4 | 5 | 6 | |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 |
Calendario escolar 2023/24 AQUÍ