Foron moitos os proxectos, actividades e saídas didácticas que o curso pasado non puidemos levar a cabo debido ao confinamento por causa da pandemia. Unha delas, foi a xornada de acollida a alumnado que finalizaba 6º de Primaria e que ía ter ao noso IES como novo centro de destino. É algo que adoitamos facer cara o remate do curso, e co que pretendemos axudar a ese alumnado a adaptarse ben a un cambio tan sinalado e importante na súa etapa educativa. E é por isto que o pasado mércores 16 de setembro, cun magnífico traballo do equipo de biblioteca, quixemos facer aos nosos 1º ESO unha presentación que fose tamén un xesto cálido de volta ás aulas e de benvida ao noso centro.
Coñeceron así, antes de ir á súa aula, lugares sinalados como o Salón de Actos (moi de Harry Potter, dixo un deles), onde todo o alumnado se atopou cunha mensaxe de vídeo ou unha imaxe de ánimo e agarimo, enviada pola súa escola de Primaria (GRAZAS desde aquí por sumarvos!); accederon ao claustro axardinado e ao aire libre; e tiveron o privilexio de ser os primeiros estudantes en descubrir a nova biblioteca do San Paio, cada vez máis próxima xa a poder ser inaugurada.
Nela agardábaos unha maleta pechada, que lles pedía ser aberta para descubrir no seu interior algo moi valioso, algo único. Ao abrila, sorprendéronse ao descubrir que, en efecto, no espello do interior aparecía algo único: o seu rostro. A persoa única e valiosa que son cada un deles.
Oxalá, pasado o tempo, lembren con agarimo esta acollida e a súa chegada a esta nova etapa, a esta nova biblioteca a eeste IES San Paio, no que nos comprometemos a coidalos, motivalos e acompañalos ata que a misión de pasar á seguinte etapa sexa un éxito.
Non son palabras baleiras. É o noso Xuramento Inquebrantable. ;)
