O Consello da Xunta aprobou hoxe o decreto que recolle os novos estatutos da Universidade de Vigo, despois de que a institución académica realizase as pertinentes modificacións, recomendadas pola Asesoría Xurídica da Xunta tras unha primeira análise da legalidade do texto.

O claustro da Universidade de Vigo aprobou o pasado 10 de novembro por unanimidade a adaptación do proxecto de estatuto ao informe de legalidade emitido pola Xunta de Galicia, trámite tras o que o texto volveu pasar á Asesoría Xurídica, que emitiu finalmente informe favorable.

O documento, composto por 164 artigos, entrará en vigor o día seguinte ao da súa publicación no Diario Oficial de Galicia, o que suporá a derrogación do Decreto 421/2003, polo que se aprobaban os estatutos vixentes ata a actualidade.

Transmisión de coñecemento á sociedade

A norma institucional básica establece como fins prioritarios da Universidade de Vigo a consecución das máximas cotas de calidade de docencia e investigación; e o fomento da procura de novos coñecementos, da creación artística e do desenvolvemento científico. Ademais, e como organización pública, a Universidade de Vigo comprométese á difusión dos coñecementos e da cultura á sociedade.

As novas condicións que afectan o eido universitario tamén están presentes no articulado. Deste xeito, outra das metas recollidas é o afondamento na cooperación entre universidades no ámbito internacional e a integración no Espazo Europeo de Educación Superior (EEES). Ademais, a Universidade de Vigo asume a responsabilidade de acollerse a un modelo de desenvolvemento sustentable baseado no respecto, na preocupación e na conservación do medio; e a promover a igualdade de oportunidades entre homes e mulleres.

Por outra banda, os novos estatutos establecen que a Universidade de Vigo vai dedicar especial atención ao estatuto e desenvolvemento da realidade histórica, social, económica e da cultura de Galicia; coñecementos que se proxectarán para a solución de problemáticas concretas de ámbito galego mediante programas específicos de docencia, investigación e difusión.

Nesta mesma liña, comprométese a detectar, diagnosticar e contribuír á solución dos problemas da sociedade actual, promovendo ao mesmo tempo políticas activas de igualdade e promoción social.

A delegada territorial da Xunta en Vigo, Lucía Molares, visitou esta mañá as novas instalacións da Escola Superior de Arte Dramático de Galicia, situada no polígono de San Paio de Navia, para comprobar in situ o resultado da obra e coñecer o novo centro educativo, que mañá abrirá as súas portas de forma oficial co inicio das clases.

Acompañada polo director do centro, Manuel Vieites, e outros membros do equipo directivo, a responsable do Goberno galego na cidade percorreu todas as instalacións e resaltou a importancia da apertura da escola en Navia neste curso académico xa que, ademais de posibilitar o traslado da ESAD a unhas instalacións máis acordes para este tipo de estudos, o centro convertirá e potenciará a zona residencial e, en definitiva, Vigo, coma o novo referente das artes escénicas. Para unha cidade tan activa e dinámica coma Vigo é moi necesario contar con estas instalacións e este novo espazo?, sinalou Molares, quen recalcou tamén a espectacularidade dos espazos e das aulas prácticas así coma o deseño en sí do edificio, cunha gran luminosidade e totalmente aberto ao entorno no que se atopa.

O novo inmoble ten capacidade para e 250 alumnos e alumnas, e trátase dun edificio de 5.469 metros cadrados que tivo un custe de 6.546.494 euros. A apertura do centro é posible unha vez que se remataron as obras, que tiveron retrasos debido aos problemas que ocasionou a folga do metal ademais das conexións cos servizos básicos como auga, luz, electricidade, gas e saneamento.

O equipo directivo convocou esta mañá a todos os estudantes matriculados (arredor de 125 das distintas especialidades e cursos) para que coñeceran o inmoble e para informalos adecuadamente de todos os espazos e usos do inmoble coa finalidade de que mañá poidan iniciar as clases sen ningún tipo de problema.

As novas instalacións

O novo edificio consta de cinco niveis: cun semisoto (625,90m2), un baixo (1.994,70m2), a pranta de acceso (1.424,75 m2), o primeiro andar (904,20 m2) e un segundo andar (519,62 m2), cun total de 5.469,20 m2.

Nestes espazos están a biblioteca, aulas, cafetería, oficinas, un pequeno teatro con 125 butacas e outras dependencias con capacidade para 250 alumnos e alumnas, ademais dun local de usos múltiples para cen persoas máis. As aulas foron divididas de modo que hai 5 para interpretación e catro para expresión corporal. Ademais haberá dúas para expresión oral e canto, e o mesmo número para expresión musical. Deseño escénico, taller de interpretación, director de escena e taller de indumentaria teñen unha aula para cada materia. Finalmente, a todas estas súmanse doce clases para impartir o resto de materias.

Con todos estes espazos rematados e dotados do mobiliario, que foi trasladado durante o Nadal, os alumnos e alumnas de Arte Dramático poderán estudar nun centro propio, e non como ata o de agora, que recibían as clases no instituto de Ensinanza Secundaria de Bouzas, onde estaban a compartir aulas dende 2005, ano no que arrancou a traxectoria destes estudos en Galicia.

A Secretaría Xeral de Política Lingüística da Consellería de Educación e Ordenación Universitaria vén de convocar catro bolsas de colaboración en proxectos de investigación que se están a desenvolver no Centro Ramón Piñeiro para a Investigación en Humanidades. Os proxectos de investigación para os que se convocan estas bolsas de colaboración no Centro Ramón Piñeiro para a Investigación en Humanidades son o de dicionarios de literatura, o do Corpus documentale latinum gallaeciae, o proxecto do Corpus de referencia do galego actual e mais o de catalogación dos fondos bibliográficos do Centro Ramón Piñeiro.

Baremo para a selección

Ademais da titulación e do expediente académico, outras das variables que terá en conta a comisión de valoración para a selección de candidatos e candidatas será o currículo do solicitante, a experiencia en proxectos de investigación similares e mais a realización dunha entrevista persoal.

Os beneficiarios destas axudas levarán a cabo o seu traballo durante os vindeiros meses e a súa colaboración rematará o próximo 31 de decembro, aínda que se pode prorrogar a duración da bolsa ata un máximo de tres anos. Respecto da asignación mensual, os bolseiros recibirán un total de 954 euros.

Impulsar a investigación sobre lingua galega

Con esta convocatoria, publicada onte no Diario Oficial de Galicia, o departamento que dirixe Anxo Lorenzo ten como obxectivo prioritario avanzar no proceso de investigación que se está a levar a cabo actualmente na comunidade galega sobre os diversos aspectos da lingua galega.

A Secretaría Xeral de Política Lingüística convoca para este ano un total de 185 cursos de lingua galega preparatorios para as probas dos niveis 1, 2, 3 e 4 do Certificado de lingua galega (Celga). A convocatoria, publicada hoxe no Diario Oficial de Galicia, vai dirixida a particulares (adultos), colectivos, entidades e/ou organizacións que conten cun mínimo de 25 persoas preinscritas para asistir aos cursos.

Os cursos, que terán unha duración de 75 horas lectivas, realizaranse nas localidades da Coruña, Santiago de Compostela, Pontevedra, Vigo, Ourense, Ferrol, Lugo, Betanzos, Ribadeo, Monforte, O Barco de Valdeorras, O Carballiño, Verín, Vilalba e Culleredo, e mais naqueles concellos que determine a Secretaría Xeral de Política Lingüística, segundo as solicitudes presentadas e a distribución xeográfica destas.

Contido dos cursos e prazos de solicitude

O contido dos cursos axústase aos obxectivos, ao programa e mais ao contido curricular establecidos para cada un dos catro niveis Celga. Os prazos de presentación das solicitudes para asistir a estas actividades formativas varía en función do inicio de cada unha das quendas de programación dos cursos. Así, as persoas que desexen participar nos cursos programados entre os meses de marzo e xuño poderán inscribirse ata o 10 de febreiro. Aqueles que estean interesados en realizar os cursos nos meses de xullo e agosto terán de prazo ata o día 21 de xuño, mentres que os que queiran facelo en setembro, outubro e novembro poderán inscribirse ata o 10 de setembro. No caso dos colectivos, entidades e/ou organizacións que pretendan organizar cursos entre os meses de abril e novembro deste ano poderán presentar as súas solicitudes ata o próximo día 27 de febreiro.

Probas Celga

Para obter a acreditación do nivel de coñecemento e dominio da lingua galega, as persoas interesadas terán que realizar as probas Celga correspondentes, que se desenvolverán nos meses de maio e novembro. A inscrición para realizar os ditos exames, que son independentes dos cursos, rematará o 25 de marzo de 2010 para a convocatoria de maio e o 7 de outubro, para as probas do mes de novembro.

Novos materias para os cursos Celga

O Aula de galego 2: libro do profesor, un manual de traballo específico para o persoal que imparte os cursos do Celga 2, xa está dispoñible na web de Política Lingüística, a través do enderezo http://www.xunta.es/linguagalega/aula_de_galego_2. Ademais, o departamento que dirixe Anxo Lorenzo completou recentemente a colección Aula de Galego, un conxunto de catro manuais cos que a secretaría xeral pretende facilitarlles a aprendizaxe deste idioma ás persoas que queren obter o Certificado de lingua galega.

Asegurar unha boa capacitación en galego

A organización destes 185 cursos de galego, así como a oferta de novos materiais didácticos insírense dentro dun dos obxectivos prioritarios do departamento que dirixe Anxo Lorenzo: desenvolver actividades formativas que aseguren unha boa capacitación lingüística en galego, así como fornecer ferramentas e materias de utilidade para mellorar o coñecemento desta lingua.

A Secretaría Xeral de Política Lingüística da Consellería de Educación e Ordenación Universitaria vén de facer pública no Diario Oficial de Galicia a convocatoria de axudas para os proxectos de fomento do galego nos centros de ensino non universitario de Galicia. O departamento que dirixe Anxo Lorenzo destinará un total de 878.000 euros para a realización destas actividades que deseñan e desenvolven os equipos de dinamización da lingua galega. En concreto, Política Lingüística destinará 800.000 euros á promoción da lingua propia de Galicia nos centros de titularidade pública, mentres que os de titularidade privada recibirán un total de 78.000 euros. O prazo para a presentación de solicitudes estará aberto ata o vindeiro día 1 de febreiro.

Criterios de avaliación

As achegas económicas que se lle asignen a cada proxecto determinarase tendo en conta diversos criterios. A orixinalidade nas propostas, a potenciación das competencias lingüísticas "especialmente as orais" e a utilización de novas tecnoloxías son algunhas das principais variables que se avaliarán positivamente. Tamén se terá especialmente en conta a colaboración con outras institucións, entidades ou asociacións externas ao centro para fomentar o galego na contorna, así como a colaboración con outros centros educativos na realización de actividades. Outros dos criterios da avaliación son o número de estudantes aos que vai dirixido o proxecto, así como tamén a implicación activa dos membros da comunidade educativa nas actividades propostas.

O papel dos equipos de dinamización da lingua galega

Esta convocatoria de axudas da Secretaría Xeral de Política Lingüística constitúe unha iniciativa que ten como fin prioritario apoiar e impulsar o labor que veñen desenvolvendo os equipos de dinamización da lingua galega, un dos principais motores da dinamización lingüística nos centros educativos. Por iso, un dos obxectivos fixados para esta lexislatura polo departamento que dirixe Anxo Lorenzo é lograr unha maior visibilidade do seu labor e avanzar na planificación da súa actividade.

Formados por profesorado, representantes dos alumnos e persoal non docente, os equipos comezaron a funcionar nos centros de ensino galegos no curso 1990-1991. A súa creación responde ao obxectivo da Lei de normalización lingüística de 1983 de conseguir que o alumnado adquira unha boa competencia nas dúas linguas oficiais de Galicia. Na actualidade, a súa misión central é fomentar o uso do galego nos centros educativos e ter un papel fundamental no deseño, na posta en marcha e na revisión dos programas de planificación lingüística nos centros educativos. Así mesmo, outra das tarefas que veñen desempeñando os equipos é a de conectar a acción dinamizadora levada a cabo no centro de ensino coas actividades de fomento do uso do galego realizadas no contorno social, nun intento de sumar sinerxías para darlles pulo á lingua e á cultura galegas.

O labor dos equipos, tamén na rede

Co obxectivo de difundir e axudar a facer máis visible as experiencias dinamizadoras levadas a cabo polos equipos, o departamento que dirixe Política Lingüística puxo en marcha durante o pasado mes de xuño o espazo web www.xunta.es/linguagalega/equipos_de_normalizacion, onde ademais poden compartir recursos, ferramentas e información.

Un total de 928 persoas conseguiron o Certificado de lingua galega nalgún dos catro niveis na última convocatoria das probas que convocou a Secretaría Xeral de Política Lingüística os pasados meses de outubro e novembro.

Atendendo aos catro niveis das probas Celga, os aprobados no Celga 1 foron un total de 151, mentres que no Celga 2 superaron con éxito os exames un total de 317 candidatos. Nos niveis máis avanzados, o Celga 3 e o Celga 4, o número de aptos ascendeu a 198 e 262, respectivamente. Tendo en conta os presentados ás probas de cada un dos niveis, as porcentaxes de aprobados foron do 77,44% no Celga 1, do 62,28% no Celga 2, do 46,59% no Celga 3 e do 33,59 no nivel máis avanzado, o Celga 4.

Probas en Europa e América

As probas desta última convocatoria desenvolvéronse en Galicia nas cidades de Santiago de Compostela, A Coruña, Lugo, Ourense e Vigo, así como noutros puntos de España e de Europa durante o mes de novembro; mentres que os exames realizados no continente americano tiveron lugar o pasado outubro.

Os resultados destas probas, que se recollen nas listaxes provisionais de aptos e non aptos que Política Lingüística vén de facer públicas, poden consultarse na páxina deste departamento da Consellería de Educación e Ordenación Universitaria, no enderezo www.xunta.es/linguagalega/probas_celga.

A avaliación das probas

Para a avaliación das probas Celga, Política Lingüística habilita persoal colaborador deste departamento, do que forman parte licenciados en Filoloxía Galega e en Filoloxía Hispánica na sección de galego-portugués. A súa función consiste na avaliación da parte oral e na corrección do exercicio escrito que conforman as probas. Para exercer como avaliadores das probas Celga, as persoas que xa contan co Curso de Formación de Profesorado de Galego deben realizar o Curso de Formación de Avaliadores Celga, a través do que se outorga un certificado de aptitude que acredita os participantes como examinadores.

O sistema de certificación da lingua galega

O Celga é o sistema de certificación de lingua galega adaptado ao Marco europeo común de referencia para as linguas. Recolle as habilidades que reflicten a competencia comunicativa nas distintas destrezas e fundaméntase nos contidos relacionados coas funcións comunicativas e mais nos coñecementos do código e lingua, cultura e sociedade. O departamento que dirixe Anxo Lorenzo vén desenvolvendo os cursos preparatorios para superar as probas Celga desde decembro de 2007.

O secretario xeral de Política Lingüística, Anxo Lorenzo, lembrou hoxe que as bases para a elaboración do Decreto do plurilingüismo no sistema educativo non universitario, presentadas o pasado mércores, permiten que as familias galegas participen por primeira vez de forma activa no desenvolvemento dun ensino de calidade en Galicia. Nunha entrevista no programa "Bos Días" da Televisión de Galicia, o secretario xeral de Política Lingüística, expuxo as liñas fundamentais sobre as que a Consellería de Educación construíu a arquitectura xeral deste texto, que presentará agora aos axentes sociais e políticos implicados, co fin de que o Decreto final sexa froito do maior acordo posible.

Lorenzo asegurou que as bases para a elaboración do novo Decreto susténtanse sobre o equilibrio entre as dúas linguas oficiais -galego e castelán-; e ''por escoitar e incorporar activamente as familias'' no reparto de horario lectivo entre ambas. Ademais, reiterou a aposta clara polo pluringüismo, reservando un terzo das horas de clase á docencia nunha lingua estranxeira, na liña seguida polas institución europeas.

Neste sentido, Anxo Lorenzo destacou que o obxectivo é que todo o alumnado adquira ''competencias plenas e equilibradas'' nas linguas oficiais, ao tempo que desenvolve as necesarias para ter coñecementos nunha lingua estranxeira, fundamentalmente en inglés, algo que Lorenzo considera ''un obxectivo estratéxico para a sociedade galega do século XXI''.

O secretario xeral de Política Lingüística sinalou tamén que outro dos obxectivos é que un terzo das materias se impartan en lingua estranxeira en educación primaria, secundaria obrigatoria e bacharelato, unha meta cara a que se comezará a camiñar este mesmo semestre. ''A Consellería de Educación vai poñer sobre a mesa un plan galego de plurilingüismo con recursos económicos suficientes, e sobre todo co compromiso de manter ese esforzo e os orzamentos pertinentes durante os cursos que sexan necesarios'', explicou Lorenzo, lembrando ademais que a Xunta xa vén desenvolvendo diferentes accións de capacitación do profesorado para impartir docencia en outros idiomas.

Consenso

Anxo Lorenzo reiterou que o texto presentado son bases que se van presentar ás forzas políticas e aos axentes sociais implicados, na busca do maior consenso posible á hora de elaborar o texto final, que derrogará o Decreto 124/2007 .

Neste sentido, Lorenzo explicou que a Consellería de Educación ''acepta e respecta as criticas e as opinións contrarias e matizadas'', e intentará incorporar novas achegas ao texto do Decreto, sempre tendo en conta que este ''ten unhas bases ben asentadas sobre as que hai que elaborar este consenso''.

Educación presentou hoxe no Consello da Xunta as bases para a elaboración do Decreto do plurilingüismo no sistema educativo non universitario e que derrogará o Decreto 124/2007. A aposta polo plurilingüismo efectivo, a potenciación da participación das familias na definición do marco lingüístico escolar e mais a garantía de equilibrio entre as linguas oficiais, con máis presenza dunha terceira lingua, en todas as etapas escolares son os piares básicos nos que se asenta o texto elaborado polo Goberno galego.

O obxectivo do Goberno con esta regulamentación é favorecer a convivencia lingüística e garantir a competencia do alumnado nas dúas linguas oficiais de Galicia e, polo menos, nunha lingua estranxeira.

O texto das bases para elaboración do decreto establece un equilibrio lingüístico ao longo das diferentes etapas educativas. No que respecta á Educación Infantil, o profesorado usará na aula a lingua predominante entre o alumnado e coidará que adquira o coñecemento da outra lingua oficial de Galicia. A lingua predominante do alumnado determinarase preguntándolle a cada familia pola lingua materna do seu fillo ou filla. Esta consulta farase mediante unha pregunta que as familias contestarán anualmente durante o proceso de preinscrición.

Na Educación Primaria, na ESO e no Bacharelato garantirase a adquisición da competencia lingüística nas dúas linguas oficiais de Galicia e potenciarase a adquisición dunha competencia efectiva en lingua(s) estranxeira(s), principalmente en inglés. Con esa finalidade, establécese que un terzo das horas semanais se oferte en galego e outro terzo en castelán, e prevese que o terzo restante se poida impartir en lingua(s) estranxeira(s). Na medida en que os centros non dispoñan de recursos humanos para ofertar un terzo das horas en lingua estranxeira, estas distribuiranse de forma equilibrada nas dúas linguas oficiais.

Para a definición da distribución lingüística das materiais nestas etapas (Primaria, ESO e Bacharelato) terase en conta a opinión que expresen as familias a través dunha consulta que se realizará cada catro anos e que orientará a repartición horaria. Na Primaria, que ten 25 horas semanais, a opinión maioritaria das familias será vinculante para determinar a lingua vehicular das materias instrumentais -Coñecemento do Medio e Matemáticas- (ata 10 horas semanais), que serán unha en galego e outra en castelán. Na ESO, que conta con 32 horas semanais, as familias decidirán en que lingua oficial se imparten as materias de Ciencias Sociais e Matemáticas, que suman ata sete horas semanais. No resto das materias, será o Consello Escolar quen aprobe unha proposta horaria equilibrada, tendo en conta a opinión das familias. No Bacharelato e na formación profesional específica, nas ensinanzas artísticas e nas deportivas, cada centro educativo aprobará no seu Consello Escolar, escoitando a opinión maioritaria das familias, unha oferta lingüística equilibrada de materias.

Equilibrio e garantía de competencia lingüística

As bases para elaboración do decreto procura a correcta adquisición das dúas linguas oficiais, así como a capacitación progresiva no dominio de linguas estranxeiras. Neste sentido, o texto aposta por un ensino plurilingüe con tres linguas vehiculares, co fin de que o alumnado adquira unha comunicación efectiva nelas, unha materia pendente do Goberno galego para adaptarse ás novas necesidades sociais.

O alumnado poderá empregar na súa comunicación nas aulas a lingua da súa preferencia e os libros de texto das materias impartidas en galego e en castelán estarán redactados na lingua na que se imparta a materia. A administración educativa comprométese a promover a elaboración de materiais na outra lingua oficial de Galicia e en lingua (s) estranxerias (s). A Xunta procura facilitar a comprensión e a adquisición plurilingüe da terminoloxía básica de cada materia.

Os equipos de dinamización da lingua galega

Para asegurar a súa potenciación fóra do currículo da lingua galega, contarase, como ata agora, co papel activo dos centros, particularmente a través dos equipos de dinamización. Estes 'equipos de dinamización da lingua galega' centrarán o seu labor no fomento da lingua galega. Como novidade, incorpóranse por vez primeira aos equipos os pais e nais do alumnado, co fin de asegurar a integración activa das familias na promoción da lingua galega.