Rueda destaca que a Xunta consolida a matrícula gratuíta para estudantes universitarios e de artísticas superiores, que arrancou este curso con case 20.000 beneficiarios

O presidente da Xunta, Alfonso Rueda, informou hoxe de que o Consello deu o visto e prace a manter o vindeiro curso a matrícula gratuíta para os alumnos de graos e ensinanzas artísticas superiores.

Deste xeito, o Executivo autonómico consolidará unha medida pioneira e única a nivel estatal que se implantou por primeira vez neste curso e que, segundo apuntou o titular do Goberno galego, son “20.000 os estudantes que se están beneficiando”.

A Consellería de Educación, Ciencia, Universidades e FP elevou ao Consello da Xunta un informe sobre a tramitación administrativa do decreto que formalizará a bonificación das taxas universitarias de grao, así como a conxelación, de novo, das taxas de  grao (para quen non cumpra os requisitos da gratuidade) e de máster, cun prezo medio de 11,89€ /crédito

Así pois, de novo no curso 2025/26, as familias cuxos fillos e fillas inicien por primeira vez estudos de grao ou de artísticas o próximo mes de setembro non terán que desembolsar ningunha matrícula, o que supón maior facilidade de entrada para todos os estudantes e contribúe á igualdade de oportunidades. Así mesmo, todos os universitarios que xa están no sistema e que aproben van ter asegurada a matrícula gratuíta ao longo de toda a súa carreira universitaria, unha medida de apoio ás familias sen precedentes no conxunto do Estado.

E no que atinxe aos másteres universitarios, Galicia sitúase de novo como a comunidade autónoma cos prezos medios de máster máis baratos, con 15,22€ por debaixo da media nacional.

Rueda salientou que o conxunto destas medidas supoñen un aforro estimado de preto de 20 M€ anuais para as familias galegas con fillos universitarios ou que cursan estudos equivalentes ao grao universitario.

Melloras con respecto ao presente curso

Partindo da experiencia deste curso, de cara ao vindeiro exercicio, a Consellería de Educación implementa unha serie de melloras no que atinxe á bonificación das taxas de grao universitario. Tal e como explicou o presidente, a principal novidade é que, a partir de setembro, o requisito para acceder á matrícula gratuíta é estar matriculado “nun mínimo de 60 créditos”, e non nun curso completo, como ata agora. Este cambio supón unha maior flexibilidade para os estudantes, na liña da filosofía do Espazo Europeo de Educación Superior.

Outra das novidades é que os estudantes que obteñan diploma nas modalidades de bacharelato internacional e Bachibac (o bacharelato francés) en centros educativos galegos “tamén se benefician” da matrícula de balde. Ata o momento estaban excluídos debido a que estes estudantes non se presentan á parte obrigatoria da ABAU, outro dos requisitos establecidos.

Polo demais, ao igual que no presente curso, a medida será de aplicación a todos os estudantes de grao matriculados en calquera das tres universidades públicas do Sistema universitario galego (SUG), así como aos estudantes de ensinanzas artísticas superiores (Música, Arte Dramática, Deseño e Conservación e Restauración de Bens Culturais) en centros públicos galegos, tanto no caso de novo ingreso coma no de continuidade de estudos. Tamén será gratuíta para o alumnado do resto dos cursos ata finalizar o grao sempre que aprobe a porcentaxe de créditos establecida para cada área de coñecemento.

Para acceder á matrícula gratuíta, no caso dos estudantes de novo ingreso que debutan na Universidade, deberán ter superado a parte obrigatoria da PAU en Galicia na convocatoria de 2025 ou un ciclo superior de FP en calquera centro galego.

Para os estudantes de continuidade (segundo e sucesivos cursos), deberán ter estado matriculados nun grao nunha universidade pública galega durante o curso anterior (isto é, no actual 2024/25) e ter superados o 90% dos créditos nos graos das áreas de Humanidades e Xurídicas, o 80% dos créditos nos da área da Saúde e o 65% no caso das enxeñarías e graos da área de Ciencias.

Redobrar esforzos no apoio ás familias

Esta medida supón redobrar a aposta da Xunta de Galicia polo apoio ás familias coa gratuidade da educación para o alumnado desde que entra na gardería, na etapa 0-3 anos, ata que remata os seus estudos universitarios, ao tempo que se fomenta a cultura do esforzo, premiando o interese, a dedicación e o bo aproveitamento académico.

Tal e como sinalou o presidente do Goberno galego, Galicia xa levaba “13 anos coas taxas conxeladas”, unha medida mellorada o pasado curso coa “gratuidade total” para todos os cursos de grao. No caso dos estudos de máster, as taxas vanse manter conxeladas unha vez máis no prezo medio de 11,89€/crédito (a segunda máis barata do Estado tras Canarias), o que supón un importante aforro para as familias. Tamén se mantén a conxelación das taxas de grao en 11,89€/crédito para aqueles estudantes que non cumpran cos requisitos da gratuidade.

Deste xeito, Galicia vai seguir tendo a universidade máis accesible de toda España, coa matrícula de grao gratuíta e os másteres máis baratos do Estado.

Á espera da resolución das bolsas do Ministerio

A estimación de beneficiarios de matrícula gratuíta en Galicia calcúlase en preto de 20.000 persoas. Non obstante, a Consellería segue á espera de que se resolvan todas as bolsas de estudo estatais, dado que hai estudantes que cumpren coas condicións para a matrícula gratuíta da Xunta pero están pendentes doutras exencións e, se non as obteñen, aplicaríaselles a bonificación autonómica.