O discurso do odio.
|
É necesario incorporar a aprendizaxe socioemocional para combater o discurso de odio nos centros educativos, informe da UNESCO. É posible ensinar e aprender estratexias para facer fronte ao discurso de odio e rexeitalo. A educación pode ser un instrumento moi eficaz para abordar o discurso de odio desde a súa raíz”. Así o establece o documento publicado pola UNESCO, que leva por título Afrontar o discurso de odio: respostas educativas. O discurso de odio, cuxa incidencia se viu agravada nos últimos anos a nivel mundial, é especialmente agresivo na internet e ten consecuencias moi negativas no comportamento da sociedade, acompañándose dun aumento das agresións cara a determinados grupos da poboación. Trátase dun fenómeno complexo e multifacético, que require unha resposta multidisciplinar, na que se inclúa aos sistemas educativos. Segundo sinalan os expertos, os centros educativos xogan un papel central na vida dos mozos e as súas familias e poden erixirse como promotores de cohesión social entre a poboación. “As escolas deben ser un exemplo dos principios que promoven e deben facilitar o respecto, a transparencia e a participación na toma de decisións e fomentar a non violencia e a igualdade de xénero”, indica o documento. No texto analízanse os desafíos e vantaxes que supón implantar estratexias fronte ao discurso de odio nos contextos educativos e ofrécense recomendacións para establecer medidas nesta dirección. Conseguir que os alumnos de todas as idades aumenten a súa concienciación sobre as repercusións do odio e adquiran coñecementos, aptitudes e confianza para converterse en defensores activos de sociedades máis pacíficas, tolerantes, inclusivas, seguras e sostibles exponse como algúns dos obxectivos para incorporar nos centros educativos. Entre as medidas que se recomendan para lograr a implementación de estratexias para previr a violencia entre os mozos, sinalanse as seguintes: • Fomentar a educación para a cidadanía mundial e crear máis conciencia sobre os dereitos humanos e as responsabilidades civís. Neste sentido, é fundamental que os alumnos e alumnos desenvolvan habilidades para analizar en profundidade as causas e motivacións das persoas que difunden discursos de odio, así como para saber resistirse fronte a “a simplicidade e o atractivo das retóricas baseadas no medo e o odio". • Comprender as causas e as consecuencias do discurso de odio. • Incorporar múltiples perspectivas e promover o pluralismo e o pensamento crítico para contrarrestar o odio e os prexuízos. • Fomentar a equidade e a inclusión social mediante a aprendizaxe social e emocional. A este respecto, demostrouse que “o desenvolvemento das competencias emocionais vinculadas á regulación da atención mediante a conciencia plena e a resiliencia emocional regula e reduce a agresión e a violencia, e promove un comportamento pacífico e prosocial. Ao mesmo tempo, o desenvolvemento de competencias sociais como a empatía, a cooperación e as aptitudes de solución de conflitos pode axudar a establecer e manter relacións interpersoais de apoio e capacitar aos mozos para promover a xustiza social e a equidade”. • Promover a alfabetización mediática e informacional e a educación para a cidadanía dixital a fin de facer fronte ao discurso de odio en liña. • Fortalecer as capacidades dos educadores para afrontar o discurso de odio e as súas causas profundas. • Reforzar as escolas como centros de cohesión social. • Apoiar os programas comunitarios e a participación dos mozos, tanto en liña como fóra dela.
|
