A Consellería de Cultura e Educación asinará contratos-programa para a mellora do éxito escolar con 289 centros de ensino, o dobre que no curso 2011/2012
O departamento dirixido por Xesús Vázquez Abad vén de publicar a resolución provisional da segunda convocatoria desta iniciativa
Impulsaranse 420 actuacións nestes centros, un 84% máis que no ano académico anterior
A Consellería de Cultura, Educación e Ordenación Universitaria asinará contratos-programa para a mellora do éxito escolar cun total de 289 centros educativos, o dobre de colexios e institutos implicados no ano académico anterior. Deste xeito queda confirmado o éxito da segunda convocatoria desta iniciativa posta en marcha polo departamento dirixido por Xesús Vázquez Abad. De feito, a esta segunda convocatoria presentáronse 314 centros, con propostas para o desenvolvemento de 527 actuacións, o que supuxo duplicar o número de solicitudes do ano anterior, mostra do interese da comunidade educativa.
A Consellería vén de publicar no portal educativo (/portal/node/7689 )a resolución provisional dos centros seleccionados, e cos que a Consellería asinará os contratos-programa. Dos 289 que cumpriron os requerimentos da convocatoria, 94 pertencen á provincia da Coruña, 31 á de Lugo, 35 á de Ourense e 129 á de Pontevedra.
Tras analizar as súas propias fortalezas e debilidades, estes colexios e institutos propuxeron un total de 420 iniciativas, arredor 5 liñas de actuación, nomeadamente as de reforzo, orientación e apoio; mellora da lectura, escritura e cálculo; mellora da convivencia; redución do abandono escolar; e mellora do nivel de coñecementos para acadar a excelencia.
A maior parte das actuacións, en concreto 130, realizaranse na liña de reforzo, orientación e apoio; mentres que 54 xirarán arredor da mellora de lectura, escritura e cálculo; 21 irán destinadas á mellora da convivencia escolar, 7 serán específicas para a redución do abandono escolar; e as 20 restantes ser´na iniciativas para a mellora do nivel de coñecementos para acadar a excelencia.
Aposta pola cultura da autoavaliación
Os contratos-programa son unha aposta da Consellería de Cultura e Educación polo fomento da autonomía dos centros no ámbito pedagóxico, da organización e da xestión, así como por impulsar a cultura da autoavaliación no seo das propias comunidades educativas.
O éxito das iniciativas postas en marcha pola Consellería para a mellora da calidade e a eficiencia do ensino en Galicia tense reflectivo nunha redución da taxa de abandono escolar en 5,2 puntos que se produciu en Galicia desde 2009.