Xunta e equipos directivos dos centros analizan a aplicación das probas de diagnóstico fixadas polo Ministerio que en Galicia serán o 28, 29 e 30 de abril
As avaliacións, que teñen carácter informativo para os centros, van dirixidas a alumnado de 4º de Primaria e de 2º de ESO
O conselleiro de Educación, Ciencia, Universidades e FP, Román Rodríguez, acompañado pola directora xeral de Ordenación e Innovación Educativa, Judith Fernández, reuniuse esta mañá cos equipos directivos dos centros educativos galegos para informar sobre a aplicación das probas de avaliación de diagnóstico fixadas polo Ministerio de Educación para toda España a través da Lei educativa estatal e que en Galicia terán lugar os próximos días 28, 29 e 30 de abril.
O encontro telemático serviu para resolver posibles dúbidas de cara á implementación destas probas que se aplicarán para o alumnado de 4º de Primaria e 2º de ESO. Segundo se subliñou na reunión, estas probas teñen un carácter informativo, formativo e orientador para os centros, que recibirán un informe de resultados sobre o conxunto do seu alumnado por nivel e por competencia avaliada. Non é, por tanto, unha avaliación de alumno, polo que non haberá datos nin cualificacións individuais.
Aínda que a Consellería levou a cabo unha pilotaxe para, de cara a 2026, poder aplicalas en liña, na convocatoria deste ano vanse desenvolver en formato papel e continuarán coas mesmas pautas que as desenvolvidas o ano pasado.
Novas competencias avaliadas
Non obstante, desde a Consellería de Educación, seguindo as indicacións do Ministerio, amplía as áreas de competencias avaliadas. Así pois, no que atinxe a 4º de Educación Primaria, ademais das competencias matemáticas e en comunicación lingüística en Lingua galega e literatura, en Lingua castelá e literatura e en Lingua estranxeira (que pode ser alemán, francés, inglés ou portugués, en función da lingua de escolla en cada centro), engádense desta vez as competencias das áreas de Ciencias Sociais e Ciencias Naturais.
No caso de 2º de ESO avaliaranse as competencias Matemáticas, en comunicación lingüística en Lingua galega e literatura, en Lingua castelá e literatura e en Lingua estranxeira, e como novidade inclúense os obxectivos das materias de Xeografía e Historia, Física e Química e Bioloxía e Xeoloxía.