A Xunta acorda coas Universidades un programa para emitir preto de 3.200 microcredenciais co fin de mellorar a cualificación das persoas adultas

O Consello da Xunta deu hoxe luz verde ao convenio de colaboración entre a Consellería de Educación, Ciencia, Universidades e Formación Profesional e as Universidades da Coruña, Santiago de Compostela e Vigo para o desenvolvemento e execución dun programa de microcredenciais, cun orzamento total de máis de 2,6M€. O obxectivo é deseñar e emitir un total de 3.179 microcredenciais para persoas adultas a través de 53 accións formativas diferentes.

As microcredenciais son o rexistro dos resultados de aprendizaxe que adquiriu unha persoa seguindo unha pílula formativa de curta duración. A oferta estará orientada á recualificación da poboación de 25 a 64 anos, cumpridos á data do comezo do curso, e enfocada de forma explícita a resultados de aprendizaxe específicos. Para o seu deseño, as universidades realizarán unha prospección das necesidades de formación da poboación adulta, así como das necesidades dos sectores produtivos, as administracións e as entidades sociais.

O obxectivo final é que esta accións formativas faciliten a adquisición de coñecementos, habilidades e competencias concretas requiridas no mercado laboral, en prol da empregabilidade das persoas e da competitividade das empresas. O programa estará vixente ata o segundo trimestre de 2026.

As microcredenciais deberán adoptar a certificación dixital que posibilite a súa almacenaxe e visualización na carteira dixital do novo Europass, o sistema europeo de credenciais dixitais que permite a portabilidade internacional de titulacións e diplomas baixo criterios de calidade, avaliación, orientación e recoñecemento, garantindo unha comprobación fluída da autenticidade dos datos.

Contidos e bolsas

As tres universidades públicas galegas poderán impartir esta formación de maneira presencial, semipresencial ou virtual, sempre cunha duración menor a 15 créditos ECTS. Os contidos e obxectivos destes cursos deberán dar resposta a unha necesidade ou expresión de interese formal dalgunha empresa, administración pública, colexio profesional, asociación ou colectivo que xustifique a demanda dalgún sector produtivo para a formación ou recualificación dos seus profesionais.

Unha parte da oferta deberá estar orientada a colectivos de persoas en vulnerabilidade social e necesidades formativas específicas, en colaboración con entidades sociais ou con administracións competentes en materia de acción social e migracións.

Ademais, as universidades poderán conceder bolsas ou axudas ás persoas con rendas baixas, situación de desemprego ou outros factores de vulnerabilidade social, para facilitar o acceso á recualificación. En concreto, para o 25% do alumnado a matrícula poderá ser gratuíta ou ter un custe inferior.

Distribución por universidades

Para a distribución da oferta entre universidades aplícase o criterio de poboación de 25 a 64 anos nos concellos dos campus universitarios, coa seguinte distribución:

Ao abeiro deste convenio, as tres universidades públicas galegas poderá subvencionar gastos como a contratación de persoal docente coa cualificación necesaria para o deseño, organización e produción de microcredenciais e para formar o profesorado que as imparta, así como os propios docentes que dean as clases.

Tamén gastos en bens e servizos directamente vinculados coa produción das actividades formativas como o material inventariable e equipamento (por exemplo para a produción audiovisual de contidos virtuais) ou adquisición de material funxible, entre outros.

Así mesmo, serán subvencionables os custos asociados ás devanditas bolsas e as actividades de seguimento e avaliación para mellorar a futura formulación da oferta de microcredenciais.