A creación literaria e os seus autores: XI Encontros con escritores.
Organiza estes encontros o CENTRO DE FORMACIÓN E RECURSOS DA CORUÑA baixo a coordinación de Javier Pintor. Intervén como interlocutor na mesa de debate, Xabier Seoane, recoñecido autor galego. Estas xornadas pretenden propiciar un diálogo literario e cultural con algúns dos autores máis relevantes do momento presente. Ademais de comentar textos, aproveitase a proximidade dos escritores para establecer vías de diálogo e pontes de debate, tanto sobre as súas obras como sobre aspectos culturais da actualidade dentro dun ambiente distendido e participativo.
Francesc Capdevila(Barcelona, 1956), máis coñecido como Max, é unha das máis importantes figuras do cómic español cunha extensa carreira na que abordou practicamente todos os campos da actividade gráfica: ilustración, deseño e historieta. Max é un dos poucos historietistas españois que xurdiron a mediados dos 70 que aínda continua en activo. Max creou personaxes tan populares e coñecidos como Gustavo, Peter Pank ou Bardín. En 1979 fundouse "El Víbora" e Max formou parte do equipo artístico fundador. Utilizou un personaxe que creara anteriormente, Gustavo (comprometido, ecoloxista e antisistema) e, en 1983, a Peter Pank (parodiando tanto á obra de animación de Walt Disney coma ás tribos urbanas). A partir deste momento publica "El beso secreto", (1987), Licantropunk, (1988), "Mujeres fatales", (1990), "El jugador de los Dioses" (1992), "Como perros!", (1995), "Alicia en la Ciudad Virtual", (1996), "Bardín," "El superrealista" (1999), "El piano rojo" (2008), "Vapor" (2012), "Paseo Astral" (2013), "Conversación de sombras en la villa de los papiros" (2013) etc. Na ilustración e o deseño o traballo de Max é amplísimo, abrangue carteis, libros, revistas e discos. Entre os seus traballos máis importantes destacan dúas portadas para a revista The New Yorker (1995), o deseño dun reloxo Swatch (1997), a creación da mascota do centenario do Fútbol Club Barcelona(1998) ou El Pequeño Larousse 2007 (ilustra a portada e todas as cabeceiras alfabéticas). Actualmente publica unha ilustración no suplemento cultural Babelia de El País na columna "Sillón de orejas" cuxo motivo son sempre os libros. A súa obra foi recoñecida tanto fora como dentro de España, gañando múltiples galardóns como o Premio Nacional de Ilustración Infantil e Xuvenil polo seu traballo no libro "L'ultima moda" (1997), o Gran Premio do "Saló en el 2000" en recoñecemento á súa carreira, o primeiro Premio Nacional de Cómic por Bardín, "el superrealista" (2007) ou o triplete de premios que conseguiu no Saló del Còmic de Barcelona en 2007 ao gañar "Bardín, el superrealista" os galardóns á mellor obra, mellor debuxo e mellor guión.
Emitiremos a sesión por videoconferencia dende o seguinte enderezo:
http://www.intecca.uned.es/portalavip/directos.php?ID_Grabacion=73311&ID_Sala=124140
A próxima sesión será o día 25 de febreiro (autor invitado, Julio Llamazares).