departamentos
A Xunta e a Facultade de Ciencias da Educación da USC colaborarán na musealización dos seus fondos a través do MUPEGA
Summary:
O conselleiro Román Rodríguez reúnese coa decana, María del Mar Lorenzo, para afondar en novas accións cooperativas co gallo do 50 aniversario da facultade
Idioma GallegoA Xunta de Galicia e a Facultade de Ciencias da Educación da Universidade de Santiago de Compostela (USC) van colaborar na musealización de parte dos fondos da facultade a través do Museo Pedagóxico de Galicia, MUPEGA, dependente da Consellería de Educación, Ciencia, Universidade e Formación Profesional.
Así o acordaron esta mañá o conselleiro Román Rodríguez e a decana da Facultade de Ciencias da Educación, María del Mar Lorenzo, nunha reunión á que tamén asistiu o secretario xeral de Universidades, José Alberto Díez. Ademais desta colaboración, que se formalizará a través dun convenio específico, no decurso da xuntanza, o conselleiro tamén se comprometeu a que o seu departamento colaborará nos actos de celebración do 50 aniversario da creación da facultade.
Así mesmo, a Consellería de Educación vai dotar á facultade dun Polo Creativo como o que xa dispoñen os centros educativos galegos. Isto vai permitir que o alumnado universitario se vaia familiarizando con metodoloxías innovadoras a través destes espazos tecnolóxicos cos que contan os centros educativos galegos.
Información xeral Consellería de Educación, Ciencia, Universidades e Formación ProfesionalUn estudo constata que o rendemento escolar do alumnado mantense con E-Dixgal, programa que se reforzará con máis calidade, formación e seguridade
Summary:
Román Rodríguez subliña a necesidade de avanzar no modelo híbrido de ensino galego onde os alumnos compaxinen as máximas competencias analóxicas e dixitais
Deu conta dun estudo censal comparativo sobre 70.000 alumnos, onde se conclúe que os resultados académicos son parellos con independencia do sistema que usen
Idioma GallegoA Xunta de Galicia vai reforzar de cara ao vindeiro curso 2024-2025 o programa E-Dixgal, de libro dixital, no sistema educativo galego cunha aposta consensuada onde primará a calidade dos contidos, a seguridade no acceso, a formación do profesorado e a información ás familias.
Así o sinalou o conselleiro de Educación, Ciencia, Universidades e FP, Román Rodríguez, con motivo da presentación dun estudo censal entre case 70.000 alumnos sobre a incidencia do emprego do libro dixital nos resultados académicos, así como da folla de ruta para implementar este programa. É o resultado de escoitar á comunidade escolar nos últimos días en xuntanzas de traballo con representantes das anpas, cos equipos directivos dos centros e cos coordinadores Abalar. Na presentación estivo acompañado polo director da Amtega, Julián Cerviño; polo secretario xeral técnico, Manuel Vila, e pola directora xeral de Ordenación e Innovación Educativa, Judith Fernández.
O titular de Educación explicou que o modelo educativo galego está asentado “como un modelo híbrido onde conviven o analóxico co dixital”, dando así cumprimento aos requirimentos normativos europeos e estatais, xa que tanto o Consello de Europa como as leis e os currículos españois sitúan a competencia dixital como prioridade desde a infancia. Para iso, Galicia ten en marcha a Estratexia Educación Dixital 2030, cun conxunto de accións coordinadas enfocadas a xerar un ecosistema dixital e formar a profesorado e alumnado nestas novas competencias e tecnoloxías, entre as que se encontra E-Dixgal como unha ferramenta complementaria e voluntaria por parte dos centros.
Román Rodríguez salientou que o ensino “non pode quedar ás costas do actual escenario tecnolóxico” xa que a competencia dixital “é unha obriga curricular” no marco europeo e estatal, así como “unha garantía de futuro persoal e profesional” na que hai que seguir traballando “de xeito colaborativo, con rigor, con diálogo e con coñecemento”.
Resultados parellosNeste escenario enmárcase o ambicioso estudo comparativo sobre a incidencia do libro electrónico no sistema educativo da nosa Comunidade, no que se analizaron os datos consolidados correspondentes ao cursos 2021-22, das notas medias globais dos alumnos dos centros públicos galegos adheridos ou non a E-Dixgal.
Logo de avaliar as cualificacións dun total de 70.000 estudantes de 5º e 6º de Primaria e de 1º e 2º de ESO, os resultados de rendemento escolar son practicamente idénticos en centros E-Dixgal e non E-Dixgal, cunha tendencia a favor dos primeiros dalgunhas décimas.
Estas diferenzas teñen un maior impacto naqueles centros E-Dixgal que levan catro ou máis anos no programa. É dicir: as notas medias globais do alumnado son similares estuden ou non con libro electrónico e, de haber algunha diferenza, esta sempre é a favor do alumnado de centros E-Dixgal, algo que se fai máis evidente naqueles que levan máis anos no programa. De feito, o estudo analiza por separado os centros que levan entre 1 e 4 anos adheridos a E-Dixgal e os que o implantaron hai máis de catro cursos.
Cómpre ter en conta, igualmente, que a participación territorial no E-Dixgal é semellante nas zonas rurais (o 45,27% dos centros) e nas urbanas (o 50,53% dos centros) polo que o programa é unha ferramenta que tamén contribúe á redución da fenda dixital, que é precisamente un dos retos da Estratexia Educación Dixital 2030. Así mesmo, supón un o un maior achegamento ao eido dixital e as súas metodoloxías didácticas innovadoras.
Mellora de contidosDoutra banda, no encontro cos medios de comunicación tamén se avanzaron as novas accións para reforzar o programa E-Dixgal co fin de continuar perfeccionando o sistema, sobre todo no que atinxe aos contidos, ao asesoramento e apoio aos centros educativos, á formación do profesorado e á información ás familias.
Así pois, de cara ao vindeiro curso, a Xunta está traballando xa na mellora dos contidos dixitais, tanto no que atinxe á súa calidade como variedade. Para iso, estase ultimando unha nova licitación de contidos por un importe de preto de 4 millóns de euros.
Paralelamente, a Consellería está traballando na nova plataforma Creagal, de recursos dixitais de calidade en aberto, nun dossier deseñado para uso dixital ou impreso con todas as materias e todos os niveis, e na supervisión permanente de contidos que implicará un procedemento continuo de revisión por parte de expertos docentes con coñecementos experiencia nas diferentes especialidades e áreas curriculares.
Formación do profesoradoCanto ao apoio ao profesorado, habilitarase un novo plan de formación específico de ensino dixital e reforzarase a figura do coordinador E-Dixgal. Tamén se continuará co proceso de acreditación de competencias dixitais do profesorado, no que Galicia foi das comunidades en emitir as primeiras acreditacións. Esta certificación está en marcha xa tamén para o alumnado, con probas para estudantes de 2º de Bacharelato e de 4º de ESO.
Co fin de visualizar as boas prácticas e o traballo excelente, crearase o selo Centro de Excelencia E-Dixgal, que se converterán en centros piloto para a posta en práctica de novos recursos e a experimentación de novos avances, ao tempo que servirán como modelos inspiradores na convivencia do analóxico e o dixital para o resto dos centros.
Acompañamento ás familiasDando cumprimento ás demandas das anpas, outra das liñas de traballo vai ser o reforzo da información, apoio e acompañamento ás familias, con formación específica sobre a competencia dixital e guías de uso dos dispositivos que se materializarán a través das Escolas de Nais e Pais. Tamén se incidirá no reforzo da navegación segura que blinde o acceso dos alumnos a información sensible ou desapropiada para a súa idade.
File:
Presentación Información xeral Consellería de Educación, Ciencia, Universidades e Formación ProfesionalSeis centros galegos lanzan a cápsula estratosférica MarumaSat VI para medir a velocidade do son
Summary:
O CEE de Panxón, o IES Ramón Caamaño, o IES Miraflores, o IES Marco do Camballón, o IES Arcebispo Xelmírez II e o CPI Plurilingüe O Cruce participan no lanzamento deste aparello no marco do proxecto da Axencia Espacial Escolar Galega (NOSA)
Idioma GallegoA Cidade da Cultura foi hoxe o escenario escollido para o lanzamento da cápsula estratosférica MarumaSat VI, no marco do proxecto da Axencia Espacial Escolar Galega (NOSA).
Durante o voo, que se prolongou máis de dúas horas, a cápsula MarumaSat mediu a velocidade do son a diferentes alturas e creou unha melodía que se obterá empregando ChatGPT para correlacionar notas musicais con algunhas das variables que mide a sonda como pode ser a presión ou temperatura, relacionando así a ciencia coa arte e a accesibilidade. Ademais, no momento do lanzamento ao que asistiu o secretario xeral da Consellería de Educación, Ciencia, Universidades e FP, Manuel Vila, a cápsula estratosférica levou unha mostra de ADN humano e dun fungo para ver a influencia que neles ten a exposición á radiación UV.
Neste proxecto participaron os alumnos do Centro de Educación Especial CEE de Panxón en Nigrán, do Instituto IES Ramón Caamaño de Muxía, do IES Miraflores de Oleiros, do IES Marco do Camballón de Vila de Cruces, do IES Arcebispo Xelmírez II de Santiago e do Centro Público Integrado CPI Plurilingüe O Cruce de Cerceda.
Un proxecto colaborativoEstes seis centros educativos conforman NOSA, un proxecto que naceu no curso 2014/15 cuxo obxectivo principal é levar ás aulas un modelo de traballo colaborativo a través do deseño e construción desta cápsula que cada ano realiza un voo suborbital.
O espírito do programa, compartido por todos os docentes implicados, é concienciar o alumnado da utilidade dos coñecementos que adquire para dar resposta a retos tan complexos como desenvolver esta cápsula estratosférica. A iniciativa afonda, ademais, na cooperación entre alumnado dos distintos centros e diferentes idades.
Información xeral Consellería de Educación, Ciencia, Universidades e Formación ProfesionalRomán Rodríguez destaca o compromiso da Xunta coa Rede de Investigación Universitaria de Excelencia, cuxo financiamento se incrementa nun 31%
Summary:
O conselleiro de Educación e Ciencia reúnese cos 13 centros, aos que o Goberno galego inxecta case 23,6M€ para blindar o seu funcionamento ata 2027
“Estamos a preparar un novo Plan de I+D+i para sumar esforzos e acadar cotas máximas de transferencia de coñecemento á sociedade”, explica
Idioma GallegoO conselleiro de Educación, Ciencia, FP e Universidades, Román Rodríguez, reuniuse hoxe con representantes das entidades que compoñen a Rede de Centros de Investigación Universitaria de Galicia. No encontro, celebrado na Cidade da Cultura, o titular do departamento educativo do Goberno galego reafirmou o compromiso da Xunta coa investigación realizada nas tres universidades públicas galegas. “Non en balde, vimos de incrementar nun 31% o financiamento desta rede, cunha nova inxección de case 23,6M€ que permitirá que estes centros gocen de estabilidade económica para desenvolver a súa actividade ata 2027”, lembrou.
“A ciencia é unha prioridade para o Goberno galego. Vimos de reforzar organicamente a súa estrutura e estamos a preparar un novo Plan de I+D+i para sumar esforzos, establecer sinerxías e avanzar nun ecosistema de investigación e innovación, dentro e fóra da Universidade, que nos permita acadar cotas máximas de transferencia de coñecemento á sociedade”, explicou o conselleiro.
Benvida a cinco novos centrosNo transcurso da reunión, na que tamén participaron o secretario xeral de Universidades, José Alberto Díez, e a directora da Axencia Galega de Innovación, Carmen Cotelo, deuse a benvida aos cinco novos centros que a Xunta acaba de incorporar á rede, dous na máxima categoría e tres na nova categoría de colaboradores, que aspiran a entrar nos vindeiros anos e que tamén recibirán financiamento autonómico.
Os novos centros co máximo recoñecemento son o Centro de Investigacións Científicas Avanzadas (CICA) da Universidade da Coruña e o Centro de Investigación Interdisciplinar en Tecnoloxías Ambientais (CRETUS) da Universidade de Santiago de Compostela. Pola súa banda, a segunda categoría, de centros colaborativos e creada este ano, estréase co Centro de Innovación Tecnolóxica en Edificación e Enxeñaría Civil (CITEEC) da Universidade da Coruña, o Centro de Investigación en Tecnoloxías, Enerxía e Procesos Industriais (CINTECX) e o Economics and Business Administration for Society (ECOBAS), ambos da Universidade de Vigo.
Os restantes oito Centros de Investigación Universitaria de Galicia veñen de renovar tamén a súa acreditación de excelencia. Trátase dos seguintes: pola Universidade de Santiago de Compostela, o Centro Singular de Investigación en Química Biolóxica e Materiais Moleculares (CIQUS), o Centro de Investigación en Medicina Molecular e Enfermidades Crónicas (CIMUS), o Centro de Investigación Singular en Tecnoloxías Intelixentes (CITIUS) e o Instituto Galego de Física de Altas Enerxías (IGFAE); pola Universidade de Vigo, o Centro de Investigación en Tecnoloxías de Telecomunicacións (AtlantTTic), o Centro de Investigacións Biomédicas (CINBIO) e o Centro de Investigacións Mariñas (CIM), e pola Universidade da Coruña, o Centro de Investigación en Tecnoloxías da Información e as Comunicacións (CITIC).
Os 13 centros contarán cun orzamento de case 23,6M€ para que os máis de 1.530 investigadores que traballan neles poidan desenvolver a súa actividade científica dun xeito estable ata 2027. A Rede de Centros de Investigación Universitaria transforma a potencia individual dos centros máis avanzados do sistema nunha gran forza colectiva mediante a posta en marcha de accións estratéxicas e coordinadas que contribúen a consolidar a súa excelencia, a incrementar o seu impacto social no benestar, na saúde ou na economía, e a situar a Galicia como referente científico no panorama nacional e internacional.
Información xeral Consellería de Educación, Ciencia, Universidades e Formación ProfesionalA Xunta recoñece os 64 centros participantes no programa Erasmus+ polas súas accións de mobilidade internacional e cooperación
Summary:
O conselleiro de Educación salienta a excelencia destes centros, aos que se lles garante financiamento pública ata 2027
Idioma GallegoA Xunta de Galicia vén de recoñecer os 64 centros educativos -56 colexios e institutos e oito centros de adultos- que contan con acreditación Erasmus+ nos sectores de Educación Escolar e Educación de Persoas Adultas polas súas accións de mobilidade internacional.
O conselleiro de Educación, Ciencia, Universidades e Formación Profesional, Román Rodríguez, concedeulles esta mañá o recoñecemento por parte do Goberno autonómico pola súa contribución á excelencia do sistema educativo galego a través do proxecto de mobilidade internacional dos países membros da Unión Europea.
Trátase -dixo o conselleiro- dun “carné de socio” que deben ter os centros para asegurar o financiamento de actividades ata 2027. Cómpre lembrar que estes centros recibiron máis de 2,2 M€ para este programa entre 2021 e 2023.
En palabras de Román Rodríguez, ademais dunha experiencia persoal e académica, “a experiencia Erasmus é un investimento en desenvolvemento profesional que moitas empresas destacan á hora de seleccionar persoal”. Nesta liña, o conselleiro comprometeuse a “seguir tecendo redes fortes no ámbito europeo e internacional” a través deste modelo.
Retos de futuroO Erasmus+ arrancou en 2014 como un programa para xerar oportunidades de mobilidade e cooperación en materia de educación a través de distintas actividades como a aprendizaxe por observación, estadías e cursos de formación.
Nos vindeiros anos o programa ten o reto de avanzar na inclusión, a accesibilidade e a sustentabilidade con obxectivos centrados no apoio á transición dixital na educación coa creación do Espazo Europeo de Educación.
Información xeral Consellería de Educación, Ciencia, Universidades e Formación ProfesionalA Xunta ampliará o número de investigadores Oportunius con tres novas prazas para captar e reter talento científico
Summary:
O conselleiro de Ciencia e Universidades, Román Rodríguez, reúnese cos integrantes deste programa que superará por primeira vez a vintena de participantes
“Reforzamos a nosa aposta por atraer ao sistema de I+D+i galego a investigadores que son referentes, ao tempo que facilitamos que persoas formadas nas nosas universidades poidan realizar a súa carreira investigadora en Galicia”, afirma
Idioma GallegoO conselleiro de Educación, Ciencia, Universidades e FP, Román Rodríguez, reuniuse esta mañá cos investigadores que forman parte do programa Oportunius de xeración, retención, retorno e atracción de talento. Unha liña estratéxica de actuación que o Goberno galego ampliará este ano coa convocatoria de, polo momento, tres novas prazas de investigador distinguido para persoas beneficiarias dunha bolsa do Consello Europeo de Investigación (ERC).
Tal e como explicou o conselleiro, “esta nova convocatoria de prazas reforza a aposta da Xunta por atraer e retornar ao sistema de I+D+i galego a investigadores que son referentes nos seus respectivos eidos científicos, ao tempo que facilitamos que persoas formadas nas nosas universidades poidan realizar a súa carreira investigadora en Galicia”.
Non en balde, o programa brinda o impulso necesario de formación e asesoramento para acceder ás axudas do Consello Europeo de Investigación. Así mesmo, ofrece incentivos económicos para as persoas investigadoras que xa dispoñan dunha axuda ERC e elixan Galicia para desenvolver o seu proxecto científico.
Durante a reunión, na que participaron 11 dos 18 investigadores que forman parte do programa Oportunius, o conselleiro estivo acompañado polo secretario xeral de Universidades, José Alberto Díez, e a directora da Axencia Galega de Innovación, Carmen Cotelo.
Posición destacada en EspañaRomán Rodríguez puxo en valor a excelencia da investigación en Galicia, que conta con 31 investigadores que obtiveron 39 axudas ERC, o que supuxo unha captación de fondos do ERC de 59,2 M€. “Máis da metade das persoas que obtiveron estas axudas, 18 deles, están contratados a día de hoxe pola Xunta de Galicia como investigadores distinguidos”, destacou.
Galicia é a sexta comunidade autónoma con maior volume de proxectos ERC e a segunda con maior taxa de éxito, é dicir, con maior porcentaxe de propostas efectivamente presentadas en relación ás financiadas. “O número de axudas do Consello Europeo de Investigación é un dos máis prezados indicadores de excelencia científica de países e rexións e pon de relevancia o talento e o liderado internacional do seu persoal científico”, explicou o conselleiro. “En definitiva, temos que sentirnos orgullosos dos nosos investigadores e imos seguir apoiándoos a través de liñas estratéxicas como o programa Oportunius”, afirmou.
Este apoio inclúe a todos os gañadores das ERC, aos 24 finalistas e as 270 propostas avaliadas e os máis de 465 participantes en 21 talleres formativos, o que supuxo un investimento total de máis de 13,8 M€ a 2023, desde a posta en marcha en 2014 do Oportunius.
Nova convocatoriaA nova convocatoria publicarase a finais de mes e terá por obxecto a cobertura, baixo a modalidade de persoal investigador distinguido, de tres prazas de investigador para persoas beneficiarias de bolsas do European Research Council (ERC).
As persoas que obteñan as prazas poderán desenvolver a súa actividade investigadora en Galicia, baixo a modalidade de persoal investigador distinguido, nas áreas das Ciencias Sociais e Humanidades e das Ciencias Físicas e enxeñaría. Farano nun organismo público de Investigación radicado en Galicia, a determinar pola persoa que ocupe o posto.
Información xeral Consellería de Educación, Ciencia, Universidades e Formación ProfesionalUnha trintena de docentes de toda España coñece o modelo de éxito da formación profesional galega
Summary:
A directora xeral de FP, Eugenia Pérez, amosa aos visitantes o Centro Galego da Innovación da Formación Profesional Eduardo Barreiros, en Ourense
Os docentes participantes acuden a cinco centros máis ata o xoves en Lugo, Pontevedra, Santiago e A Coruña para descubrir a oferta educativa da Xunta
Idioma GallegoUnha delegación de 31 docentes procedentes de toda España, participantes no proxecto FP Innovación, visitaron hoxe o Centro Galego da Innovación da Formación Profesional CGIFP Eduardo Barreiros acompañados pola directora xeral de Formación Profesional, Eugenia Pérez. A súa estadía en Galicia ten como fin coñecer o modelo de éxito da Formación Profesional galega.
A delegación, composta polos responsables de Aulas de Emprendemento das comunidades de Andalucía, Cataluña, Canarias, Comunidade Valenciana e Murcia, ademais de Ceuta, descubriu de primeira man o funcionamento do modelo galego, un referente ante a sociedade española debido ás posibilidades de innovación e colaboración entre os ámbitos educativo-formativo e produtivo para o desenvolvemento de novas capacidades nas empresas, aproveitando o capital humano e a experiencia dos centros galegos de Formación Profesional. “É un orgullo poder compartir cos compañeiros de toda España o noso sistema e a nosa gran oferta educativa”, sinalou a representante da Consellería de Educación.
Esta visita, que se prolongará ata o xoves, enmárcase no proxecto FP Innovación que realiza diferentes actividades onde se fomentan as competencias técnicas, dixitais e transversais, poñendo o foco en formar e informar de xeito integral ao alumnado e ao profesorado de Formación Profesional de toda España.
O proxecto desenvolve diferentes accións enfocadas na formación, actividades experienciais, asesoramento e aplicacións de novas tecnoloxías coa intención de trasladar coñecementos, ferramentas e recursos ao ecosistema educativo. O obxectivo final é apoiar o crecemento e o benestar da comunidade de centros, docentes e alumnado deste ámbito.
Ruta polos centros da Rede de ExcelenciaAdemais de ir a este centro ourensán, os profesionais tamén visitarán cinco centros que forman parte da Rede de Excelencia Estatal. Esta tarde coñecerán o Centro Integrado de FP CIFP As Mercedes de Lugo, destacado no sector da aeronáutica. Xa mañá, os docentes acudirán ás instalacións do CIFP Carlos Oroza de Pontevedra para descubrir a súa oferta de hostalería e o CIFP Politécnico de Santiago, brillante no eido da química.
Finalmente, o xoves adentraranse no sector da construción e a sustentabilidade enerxética no CIFP Someso da Coruña e na oferta educativa do sector sanitario do CIFP Ánxel Casal-Monte Alto da mesma cidade.
Información xeral Consellería de Educación, Ciencia, Universidades e Formación ProfesionalRomán Rodríguez avoga por aproveitar as oportunidades da intelixencia artificial na formación do alumnado
Summary:
O conselleiro de Educación, Ciencia, Universidades e FP inaugura o Seminario Transformación dixital e intelixencia artificial na educación, organizado pola Xunta e a Organización de Estados Iberoamericanos
O encontro conta coa participación de expertos de toda España, entre os que se atopa unha ampla representación galega
Idioma GallegoO conselleiro de Educación, Ciencia, Universidades e FP, Román Rodríguez, inaugurou o Seminario Transformación dixital e intelixencia artificial na educación, organizado pola Xunta de Galicia en colaboración coa Organización de Estados Iberoamericanos para a educación, a ciencia e a cultura (OEI). “Debemos aproveitar as oportunidades da intelixencia artificial na educación para impulsar a formación do alumnado e evitar, así, que se produza unha fenda dixital con respecto á propia actividade profesional”, apuntou Román Rodríguez.
Dirixido principalmente a profesores de Secundaria de todas as especialidades, este encontro aborda hoxe os desafíos educativos aos que se enfrontan docentes e alumnado na actualidade, para o que é necesario “realizar un traballo de reflexión e análise para que comprendamos a repercusión da intelixencia artificial, entendéndoa como unha ferramenta fundamental na innovación educativa”, engadiu o representante da Xunta.
Durante a súa intervención, Román Rodríguez, acompañado pola directora xeral de Ordenación e Innovación Educativa, Judith Fernández, puxo o foco na importancia desta integración paulatina a través das formacións docentes, xa que a “función última da educación é asegurar que o alumnado se integre positivamente na sociedade e participe activamente nela, onde as novas tecnoloxías teñen un papel fundamental e, polo tanto, tamén deben telo nos centros educativos”.
Nesta materia, dixo o titular de Educación, “xa traballa o Goberno galego a través do programa de Polos Creativos, do proxecto EdugalIA, da acreditación de Competencia Dixital de alumnado e profesorado ou da implantación este curso das novas materias de Intelixencia artificial para a sociedade en 4º da ESO e Tecnoloxías intelixentes en 1º de Bacharelato”.
Programa e participantesCoa participación de 14 expertos en investigacións sobre intelixencia artificial e a transformación dixital, a Consellería de Educación e a OEI buscan crear diálogos entre diferentes perfís investigadores e docentes de toda España con experiencia iberoamericana para adquirir novas ideas de aplicación nas respectivas comunidades autónomas. O encontro poderá seguirse de maneira online a través da canle de YouTube de Educación da Xunta.
Os asistentes coñeceron na mesa redonda Unha IA para todos ou todos para unha sola IA? IA, inclusión e o papel da tecnoloxía no aprendizaxe a opinión nesta materia da profesora de deseño dixital da Universidade Alfonso X, Clara Cordero; da investigadora do CiTIUS e profesora da Universidade de Santiago, Eva Cernadas; da coordinadora educativa en Escuela 21, Vanessa Lusa, e da enxeñeira Superior de Telecomunicacións, Beatriz Arias.
A responsable da liña de matemáticas e computación en EduCaixa, Marta García; o coordinador do máster de Liderado e Innovación Educativa da Universidade Ramón Llull, Miguel Ángel Prats; o catedrático e investigador en IA na Universidade da Coruña, Francisco Bellas; o investigador do Innovation Hub, Juan Freire, e o investigador do CiTIUS, Alejandro Catalá, falan sobre Non todo é IA: como saber se unha tecnoloxía serve na miña clase.
Pola súa parte, o catedrático da Universidade de Santiago na área de Ciencia da Computación e IA no CiTIUS, Alberto José Bugarín, expón ante o público as ideas da súa conferencia De que falamos cando falamos de intelixencia artificial Responsable?. O seminario remata coa mesa de diálogo Que significa ser docente na era da IA? da man do profesor da Universitat Politècnica de Catalunya, Toni Hernández; o profesor da Universidade Alfonso X, Vicent Gadea, e os docentes en intelixencia artificial, Josefa Paulos e Óscar Manuel Rey.
Este seminario educativo terá o seu colofón final o martes, 28 de maio, en horario de 16,00 a 19,00 horas de maneira online coa conferencia IA e ferramentas dixitais para ambientes innovadores de aprendizaxe impartido polo docente de matemáticas Álvaro Molina. Os asistentes poderán coñecer claves sobre o aprendizaxe automático na aula, metodoloxías activas, consideracións éticas e avaliacións con intelixencia artificial.
Información xeral Consellería de Educación, Ciencia, Universidades e Formación ProfesionalA Xunta eleva a máis de 14M€ o investimento no Campus Industrial de Ferrol tras unha nova inxección de 6,6M€ para accións estratéxicas ata 2028
Summary:
O Consello da Xunta autoriza o convenio de financiamento coa Universidade da Coruña logo de que o campus ferrolán renovara a súa acreditación de excelencia
Ao abeiro deste acordo, o campus deberá afondar en actuacións concretas no eido da investigación, a internacionalización e a transferencia do coñecemento
Trátase de que afiance unha identidade propia ligada ás potencialidades económicas da contorna como son os sectores naval, oceánico e industrial
Idioma GallegoA Xunta de Galicia inxecta un total de 6.644.000 euros no Campus Industrial de Ferrol ata 2028, o que posibilitará afianzar e incrementar accións estratéxicas de investigación, internacionalización, transferencia de coñecemento, docencia, oferta formativa e gobernanza, entre outras.
O Consello da Xunta autorizou hoxe un convenio de colaboración entre a Consellería de Educación, Ciencia, Universidades e Formación Profesional e a Universidade da Coruña (UdC) para o desenvolvemento de iniciativas que permitan seguir dotando o Campus Industrial dunha identidade propia, ligada ás potencialidades económicas da súa contorna e darlle maior visibilidade no contexto nacional e internacional.
Este novo investimento público de máis de 6,6M€ para os vindeiros catro anos súmase aos 7,7M€ que xa leva destinados a Xunta neste campus desde que arrancou como proxecto no ano 2015, polo que o montante global de orzamento do Goberno autonómico supera xa os 14M€.
A nova inxección orzamentaria formalízase logo de que Campus Industrial de Ferrol veña de acadar a renovación do selo de excelencia como campus de especialización acreditado do Sistema Universitario de Galicia para os próximos anos, un recoñecemento de calidade impulsado pola Xunta de Galicia que ten como obxectivo fortalecer as estruturas de campus non centrais aproveitando as súas potencialidades e facéndoos máis competitivos e especializados.
Así pois, para seguir desenvolvendo accións vinculadas aos obxectivos fixados nesta renovación, o campus deberá enfocarse en continuar na senda da especialización que lle permita acadar unha mellora substantiva nos diferentes ámbitos de actuación que resultan esenciais para nutrir as empresas da contorna, liderar liñas de enxeñaría aditiva e fabricación 4.0 a nivel nacional e aumentar a súa dimensión internacional.
Captación de talento e produción científicaNesta nova etapa e grazas ao apoio da Xunta de Galicia, ao abeiro deste convenio, o Campus Industrial deberá poñer en marcha liñas de actuación concretas no eido da investigación enfocadas á captación e retención de talento, á produción científico-técnica, accións de apoio á axenda científica, mellora do equipamento especializado en industria intelixente e un programa de doutoramento industrial.
No eido da transferencia, as novas accións céntranse nunha unidade de relación industrial e na xestión e comercialización de patentes; mentres que no apartado de internacionalización figura a creación dunha unidade de relación internacional ou un programa de mobilidade internacional do Persoal Docente Investigador.
Así mesmo, no eido da docencia e oferta formativa, implementarase un plan de formación continua en industria intelixente, un estudo da demanda de necesidades formativas e da empregabilidade e programa de seminarios especializados, entre outros. Finalmente, o acordo tamén contempla accións no eido da gobernanza (vinculadas á mellora da xestión) e de comunicación e difusión da produción do campus.
O primeiro con este selo de calidadeO Campus Industrial de Ferrol foi o primeiro de España e de Galicia en obter este selo de calidade e tamén é o primeiro en acadar a súa renovación.
Isto garante un financiamento estable por parte da Xunta de Galicia para este campus que arrancou como proxecto en 2015 e que en marzo de 2021 obtivo a acreditación de especialización cun enfoque estratéxico ligado ao sector naval, oceánico e industrial, dos que derivan as demais áreas de especialización do campus.
Isto permitiulle, entre outros efectos, potenciar as súas estruturas de investigación e estreitar as relacións coas empresas da contorna, o que repercutirá no desenvolvemento da cidade.
Información xeral Consellería de Educación, Ciencia, Universidades e Formación ProfesionalQuince centros galegos participarán na primeira Feira de Educación, Formación e Emprego de Lugo os días 23 e 24 de maio
Summary:
A directora xeral de FP, Eugenia Pérez, e o delegado territorial da Xunta en Lugo, Javier Arias, participan na presentación deste evento educativo
O obxectivo desta cita é proporcionar información, asesoramento e orientación ao alumnado, familias, centros e empresas
Idioma GallegoA directora xeral de FP, Eugenia Pérez, e o delegado territorial da Xunta en Lugo, Javier Arias, participaron hoxe na presentación da I Feira de Educación, Formación e Emprego de Lugo, que se celebrará os días 23 e 24 de maio no Pazo de Feiras e Congresos de Lugo na que toman parte 15 centros educativos.
O obxectivo deste evento, organizado polo Pazo de Feiras e Congresos de Lugo e coorganizado pola Xunta de Galicia, é proporcionar información, asesoramento e orientación para facilitar unha adecuada elección a todas aquelas persoas que se atopan ante a toma de decisións do seu futuro profesional, así como facilitar as ferramentas necesarias para que os estudantes poidan decidir eficazmente o seu futuro formativo e profesional. Poderán facelo acompañados das súas familias, que encontrarán nesta feira unha oportunidade para coñecer as diferentes ofertas formativas ao seu dispor.
Dirixida a alumnado, familias, profesionais do ensino, centros educativos, formadores, empresas do sector e público en xeral, a feira ten en conta os intereses tanto dos mozos que comezarán os seus estudo superiores ou profesionais como a daqueles profesionais en situación de desemprego.
Do mesmo xeito, os expositores queren servir de escaparate para que as persoas que se acheguen poidan coñecer unha ampla mostra de centros educativos e formativos, empresas, asociacións e entidades que dean resposta ás necesidades de formación que os estudantes precisan para o seu futuro laboral.
A Xunta de Galicia, a través dos 15 centros participantes, quere amosar o potencial da FP e a ampla variedade de familias profesionais e ofertas dispoñibles que existen no sistema educativo galego, tamén nas ensinanzas de réxime especial.
Deste xeito, a Consellería de Educación, Ciencia, Universidades e FP estará representada polos centros integrados de FP CIFP As Mercedes (Lugo), CIFP Politécnico de Lugo e CIFP Porta da Auga (Ribadeo); polos institutos IES Monte Castelo (Burela), IES da Terra Chá, José Trapero Pardo (Castro de Rei), IES de Foz (Foz), IES Sanxillao (Lugo), IES Lucus Augusti (Lugo), IES San Rosendo (Mondoñedo), IES A Pinguela (Monforte de Lemos) e IES Río Cabe (Monforte de Lemos); polo Conservatorio Profesional de Danza de Lugo, o Conservatorio de Música Xoán Montes (Lugo), a Escola Oficial de Idiomas de Lugo e a Escola de Artes e Superior de Deseño Ramón Falcón.
Información xeral Consellería de Educación, Ciencia, Universidades e Formación ProfesionalXunta e Universidade de Vigo ultiman as primeiras actuacións de impulso do Campus Auga de Ourense como campus especializado
Summary:
O secretario xeral de Universidades e os responsables do campus avalían as accións que se formalizarán nun convenio a través do cal o Goberno galego investirá máis de 3M€
Idioma GallegoA Xunta de Galicia e a Universidade de Vigo (UVigo) ultiman as primeiras actuacións de impulso do Campus Auga de Ourense como campus especializado.
O secretario xeral de Universidades, José Alberto Díez, mantivo hoxe unha reunión de traballo co vicerreitor do Campus de Ourense, Francisco Javier Rodríguez, co director do Campus Auga, Roberto Fernández, e co xestor, Roberto Villar, para avaliar o desenvolvemento de accións específicas que se recollerán no convenio a través do cal o Goberno galego inxectará máis de 3M€ para levalas a cabo.
Na xuntanza abordáronse cuestións relativas á docencia enfocadas a potenciar a oferta formativa, a empregabilidade e a internacionalización; á investigación para fortalecer a captación de talento; á transferencia e innovación e á gobernanza.
Cómpre lembrar que o Campus Auga de Ourense vén de acadar acreditación como campus de especialización para o período 2024-26, polo que é o terceiro campus do Sistema Universitario Galego que acada este recoñecemento, tras o Industrial de Ferrol e o Campus Terra de Lugo. Isto, na práctica, supón contar cun financiamento específico por parte da Xunta de Galicia que superará os 3M€ para dito período. Esta contía sumarase aos case 8,5 que leva investido o Goberno autonómico desde 2013 que arrancou como proxecto.
Información xeral Consellería de Educación, Ciencia, Universidades e Formación ProfesionalA Xunta abre este martes o prazo para solicitar as axudas para libros de texto e material escolar
Summary:
Do 21 de maio ao 21 de xuño, as familias poderán realizar as súas peticións para o vindeiro curso nas axudas de libros, fondo solidario e bono de material
As medidas, que consolidan as melloras introducidas nos últimos anos, chegan ao 70% do alumnado en función da súa renda, axudando máis a quen máis o precisa
Idioma GallegoA Xunta abrirá este martes, 21 de maio, o prazo para solicitar as axudas para a compra de libros de texto e material escolar, así como para participar no Fondo solidario para o vindeiro curso 2024/25. Estas medidas de apoio ás familias galegas consolidan as melloras introducidas nos últimos anos ante a suba de prezos. A convocatoria será publicada mañá luns no Diario Oficial de Galicia.
Estas tres ferramentas permiten que todas as familias que cumpren cos requisitos teñan cuberto de balde os libros que precisan para os seus fillos, case na súa totalidade, apoiando máis a quen máis o necesita. No actual curso 2023/24 máis de 96.500 alumnos tiveron os libros de balde e máis de 128.000 accederon aos vales de material escolar. Isto, sumado aos estudantes que acceden gratis ao libro dixital, fai que máis do 70% do alumnado galego conte co apoio da Xunta para afrontar o inicio do curso.
O prazo está aberto ata o 21 de xuño e os trámites presentaranse preferiblemente por vía electrónica a través do formulario accesible dende a sede electrónica da Xunta de Galicia. Opcionalmente, as solicitudes poderán presentarse presencialmente nos centros docentes ou en calquera dos lugares e rexistros establecidos na normativa reguladora.
Ata 75€ para materialO vale para a adquisición de material escolar vai dirixido a todas as familias con renda per cápita igual ou inferior aos 10.000€, con dous tramos de renda. No primeiro deles, rendas per cápita iguais ou inferiores a 6.000€, mantense o vale de 75€, reforzado no curso 2022/23 (antes eran 50€) para facer fronte á subida de prezos. No segundo, de nova creación curso 2023/24, e que comprende as rendas superiores a 6.000€ e iguais ou inferiores a 10.000€, o vale será de 60€ por alumno.
O alumnado en situación de garda ou tutela da Xunta, o de Educación Especial ou cunha discapacidade igual ou superior ao 65% obterá o de 75€ con independencia da renda.
Axudas para libros non reutilizablesA convocatoria contempla axudas para a compra de libros nos cursos nos que estes non son reutilizables, é dicir, para os alumnos dos dous primeiros cursos de Primaria, os de Educación Especial e para aqueles con necesidades específicas de apoio educativo que lles dificultan empregar os libros do Fondo solidario.
O funcionamento das axudas para a compra de libros mantense invariable, cos mesmos tramos de renda, consolidando o incremento xeneralizado nas contías no curso 2023/24, de entre 20€ e 30€ en función da renda familiar, así como a achega de 300€, con independencia da renda, para o alumnado matriculado en Educación Especial.
Deste xeito, para o alumnado de 1 e 2º de Primaria, a axuda do primeiro tramo (igual ou inferior a 6.000€) é de 240€ e a do segundo (renda superior a 6.000€ e igual ou inferior a 10.000€) de 160€. O alumnado matriculado en Educación Especial (en centros específicos ou en unidades de Educación Especial de centros ordinarios) ou cunha discapacidade igual ou superior ao 65% continuará recibindo 300€, con independencia da renda per cápita.
No caso do alumnado con necesidades específicas de apoio educativo, que non poida usar os libros do Fondo, hai axudas para todos os cursos de Primaria e ESO. Na etapa de Primaria, as familias do primeiro tramo de renda reciben 240€ por fillo e as do segundo 160€. Na etapa de ESO, os importes sitúanse en 270€ no primeiro e 180€ no segundo. Para o alumnado en situación de garda ou tutela da Xunta, o importe da axuda será a maior que lle corresponda con independencia da renda per cápita da unidade familiar.
Máis de 400.000 libros no FondoO Fondo solidario conta este curso con máis de 400.000 libros, que se repartirán en réxime de préstamo entre o alumnado desde 3º de Primaria a 4º de ESO, a excepción dos devanditos casos de alumnos de Educación Especial e alumnado con necesidades específicas. A asignación de libros de texto realízase por orde inversa á renda per cápita da unidade familiar, tendo preferencia o alumnado en situación de garda ou tutela da Xunta ou cunha discapacidade igual ou superior ao 65%, con independencia da renda.
Os estudantes de familias con renda per cápita igual ou inferior a 6.000 euros, ou que estean en situación de garda ou tutela da Xunta ou cunha discapacidade igual ou superior ao 65% (nestes dous últimos casos con independencia da renda) ten garantido o acceso a seis libros. Pola súa banda, as familias con tramos de renda per cápita entre 6.000 e 10.000 euros teñen acceso a catro. Tanto para acceder ao Fondo solidario como para recibir as axudas é requisito devolver os libros do curso anterior.
Información xeral Consellería de Educación, Ciencia, Universidades e Formación ProfesionalExpertos en intelixencia artificial de toda España reúnense en Santiago para abordar os desafíos educativos dos vindeiros anos
Summary:
A Xunta de Galicia e a Organización de Estados Iberoamericanos (OEI) organizan un seminario dirixido a profesores de Secundaria de todas as especialidades
O encontro, que contará con mesas redondas e conferencias, celebrarase o martes na Escola Galega de Administración Pública (EGAP)
Entre os participantes atópase unha ampla representación galega, debido ao alto nivel da Comunidade nesta materia
Idioma GallegoA Escola Galega de Administración Pública (EGAP) será o epicentro o próximo martes, 21 de maio, do seminario Transformación dixital e intelixencia artificial na educación, organizado pola Xunta de Galicia en colaboración coa Organización de Estados Iberoamericanos para a educación, a ciencia e a cultura (OEI). Dirixido principalmente a profesores de secundaria de todas as especialidades, este encontro abordará os desafíos educativos aos que se enfrontan docentes e alumnado na actualidade.
O seminario, que contará con mesas de diálogo e exposicións, ten como obxectivo servir como plataforma para poñer sobre a mesa estratexias e modelos educativos innovadores que promovan a redución da fenda de aprendizaxe e a fenda dixital. A cita prolongarase toda a mañá, comezando ás 09,30 horas coa benvida institucional e a presentación da xornada a cargo do xornalista Daniel Sousa.
Coa participación de 14 expertos en investigacións sobre intelixencia artificial e a transformación dixital, a Consellería de Educación, Ciencia, Universidades e FP e a OEI buscan crear diálogos entre diferentes perfís investigadores e docentes de toda España con experiencia iberoamericana para adquirir novas ideas de aplicación nas respectivas comunidades autónomas. Entre eles, destaca a ampla participación de galegos nesta xornada, debido ao gran potencial que existe na Comunidade nesta materia.
O compromiso do Goberno galego nesta materia tradúcese en numerosos proxectos educativos enfocados a asentar a tecnoloxía nas aulas e ser pioneiros en toda España. Entre as iniciativas máis destacadas atópanse EdugalIA, co que se busca incorporar a intelixencia artificial á xestión educativa e a que posiciona a Galicia como a primeira comunidade en integrar esta tecnoloxía na ensinanza, e os Polos Creativos, un elemento clave para a transformación dixital nos centros e cos que se traballan diferentes competencias entre o alumando.
Programa e participantesOs asistentes somerxeranse de cheo na xornada coa primeira mesa de diálogo ás 09,45 horas baixo o título Unha IA para todos ou todos para unha sola IA? IA, inclusión e o papel da tecnoloxía no aprendizaxe. A profesora de deseño dixital da Universidade Alfonso X, Clara Cordero; a investigadora do CiTIUS e profesora da Universidade de Santiago, Eva Cernadas; a coordinadora educativa en Escuela 21, Vanessa Lusa, e a enxeñeira Superior de Telecomunicacións, Beatriz Arias, tratarán de achegar a realidade desta disciplina ao ámbito da educación.
Xa ás 11,30 horas será a quenda da mesa de diálogo Non todo é IA: como saber se unha tecnoloxía serve na miña clase coa participación da responsable da liña de matemáticas e computación en EduCaixa, Marta García; do coordinador do máster de Liderado e Innovación Educativa da Universidade Ramón Llull, Miguel Ángel Prats; do catedrático e investigador en IA na Universidade da Coruña, Francisco Bellas; do investigador do Innovation Hub, Juan Freire, e do investigador do CiTIUS, Alejandro Catalá.
Tras esta cita, ás 12,45 horas, o catedrático da Universidade de Santiago na área de Ciencia da Computación e IA no CiTIUS, Alberto José Bugarín, exporá ante o público as ideas da súa conferencia De que falamos cando falamos de intelixencia artificial Responsable?. O seminario rematará coa mesa de diálogo Que significa ser docente na era da IA? da man do profesor da Universitat Politècnica de Catalunya, Toni Hernández; o profesor da Universidade Alfonso X, Vicent Gadea, e os docentes en intelixencia artificial, Josefa Paulos e Óscar Manuel Rey.
Unha segunda parte onlineEste seminario educativo terá o seu colofón final o martes, 28 de maio, en horario de 16,00 a 19,00 horas de maneira online coa conferencia IA e ferramentas dixitais para ambientes innovadores de aprendizaxe impartido polo docente de matemáticas Álvaro Molina. Os asistentes poderán coñecer claves sobre o aprendizaxe automático na aula, metodoloxías activas, consideracións éticas e avaliacións con intelixencia artificial.
Información xeral Consellería de Educación, Ciencia, Universidades e Formación ProfesionalGalicia e o Norte de Portugal avanzan no desenvolvemento da Estratexia de Especialización Intelixente Transfronteiriza
Summary:
Representantes do ecosistema de I+D+i Eurorrexión reuníronse en Vigo para iniciar os traballos de deseño do novo plan
O anterior, para o periodo 2014-2020, foi recoñecido como caso de boas prácticas pola Comisión Europea
Idioma GallegoA I+D+i como motor para o crecemento económico, para a retención e atracción de talento á Eurorrexión e para facer fronte aos grandes retos sociais compartidos, como o envellecemento da poboación, son algunhas das cuestións que se analizaron no primeiro obradoiro da Estratexia de Especialización Intelixente Transfronteiriza Galicia-Norte de Portugal (RIS3T), celebrado a semana pasada nas instalacións do Centro Tecnolóxico do Mar (CETMAR), en Vigo.
O evento serviu para comezar a traballar de maneira conxunta no deseño da nova RIS3T, que dará continuidade ao traballo desenvolvido no anterior período (2014-2020). Neste sentido, a xornada deixou clara a necesidade de afondar na cooperación interrexional como ferramenta que permite unir esforzos para actuar ante os cambios sociais de Galicia e do norte de Portugal.
A actividade enmárcase nun proceso participativo con representantes do ecosistema de I+D+i -universidades, centros de coñecemento e tecnolóxicos, empresas e administracións públicas-, que busca enriquecer a nova RIS3T para adecuar a resposta á evolución dos retos da Eurorrexión.
O proceso de elaboración da nova RIS3T continuará ata finais de 2024, impulsado pola Xunta de Galicia, a través da Consellería de Educación, Ciencia, Universidades e FP, e a Comissão de Coordenação e Desenvolvimento Regional do Norte (CCDR-NORTE) ao abeiro do proxecto GOBERNANZA_GNP_1_E, financiado polo Programa de Cooperación Transfronteiriza España-Portugal (POCTEP) da Unión Europea.
A RIS3T, caso de boas prácticas para a Comisión EuropeaRaquel Meira, directora de servizos de desenvolvemento rexional do CCDR-R, destacou a longa colaboración do Norte de Portugal con Galicia e a aposta por promover unha Eurorrexión innovadora, que mereceu o recoñemento da Comisión Europea. Concretamente, no 2015 a RIS3T foi considerada como caso de boas prácticas polo executivo comunitario.
Meira apelou á importancia da colaboración interrexional para desenvolver estratexias conxuntas e loou o traballo da Axencia Galega de Innovación pola visión compartida nas áreas da RIS3.
A xornada tamén contou coa presenza virtual do experto Richard Tuffs, quen destacou que a especialización intelixente debería ser a pedra angular da política de cohesión. Tuffs afirmou estar convencido do enorme potencial que existe na colaboración interrexional, posto que se traduce en novas capacidades que diversifican a economía.
No peche da xornada, Sabela Pardo, directora da área de Programas da Axencia Galega de Innovación, anunciou a celebración dun novo obradoiro da RIS3T a comezos do mes de xullo en Portugal.
Información xeral Consellería de Educación, Ciencia, Universidades e Formación ProfesionalRomán Rodríguez aposta por impulsar a transferencia de coñecemento entre os centros de investigación e o tecido produtivo a través dun novo plan de I+D+i
Summary:
O obxectivo é transferir todo o coñecemento derivado da ciencia a aplicacións prácticas e innovadoras nos diferentes sectores empresariais
“Queremos consolidar un ecosistema de I+D+i que repercuta do xeito máis directo posible na mellora integral de Galicia”, di o conselleiro
Idioma GallegoO conselleiro de Educación, Ciencia, Universidades e FP, Román Rodríguez, destacou hoxe o labor dos centros tecnolóxicos de Galicia como fundamental para mellorar a competitividade das empresas a través do desenvolvemento, a investigación e á innovación tecnolóxica nos diferentes sectores produtivos. Fíxoo nunha visita a dous deles, en concreto á Asociación de Investigación Metalúrxica do Noroeste (AIMEN) e ao Centro Tecnolóxico de Automoción de Galicia (CTAG), xunto á secretaria xeral de Innovación, Teresa Riego; a directora xeral da Axencia Galega de Innovación, Carmen Cotelo, e aos responsables de ambas entidades, Jesús Lago e Luís Moreno, respectivamente.
“Queremos dar a maior potencialidade ao traballo que desenvolven os nove centros tecnolóxicos de Galicia. Por iso, imos comezar a deseñar un novo Plan de I+D+i que reforce os vínculos entre os centros de investigación e o resto da sociedade para transferir todo o coñecemento derivado da ciencia a aplicacións prácticas e innovadoras nos sectores produtivos, a través da colaboración público-privada”, explicou o conselleiro.
Así mesmo, Román Rodríguez incidiu no primeiro encontro de “traballo que mantivemos cos responsables dos centros tecnolóxicos para sentar as bases dunha colaboración fluída, na que queremos aproveitar o magnífico labor feito en materia de investigación e innovación nos últimos anos e sumalo ao das universidades, consolidando un ecosistema de I+D+i que repercuta do xeito máis directo posible na mellora integral de Galicia”, incidiu Román Rodríguez.
Estas son as dúas primeiras da rolda de visitas que vai realizar a Consellería aos centros tecnolóxicos de Galicia para coñecer o seu labor e potencialidades, de cara a un maior aproveitamento das mesmas. Ademais de AIMEN e CTAG, forman parte desta rede a Asociación Nacional de Fabricantes de Conservas, Pescados e Mariscos (ANFACO-CECOPESCA), a Fundación Centro Tecnolóxico de Telecomunicación de Galicia (GRADIANT), a Fundación Instituto Tecnolóxico de Galicia (ITG), o Centro Tecnolóxico de Eficiencia e Sustentabilidade Enerxética (ENERGYLAB), o Centro Tecnolóxico de Investigación Multisectorial (CETIM), o Clúster de Acuicultura de Galicia (CETGA) e o Centro Galego de Investigacións da Auga (CETAQUA).
Información xeral Consellería de Educación, Ciencia, Universidades e Formación ProfesionalA Xunta reclama ao Ministerio o financiamento necesario para aplicar a nova normativa de FP, que esixe a contratación de máis profesorado
Summary:
A demanda exposta polo director xeral de Centros da Consellería na reunión da Comisión de Persoal da Conferencia Sectorial de Educación foi secundada pola inmensa maioría das comunidades autónomas de distinto signo político
Idioma GallegoA Xunta de Galicia vén de reclamar ao Ministerio de Educación que achegue o financiamento necesario para o desenvolvemento da nova normativa en materia de Formación Profesional, xa que esixe da contratación de máis profesorado técnico a partir do vindeiro curso.
Así o expuxo esta mañá o director xeral de Centros e Recursos Humanos, Jesús Álvarez, na reunión da Comisión de Persoal da Conferencia Sectorial de Educación, unha demanda que foi secundada pola inmensa maioría das comunidades autónomas de distinto signo político.
O representante da Consellería de Educación, Ciencia, Universidades e FP reivindicou a necesidade de que o Estado habilite “canto antes” unha partida específica para dar cumprimento aos requirimentos da nova lei de FP como é o incremento do profesorado.
Outra das peticións elevadas polo Goberno galego foi o de que o Ministerio permita que o profesorado con nivel de inglés B2 ou superior poida impartir inglés técnico, un compromiso que mesmo manifestou no seu momento o departamento ministerial, pero que agora non figura nos borradores dos reais decretos.
Queixas polo retraso nos prazosAsí mesmo, Jesús Álvarez aproveitou a reunión para denunciar, de novo, o retraso do Ministerio na publicación da normativa de desenvolvemento da nova lei de FP, “cuns borradores de reais decretos que aínda non foron publicados e que seguen sen vir acompañados de memoria económica algunha”, así como a actitude “pouco dialogante” do Ministerio coas comunidades autónomas, que “nos vemos obrigadas a aplicar unha normativa imposta de xeito unilateral desde o Estado”.
Non obstante, e pese aos continuos retrasos, desde a Consellería de Educación estase traballando arreo na organización do vindeiro curso co obxectivo de blindar o modelo de calidade da FP galega e xerar certezas entre alumnos, docentes e centros.
Información xeral Consellería de Educación, Ciencia, Universidades e Formación ProfesionalA Xunta premia os Podcast sobre Luísa Villalta de centros educativos de Cedeira, A Estrada, Malpica, Santiago, O Rosal e Vigo
Summary:
A directora xeral de Ordenación e Innovación Educativa visita o Colexio CPI Manuel Suárez Marquier, no Rosal, que acada dous premios neste certame
A Radio Galega, que colabora no concurso, difunde os traballos premiados
Idioma GallegoA Xunta de Galicia vén de recoñecer o traballo de seis centros educativos cos premios do VI Concurso de Podcasts-Radio na biblio, que cada ano homenaxea ao autor ao que se lle dedica o Día das Letras Galegas e desta vez se centra na figura da escritora, filósofa, violinista e activista Luísa Villalta. A directora xeral de Ordenación e Innovación Educativa, Judith Fernández, visitou hoxe o Centro Público Integrado Manuel Suárez Marquier do Rosal, que obtén dous premios (na modalidade de 5º e 6º de Primaria e na de 1º e 2º de ESO) para felicitalos polo seu traballo.
Os proxectos galardoados abordan aspectos biográficos e bibliográficos da autora homenaxeada, como o estímulo da lectura da poesía, a relación da literatura e a música ou as mulleres nas Letras Galegas e na literatura galega, entre outros.
A relación de centros galardoados é a reflectida na seguinte táboa:
Modalidade
Provincia
Concello
Centro
Podcast
Ed. Infantil
A Coruña
Malpica de Bergantiños
CEIP Milladoiro
Xogando con violinos
1º e 2º de Ed. Primaria
A Coruña
Cedeira
CEIP Nicolás del Río
Luísa Villalta. Veladas poéticas
3º e 4º de Ed. Primaria
Pontevedra
A Estrada
CEIP do Foxo
Teoría do xogo
5º e 6º de Ed. Primaria
Pontevedra
O Rosal
CPI Manuel Suárez Marquier
Luísa Villalta. Poesía e música
1º e 2º de ESO
Pontevedra
O Rosal
CPI Manuel Suárez Marquier
Mulleres no Día das Letras Galegas
3º e 4º de ESO
A Coruña
Santiago de Compostela
IES Arcebispo Xelmírez I
Luísa Villalta
Bacharelato
A Coruña
Santiago de Compostela
IES Arcebispo Xelmírez I
Luísa Villalta
Outras ensinanzas
Pontevedra
Vigo
CMUS Profesional de Vigo
Scherzo_RAP
Cada centro premiado recibe un premio de 1.250€, un 25% máis ca o ano pasado, que deberán destinarse a melloras na radio escolar ou actividades relacionadas ca mesma. A Radio galega colabora, un curso máis, neste certame. Deste xeito, os traballos premiados serán difundidos a través da páxina web da Radio Galega e na plataforma dixital A Galega Audio. Ademais, o alumnado galardoado terá a oportunidade de visitar as instalacións da Radio Galega en Santiago de Compostela.
O concurso está dirixido aos 195 centros públicos participantes no programa Radio na Biblio, da Consellería de Educación, Ciencia, Universidades e FP, así como outros centros que traballan xa co laboratorio de radio como ferramenta pedagóxica, e enmárcase no Plan LÍA (Lectura, Información e Aprendizaxe) 2021/2025 de Bibliotecas Escolares.
Información xeral Consellería de Educación, Ciencia, Universidades e Formación ProfesionalA Consellería de Educación impulsará a FP Dual no Instituto de Valga con novos proxectos para o vindeiro curso
Summary:
A directora xeral de FP, Eugenia Pérez, visita o centro para avanzar sobre estas novas colaboracións
Idioma GallegoA directora xeral de FP, Eugenia Pérez, visitou hoxe o Instituto IES Plurilingüe de Valga, do que destacou a súa aposta pola FP Dual, modalidade na que desenvolve un proxecto no ciclo de grao medio en Soldadura e caldeiraría. “Xa temos varias colaboracións avanzadas para iniciar novos proxectos de Dual para o vindeiro curso, que poderemos concretar nas próximas semanas e que supoñen un importante incremento da oferta respondendo ao tecido produtivo da zona”, explicou.
A representante da Consellería de Educación, Ciencia, Universidades e FP salientou tamén o labor do centro á hora de achegar unha ampla oferta de ciclos formativos ao rural. Neste sentido, puxo en valor a especialización deste centro na familia profesional da Fabricación mecánica, da que imparte tanto o ciclo básico en Fabricación e montaxe como o medio de Soldadura e caldeiraría e o superior de Construcións metálicas.
Durante a súa visita, a directora xeral coñeceu o funcionamento das aulas de Agroxardinaría, das zonas de cultivo e dos talleres de Fabricación mecánica.
Información xeral Consellería de Educación, Ciencia, Universidades e Formación ProfesionalA Xunta inxecta case 2M€ no Centro Interdisciplinar de Química e Bioloxía, CICA, tras a súa incorporación á Rede de Investigación de Excelencia de Galicia
Summary:
O secretario xeral de Universidades, José Alberto Díez, visita este centro da Universidade da Coruña centrado na biomedicina, a nanociencia e a alimentación
Idioma GallegoA Xunta de Galicia vai inxectar preto de 2M€ no Centro Interdisciplinar de Química e Bioloxía, CICA, da Universidade da Coruña, tras a súa incorporación á Rede de Investigación de Excelencia de Galicia, que aglutina os axentes investigadores máis punteiros que operan nas universidades galegas.
O secretario xeral de Universidades, José Alberto Díez de Castro, visitou esta mañá o centro para coñecer de primeira man as principais liñas de investigación que está liderando así como para explicar o apoio da Consellería de Educación, Ciencia, Universidades e Formación Profesional enfocado a blindar un financiamento estable da súa actividade científica ata o ano 2027.
Nesta aposta estratéxica por seguir impulsado a investigación científica de calidade como piar de desenvolvemento socioeconómico, o Goberno galego vén de incrementar un 31%, ata acadar os 23,6M€, o orzamento destinado á Rede de Centros de Investigación Universitaria de Galicia, que agora incorporar cinco novos centros á mesma, dous na máxima categoría, como é o caso do CICA, e tres na nova categoría de colaboradores, que aspiran a entrar nos vindeiros anos e que tamén recibirán financiamento autonómico.
Ese apoio consolida o modelo galego de investigación universitaria, que sitúa a Galicia entre as cinco mellores autonomías do Estado en apoio á actividade investigadora. De feito, é a única Comunidade cun programa completo de formación investigadora, é dicir, para as etapas predoutoral e posdoutoral, e cun programa de retención de talento.
Biomedicina, nanociencia e alimentaciónO Centro Interdisciplinar de Química e Bioloxía, CICA, iniciou o seu funcionamento en 2015 na Universidade da Coruña tras concentrar unha serie de grupos de investigación de química e bioloxía en expansión naquel momento e comprometidos coa transferencia de coñecemento e innovación á sociedade.
Na actualidade conta con 94 investigadores adscritos que centran a súa axenda científica nos eidos da biomedicina, a nanociencia e a alimentación. No primeiro dos campos, as súas liñas de investigación prioritarias céntranse en traducir os resultados da investigación básica en aplicacións médicas para a neurociencia, as enfermidades infecciosas e crónicas, a medicina rexenerativa e o envellecemento.
Na área da nanociencia e materiais avanzados, os científicos ocúpanse do deseño, preparación e caracterización de compostos, a súa avaliación biolóxica para ser utilizadas no estudo de procesos biolóxicos e o desenvolvemento de ferramentas biomédicas, ou ben para abordar novos retos industriais.
Os grupos de traballo da área da alimentación, contaminación e saúde estudan a incidencia da contaminación, a xestión da auga, o cambio climático e a alimentación na saúde humana, entre outros.
Información xeral Consellería de Educación, Ciencia, Universidades e Formación ProfesionalA apertura do QMIO á comunidade científica atraerá talento e investimentos a Galicia e promoverá o seu liderado no eido da computación cuántica
Summary:
O conselleiro de Educación, Ciencia, Universidades e FP, Román Rodríguez, visita o Centro de Supercomputación de Galicia coincidindo coa publicación do protocolo de acceso ao computador cuántico
“Vai redundar nunha aceleración da economía e na transferencia a aplicacións prácticas cunha gran repercusión empresarial e social” destaca o conselleiro
Idioma GallegoO conselleiro de Educación, Ciencia, Universidades e FP, Román Rodríguez, visitou esta mañá o Centro de Supercomputación de Galicia (CESGA) coincidindo coa apertura á comunidade científica do uso do novo computador cuántico QMIO. O responsable do departamento de Ciencia da Xunta sinalou este paso como “un fito que vai atraer talento e investimentos e vai promover o liderado de Galicia no eido da computación cuántica”.
Neste sentido, destacou que a nosa Comunidade parte coa vantaxe de contar desde outubro co QMIO, o primeiro computador cuántico deste tipo instalado en España e o que conta con máis cúbits do Sur de Europa nunha institución pública. Esta infraestrutura supuxo un investimento por parte da Xunta de Galicia de case 14M€, como explicou o conselleiro, que estivo acompañado da directora xeral da Axencia Galega de Innovación, Carmen Cotelo, e do director do CESGA, Lois Orosa.
“Trátase dun potentísimo recurso que hoxe poñemos a disposición do ecosistema de I+D+i, principalmente o galego pero tamén de toda España, e que vai repercutir nun beneficio para practicamente todos os sectores económicos”, explicou o conselleiro. Non en balde, a computación cuántica pode aplicarse á farmacoloxía, medicina, loxística ou química, polo que vai permitir descubrir novos medicamentos, crear novos algoritmos de diagnose de enfermidades, optimizar os procesos de produción ou descubrir novos materiais, entre outros logros.
“O novo protocolo de acceso ao QMIO vai redundar, polo tanto, nunha aceleración da economía de Galicia e na transferencia do coñecemento a aplicacións prácticas que van ter unha gran repercusión a nivel empresarial e social”, resaltou Román Rodríguez.
A iniciativa enmárcase no Polo de Tecnoloxías Cuánticas de Galicia, no que se levan investidos 30M€ e que xa xeraron unha trintena de empregos directos de alta cualificación en Galicia. De feito, espérase un incremento nos próximos anos debido a os proxectos que captarán os investigadores.
Protocolo de acceso
O QMIO será accesible de xeito gratuíto desde hoxe á investigación e desenvolvemento que se faga nas universidades, nos centros de investigación, centros tecnolóxicos e empresas, tanto a nivel de Galicia como nacional, fomentando a colaboración entre investigadores da nosa Comunidade e de toda España. De feito, con carácter xeral, os centros de investigación nacionais terán acceso na medida en que colaboren con entidades de investigación galegas.
Rexerase a través dun protocolo que establece catro tipos de acceso: a través da Rede Española de Supercomputación (RES), acceso aberto, acceso reservado para o CESGA e acceso con fins educativos. O primeiro deles canalizarase a través dos protocolos da Rede Española de Supercomputación (RES) da que o CESGA é un nodo. Neste caso, o CESGA achegará o 20% do tempo dispoñible do ordenador cuántico á RES, quen asignaría os recursos a través dos protocolos definidos para tal efecto na RES.
No caso do acceso aberto, canalizarase a través dos trámites e convocatorias abertos polo propio CESGA. Dentro do tipo de acceso libre distínguense dous tipos de actividades, as de curto alcance (pequenos proxectos exploratorios ou probas) e as de medio e longo alcance (proxectos con necesidades grandes de recursos priorizados, con fins científicos específicos e preparados para a súa execución inmediata).
O terceiro tipo de acceso está reservado para o persoal do CESGA, que na actualidade conta cun grupo de investigación en Computación Cuántica composto por 11 persoas. En concreto poderá usarse para proxectos nos que participe o centro e para convenios específicos de colaboración con fins de investigación ou desenvolvemento tecnolóxico con outras institucións. Tamén se inclúen nesta categoría os proxectos de carácter estratéxico que considere.
Finalmente, o protocolo contempla o acceso para actividades educativas dirixidas á xeración de talento en computación cuántica realizadas por universidades galegas, centros de investigación galegos ou o CSIC, onde se dará prioridade a iniciativas que forman parte dos traballos fin de grao e fin de mestrado.
Información xeral Consellería de Educación, Ciencia, Universidades e Formación Profesional
- « primeira
- ‹ anterior
- …
- 5
- 6
- 7
- 8
- 9
- 10
- 11
- 12
- 13
- seguinte ›
- última »
![IES David Buján lector de novas - departamentos Distribuir contido](/centros/iesdavidbujan/misc/feed.png)