A Xunta eleva a 665 os auxiliares estranxeiros no sistema educativo galego para o vindeiro curso, récord histórico do apoio á aprendizaxe de linguas
O Consello da Xunta dá luz verde ao convenio co Estado para a dotación de parte deste recurso, que se completa con acordos coa Comisión Fulbright, entre outros
O Goberno galego destina máis de 4,7M€ a esta liña de actuación no marco da Estratexia Galega de Linguas Estranxeiras, Edulingüe 2030
Un total de 665 auxiliares de conversa nativos de países estranxeiros apoiarán a aprendizaxe de idiomas nos centros educativos galegos o vindeiro curso 2024/25. Así se desprende do informe analizado hoxe polo Consello da Xunta, coincidindo coa aprobación do acordo entre o Ministerio e a Consellería de Educación, Ciencia, Universidades e FP para a dotación de parte deste recurso humano, que se completará con acordos coa Comisión Fulbright, Hanban (entidade académica chinesa) e o Instituto Camões de Portugal, ademais da liña de axudas aos centros concertados.
Trátase dun récord histórico no número de persoas que colaboran no apoio á aprendizaxe do inglés, francés, portugués, alemán e chinés. Supón, en concreto, un incremento en 10 auxiliares respecto do actual curso. Desde o ano 2009, cando houbo 67 auxiliares, o número deste apoio tense multiplicado por 100.
O Goberno galego destina máis de 4,7M€ a esta liña de actuación, cun incremento de case 75.000€ respecto do ano académico 2023/24, no marco da Estratexia Galega de Linguas Estranxeiras, Edulingüe 2030.
Líderes en auxiliares de alto perfil académico
No caso da colaboración co Ministerio aprobada hoxe, serán en total 495 auxiliares (463 de lingua inglesa, 15 de lingua francesa, oito de lingua portuguesa, sete de lingua alemá e dous de chinés). O Goberno galego financia de xeito íntegro a estadía destas persoas en Galicia, ademais de asignalas aos diferentes centros plurilingües, con seccións bilingües ou escolas oficiais de idiomas. A maiores, Galicia contará con outros 39 auxiliares dos que lle corresponden do reparto que realiza anualmente o Ministerio.
A estes 534 auxiliares destes acordos engadiranse proximamente o resto dos auxiliares que se incorporarán ao sistema educativo galego a través das devanditas vías de colaboración con outras institucións, sumando un total de 665 auxiliares de conversa para o vindeiro curso.
Entre eles cómpre salientar os 40 auxiliares de conversa estadounidenses de alto perfil académico en inglés que chegan cada curso ao ensino galego a través da colaboración coa Comisión Fulbright. Neste caso a Consellería de Educación, Ciencia, Universidades e FP financia o 87% do convenio de colaboración.
De feito, Galicia é a comunidade autónoma que máis auxiliares de alto perfil académico recibe a través desta colaboración coa Comision Binacional España-Estados Unidos de América para o intercambio cultural, educativo e científico.
Aposta polas linguas estranxeiras
Esta liña de actuación está enmarcada na Estratexia Galega de Linguas Estranxeiras, Edulingüe 2030, que ten como obxectivo para os próximos anos consolidar os programas de éxito desenvolvidos na última década no impulso do plurilingüismo, en concreto na liña de impacto 5, centrada nas dinámicas de alta especialización de apoio lingüístico.
O modelo plurilingüe da Xunta, que implica a impartición de ata un terzo do horario lectivo en lingua estranxeira, comezouse a aplicar no curso 2010/11 para as etapas de educación obrigatoria, isto é, de Primaria e ESO. Xa a partir do curso 17/18, a Consellería de Educación ampliouno ás etapas de Infantil, Bacharelato e Formación Profesional. No actual curso 2023/24 hai un total de 500 centros plurilingües.
Ao abeiro destas políticas o alumnado galego está á cabeza entre os de mellor nivel de inglés de España segundo o ranking internacional EF EPI, o único baseado en avaliacións do idioma realizadas por 2,1 millóns de persoas de 111 países.
Amplo grao de satisfacción
Os auxiliares de conversa son un elemento clave para acercar a realidade cultural e lingüística do seu país de orixe ao alumnado galego, ademais dunha figura cun éxito consolidado na nosa comunidade. Non en balde, o 99% das persoas coordinadoras dos centros participantes consideran moi positivo este apoio e o 50% das persoas auxiliares de conversa solicitan renovar un curso máis en Galicia.
As persoas auxiliares de conversa desenvolven a súa actividade maioritariamente en centros plurilingües, escolas oficiais de idiomas e centros educativos con seccións bilingües. Reciben unha axuda económica e realizarán actividades de apoio á docencia da lingua estranxeira no centro de destino, sempre supervisados por unha persoa profesora titora-coordinadora.