departamentos
Román Rodríguez anima aos alumnos máis excelentes da ABAU a apostar pola universidade pública galega, gratuíta e con titulacións variadas e de calidade
Summary:
Gaba o esforzo e sacrificio destes estudantes que “son un orgullo para Galicia” e representan a variedade de centros educativos que existen entre o rural e urbano
Lembra que serán a primeira xeración que van poder completar os seus estudos universitarios cen por cen gratuítos
Agradece o labor dos profesores por “inculcar paixón” aos seus alumnos así como o apoio constante das familias, que non terán que desembolsar matrícula o próximo ano
Destaca o espírito de cooperación das tres universidades públicas, que contan co apoio da Xunta cun financiamento estrutural estable e unha oferta ampla e innovadora
Idioma GallegoO conselleiro de Educación, Ciencia, Universidades e Formación Profesional, Román Rodríguez, anima aos alumnos máis excelentes da ABAU a que continúen a súa etapa formativa nas universidades públicas galegas, que destacan pola ampla e variada oferta de titulacións, pola súa calidade académica e que, ademais, a partir do próximo curso “avanzamos un novo chanzo no apoio ás familias coa matrícula gratuíta para os estudos de grao”.
Así o sinalou esta mañá na Coruña ante un aforo de máis de 4.000 asistentes entre alumnos e familias, nun acto no que se recoñece a un milleiro de estudantes cos mellores expedientes da ABAU en 2024. O evento, organizado pola Universidade da Coruña, contou coa presenza dos reitores Antonio López (USC), Manuel Reigosa (UVigo) e Ricardo Cao (UDC), e ao que tamén asistiu a delegada territorial da Xunta na Coruña, Belén do Campo.
Román Rodríguez gabou o seu “sacrificio, dedicación, esforzo e constancia” na recta final de Bacharelato así como o “apoio imprescindible e a transmisión de valores” das súas familias para acadar “un rendemento académico de excelencia que vos fai ser un orgullo para Galicia”. “Ademais seredes a primeira xeración de estudantes que ides poder completar os vosos estudos universitarios cen por cen gratuítos”, explicou en referencia á nova medida da Xunta de implantación da matrícula de balde a partir deste próximo curso.
O conselleiro tamén tivo palabras de agradecemento para o profesorado galego polo seu labor de “impulso e orientación”, pola súa “paixón polo seu propio traballo” e por ser capaces de “inculcar esa paixón” aos seus alumnos.
En Galicia superaron a ABAU case 11.000 estudantes, un 96% dos presentados, procedentes de 237 centros que representan a variedade do sistema educativo entre os do rural e do urbano. Neste senso, Román Rodríguez salientou a aportación dos alumnos de alto rendemento ao o sistema educativo galego como “un modelo de éxito” que é referente a nivel estatal en canto a resultados, inclusión e innovación.
No que atinxe ao ámbito estritamente universitario, o representante da Xunta destacou o espírito de cooperación das tres universidades públicas, que contan co apoio reforzado da Xunta cun financiamento estrutural estable e unha oferta ampla e innovadora.
Información xeral Consellería de Educación, Ciencia, Universidades e Formación Profesional
Xunta e sindicatos constitúen a Comisión Negociadora do Plan de Igualdade para o persoal docente
Summary:
É o punto de partida para a redacción deste documento para avanzar na eliminación de calquera tipo de discriminación neste ámbito laboral
Idioma GallegoO director xeral de Centros e Recursos Humanos, Jesús Álvarez, reuniuse hoxe coas organizacións sindicais da mesa sectorial do ensino para constituír a Comisión Negociadora do Plan de igualdade para o persoal docente. É o punto de partida para a redacción deste documento para avanzar na eliminación de calquera tipo de discriminación neste ámbito laboral.
A comisión ten entre as súas funcións a negociación e elaboración da diagnose e das medidas que integrarán o Plan de igualdade, a identificación das medidas prioritarias, os ámbitos de aplicación e os medios materiais e humanos necesarios para a súa implantación. Así mesmo, impulsará accións de información e sensibilización para a igualdade de trato e oportunidades entre mulleres e homes.
Entre outros eidos, abordaranse as accións necesarias para garantir a igualdade de oportunidades nos procesos de selección e contratación, clasificación profesional, formación, condicións e valoración de postos de traballo.
Así mesmo, promoverase o exercicio corresponsable dos dereitos da vida persoal, familiar e laboral, a prevención de condutas contra a liberdade sexual e a integridade moral no traballo e impulsaranse as medidas de prevención e actuación en caso de violencia de xénero, entre outras.
Información xeral Consellería de Educación, Ciencia, Universidades e Formación Profesional
Román Rodríguez subliña a competitividade e capacidade de Galicia para captar fondos de I+D+i
Summary:
As entidades galegas recibiron apoio a 308 proxectos de I+D+i por parte deste ente estatal nos últimos cinco anos, o que permitiu mobilizar 186 millóns de euros
Idioma GallegoO conselleiro de Educación, Ciencia, Universidades e FP, Román Rodríguez, clausurou esta mañá a xornada de presentación dos instrumentos de financiamento da I+D+i a nivel estatal e autonómico, unha cita organizada conxuntamente, en Santiago de Compostela, polo Centro para el Desarrollo Tecnológico e Innovación (CDTI) e a Axencia Galega de Innovación.
Román Rodríguez, que estivo acompañado pola directora da Axencia, Carmen Cotelo, puxo de relevo a competitividade e capacidade dos axentes galegos da I+D+i para captar fondos a nivel nacional e internacional, como demostran os 308 proxectos apoiados por CDTI en Galicia nos últimos cinco anos, que permitiron mobilizar 186M€. O conselleiro apuntou que para iso é esencial que as administracións de todos os niveis incentiven a cultura innovadora e apoien a I+D+i no tecido produtivo de xeito coordinado.
Neste punto, o titular de Educación e Ciencia agradeceu a colaboración do CDTI, principal organismo a nivel estatal encargado do fomento da I+D+i empresarial, co que a Xunta de Galicia mantén un convenio de colaboración desde 2007 co obxectivo de ampliar as oportunidades de financiamento das entidades galegas e mellorar a complementariedade entre as diferentes axudas.
Información xeral Consellería de Educación, Ciencia, Universidades e Formación ProfesionalA Xunta crea un novo ciclo de formación profesional básica no IES Xelmírez I a través do plan FP360
A directora xeral de FP, Eugenia Pérez, visitou hoxe o Instituto IES Arcebispo Xelmírez I co gallo da implantación dun novo ciclo de FP Básica o vindeiro curso. En concreto, trátase do ciclo de Acceso e conservación en instalacións deportivas, que ofertará un total de 18 prazas de novo ingreso. Esta novidade complementa o ciclo de Informática de Oficina, que xa se impartía no centro.
A FB Básica é unha aposta fundamental da Xunta de Galicia, que o vindeiro curso porá en marcha o Plan FPGal360 de orientación profesional integral, aprobado esta semana e dotado con 24 M€ ata 2028. O programa conta cun dobre obxectivo: reducir a taxa de abandono escolar e atraer de novo ao sistema educativo a aquelas persoas con baixa cualificación co fin de enriquecer a súa formación e xerar oportunidades profesionais.
Información xeral Consellería de Educación, Ciencia, Universidades e Formación ProfesionalXunta e Concello de Ames avanzan na planificación do novo colexio de Milladoiro, cuxa obra está previsto licitar en xullo
Summary:
Román Rodríguez e Blas García manteñen unha xuntanza de traballo para coordinar as actuacións que a Xunta de Galicia realizará no Concello de Ames
A Administración autonómica está a investir actualmente máis de 13,5M€ na mellora de infraestruturas educativas en Ames
Idioma GallegoO conselleiro de Educación, Ciencia, Universidade e FP, Román Rodríguez, e o alcalde de Ames, Blas García, mantiveron esta mañá unha reunión de traballo en San Caetano para abordar a planificación da construción do novo Colexio CEIP de Milladoiro. No encontro tamén participaron a concelleira de Educación, Carmen Porto, e o secretario xeral técnico da Consellería, Manuel Vila.
Esta reunión ten lugar co propósito de coordinarse Xunta de Galicia e Concello de Ames para afrontar as tres grandes actuacións que se están a facer no municipio, comezando pola nova infraestrutura na que o Goberno galego investirá 10,1 millóns de euros.
Román Rodríguez trasladoulle ao rexedor e á concelleira que o departamento autonómico ten previsto licitar a obra no próximo mes de xullo, coa estimación de poder iniciar os traballos a principios de 2025 e que o novo colexio estea operativo no inicio do curso 26/27.
O centro, que acollerá a 450 alumnos e permitirá atender as necesidades educativas dunha poboación en aumento, será o primeiro colexio construído en base ás pautas establecidas no Plan de Nova Arquitectura Pedagóxica que deseña espazos educativos máis abertos, flexibles, sustentables, intelixentes e integrados na contorna.
As tres actuacións que a Consellería está a realizar no Concello de Ames acadan un investimento de máis de 13,5M€. Entre estas obras cómpre destacar a ampliación do Colexio CEIP Agra do Muíño, por 3,3M€, cuxas obras van por bo camiño, cun 65% das mesmas xa executadas. Está tamén a piques de comezar a execución do cambio de cuberta do Colexio CEIP de Barouta, no que o Executivo autonómico inviste 150.000 euros. En ambos casos, a previsión é que en setembro estean as obras rematadas.
García puxo enriba da mesa a posibilidade de conveniar coa Xunta de Galicia o uso dos espazos educativos, cando non estean prestando servizo aos centros, para así aproveitar ao máximo as instalacións.
Información xeral Consellería de Educación, Ciencia, Universidades e Formación ProfesionalA Xunta remite aos sindicatos as instrucións transitorias para regular a FP o próximo curso, á espera da normativa definitiva do Ministerio
Summary:
O documento ten como obxectivo dar certezas a centros, docentes e alumnos diante do retraso do Goberno central
A Xunta segue traballando na elaboración do decreto galego de ordenación da FP e o seu desenvolvemento, que non se poderá concretar ata que se publique o estatal
Idioma GallegoA Consellería de Educación, Ciencia, Universidades e FP remite hoxe ás organizacións sindicais as instrucións sobre a ordenación e a organización da Formación Profesional para o vindeiro curso en Galicia. Trátase dunha normativa que se aplicará ao vindeiro ano académico e que ten por obxectivo dar certezas a centros, profesorado e alumnado diante da aplicación da nova lei estatal de FP a partir de setembro e os cambios que leva consigo a nivel de formación práctica ou modificación de módulos formativos. Para a súa elaboración contouse coa colaboración de varios grupos de traballo conformados por 300 docentes.
As instrucións teñen carácter transitorio, dado que a ordenación debe ser regulada por un novo decreto que a Xunta está xa a preparar. De feito, iniciou os trámites preceptivos en xaneiro. Porén, o retraso acumulado de meses por parte do Ministerio á hora de publicar a normativa estatal (en concreto a modificación do Real Decreto 659/2023 polo que se desenvolve a ordenación do Sistema de Formación Profesional), impide que o Goberno galego poida tramitar o decreto autonómico, dado que os seus detalles dependen do que o Ministerio estableza no real decreto nacional.
Deste xeito, as instrucións aplicaranse a partir de setembro ao primeiro curso dos ciclos formativos da oferta ordinaria, modalidade presencial e réxime xeral (é dicir, non inclúe nin a oferta modular nin a FP Dual intensiva) e aos cursos de especialización ou másteres de FP, segundo o calendario establecido polo Ministerio. Farase así unha transición progresiva que permita blindar o modelo de éxito da FP galega que leva funcionando 15 anos e que fai de Galicia un referente neste ámbito.
Novos módulosEntre outros pormenores, as instrucións establecen os novos módulos que se incorporan no primeiro curso da oferta ordinaria e os seus currículos. Isto é, os módulos profesionais de Itinerario persoal para a empregabilidade I (Itinerario persoal para a empregabilidade no caso da FP de grao básico), de Sustentabilidade aplicada ao sistema produtivo e de Inglés Profesional. Así mesmo, e seguindo a normativa estatal, elimínase o módulo de Formación e orientación laboral.
Precisamente a distribución horaria do primeiro curso da oferta ordinaria e os currículos e contidos dos novos módulos constitúen unha das principais áreas arredor da que desenvolveron o seu labor os devanditos grupos de traballo. Isto permitiu elaborar un documento que recolle a organización dos módulos de primeiro curso para cada ciclo e os períodos semanais, que serven como orientación aos centros educativos.
Formación prácticaNo referido á formación práctica, os ciclos poderán incorporar no primeiro curso un período de formación na empresa ou no organismo equiparado como parte integrada do currículo dos módulos profesionais, sempre e cando se cumpran as condicións establecidas nas instrucións. Representará como máximo 80 horas nos ciclos de grao básico e 200 horas nos ciclos de grao medio e de grao superior.
A fase de formación na empresa será determinada por cada centro en función das características da oferta formativa, das particularidades dos sectores produtivos ou da dispoñibilidade de postos formativos e das condicións do alumnado. En todo caso, a formación non realizada na empresa, por non se dar as características, será desenvolvida no centro.
Información xeral Consellería de Educación, Ciencia, Universidades e Formación ProfesionalRomán Rodríguez agradece á inspección educativa o seu labor logo duns anos esixentes pola covid e a LOMLOE
O conselleiro de Educación, Ciencia, Universidades e FP, Román Rodríguez, inaugurou hoxe as III Xornadas de Formación da Inspección Educativa, ocasión que aproveitou para agradecer aos profesionais desta función pública o seu labor, especialmente logo duns anos esixentes nos que foi preciso xestionar a crise sanitaria derivada do covid-19 e a implantación da nova lei educativa estatal LOMLOE. Acompañado pola directora xeral de Ordenación e Innovación Educativa, Judith Fernández, referiuse tamén ao retos actuais e futuros, entre eles a aplicación do marco normativo da FP, o desenvolvemento do acordo de mellora do sistema educativo ou as novas realidades derivadas do uso da intelixencia artificial.
As xornadas contan coa intervención de distintos responsables da Xunta como Manuel Ángel García, xerente de proxectos de educación da Axencia para a Modernización Tecnolóxica de Galicia; Sonia Torres, xefa do Servizo de Ordenación Educativa, ou Jesús Manuel Rodríguez Buján, subdirector xeral de Cualificacións, Planificación e Xestión da FP. Ademais, completan o panel de expertos desta cita o profesor do Departamento de Psicoloxía Evolutiva e Comunicación da Universidade de Vigo Joaquín Dosil, e Ana López-Suevos, xuíza titular do Xulgado de Instrución Nº1 de Santiago de Compostela.
Información xeral Consellería de Educación, Ciencia, Universidades e Formación ProfesionalOs premios Innovagal recoñecen o labor dos centros de Outes, Cerceda, Vilanova, Zas, Tui, Monfero, Vigo e Celanova a prol da innovación educativa
Summary:
O obxectivo é poñer en valor os centros que desenvolven enfoques didácticos para dar reposta ás necesidades particulares do seu alumnado
“Os premios son mostra de que en Galicia hai un sistema equitativo que xera igualdade de oportunidades entre os centros, sen importar na zona na que se atopen”, destaca o conselleiro
Idioma GallegoO conselleiro de Educación, Ciencia, Universidades e FP, Román Rodríguez, acompañado pola directora xeral de Ordenación e Innovación educativa, Judith Fernández, presidiu hoxe a entrega de premios Innovagal que distinguen as boas iniciativas no ámbito da innovación Educativa.
O titular do departamento educativo galego puxo en valor a importancia do galardón no fomento da creatividade como unha poderosa ferramenta para afrontar os retos futuros. Os premios teñen como obxectivo mellorar e perfeccionar o progreso do alumnado galego. De esta maneira, tamén se consegue o avance da sociedade no seu conxunto.
No acto, entregáronse os galardóns nas dúas categorías de participación: premios para os centros que imparten Educación Infantil e para os de Secundaria e de adultos. Durante a xornada, o titular do departamento educativo galego quixo destacar a variedade xeográfica dos centros, que é “mostra de que en Galicia hai un sistema equitativo que xera igualdade de oportunidades entre os centros, sen importar na zona na que se atopen”, destaca o conselleiro.
Na primeira modalidade, o gañador é o Colexio CEIP Plurilingüe de Outes, segundo o Colexio CEIP de Viñagrande-Deiro (Vilanova de Arousa), terceiro o Colexio CEIP Plurilingüe nº1 (Tui) e a mención de honra para o Colexio CEIP Plurilingüe da Carrasqueira (Vigo).
No caso da segunda categoría, para centros de Secundaria e de adultos, o primeiro premio é para o Colexio O Cruce (Cerceda), o segundo para o Instituto IES Maximino Romero de Lema (Zas), o terceiro para o Colexio CPI Plurilingüe Virxe da Cela (Monfero) e a mención de honra para o Instituto IES Celanova Celso Emilio Ferreiro (Celanova).
Premio
Categoría A
Categoría B
1º
CEIP Plurilingüe de Outes
CPI Plurilingüe O Cruce
2º
CEIP de Viñagrande-Deiro
IES Maximino Romero de Lema
3º
CEIP Plurilingüe de Nº1
CPI Plurilingüe Virxe de Cela
Mención de honra
CEIP Plurilingüe de Carrasqueira
IES Celanova Celso Emilio Ferreiro
Os primeiros premios están dotados con 10.000€, os segundos con 6.000€, os terceiros con 3.000€ e as mencións de honra con 1.000€. Ademais da dotación económica do galardón, os centros vencedores reciben o distintivo de Centro educativo Innovagal, cunha vixencia de catro cursos escolares.
Aposta polo medioambiente, o benestar e os proxectos STEMO primeiro premio da modalidade A é para o Colexio CEIP Plurilingüe de Outes. O centro aposta por fomentar o benestar emocional do alumnado e a sostibilidade. Tendo isto en conta, emprega unha metodoloxía de aprendizaxe activa e dinámica, centrada no respecto ao medio ambiente de forma transversal.
Pola súa banda, o gañador da segunda categoría é o Colexio CPI Plurilingüe O Cruce. O centro desenvolveu un proxecto de innovación cunha forte aposta polas accións STEM relacionadas coa defensa do medio ambiente. As actividades fomentan o coñecemento da contorna e a conservación da natureza.
Os centros Colexio CEIP de Viñagrande-Deiro e o Instituto Maximino Romero reciben o segundo galardón das dúas modalidades. A escola creou espazos e dinámicas que respectan a infancia, potenciando a autonomía, a intelixencia emocional, a comunicación asertiva e o pensamento diverxente. Pola súa parte, o instituto centrou o seu proxecto innovador na posta en marcha de proxectos STEM a través do Club de Ciencia e dos Polos Creativos. Ambas institucións melloran o rendemento académico e a motivación dos estudantes.
O Colexio CEIP Plurilingüe nº1 recibe o terceiro premio por fomentar a creatividade e a tecnoloxía para conseguir o cambio metodolóxico, que inclúe melloras como a docencia compartida, as parellas pedagóxicas e o traballo por ámbitos que redundan en beneficio de todo o alumnado. Pola súa banda, o CPI Plurilingüe Virxe de Cela tamén é galardoado con este premio polo proxecto MonferoSolidario, que ten como obxectivo mellorar a calidade educativa e dar respostas ás necesidades identificadas polo claustro.
As mencións de honras son para o Colexio CEIP Plurilingüe da Carrasqueira e o Instituto IES Celanova Celso. A escola de Vigo fomenta unha metodoloxía de ensinanza inclusiva, a través do traballo en equipo e a formación do profesorado neste ámbito. Este centro, durante os últimos cursos, puxo en marcha pedagoxías activas (consello de nen@s, comisión de patios) e manipulativas que favorecen unha aprendizaxe por competencias.
O Instituto IES Celanova Celso Emilio Ferreiro parte da súa localización para desenvolver o proxecto Arredor do Mosteiro, que xira en torno a posta en valor do patrimonio e a optimización dos espazos. A iniciativa abre o centro á contorna a través de diferentes actividades como charlas, concertos ou obradoiros.
Información xeral Consellería de Educación, Ciencia, Universidades e Formación ProfesionalRomán Rodríguez reúnese coas organizacións sindicais para abordar o desenvolvemento da lexislatura en materia educativa
Summary:
O conselleiro mantén ao longo deste mércores reunións de traballo con representantes de CIG Ensino, CCOO Ensino, Anpe e UGT Ensino
Idioma GallegoCon motivo do inicio da lexislatura, a Xunta de Galicia aborda con todas as organizacións sindicais con representación na Mesa Sectorial Docente distintas cuestións e retos de futuro a abordar en materia educativa neste período. Neste contexto, o conselleiro de Educación, Ciencia, Universidades e Formación Profesional, Román Rodríguez, mantivo ao longo do día de hoxe encontros con representantes de cada unha das organizacións, CIG Ensino, CCOO Ensino, Anpe e UGT Ensino, para analizar o panorama escolar galego ao longo dos vindeiros anos en xeral e o inicio do vindeiro curso 24-25 en particular.
Neste senso, o conselleiro explicoulles que o seu departamento está traballando para continuar avanzando nun sistema educativo de calidade e innovador, avalado polo resultados, que siga sendo un referente en materia de inclusión e convivencia, con accións para o conxunto do sistema, tanto para o alumnado como para o profesorado.
Entre elas atópase o acordo de melloras estruturais asinado o pasado mes de outubro para blindar a estrutura do sistema e sentar as bases do ensino da vindeira década. Neste acordo inclúense numerosas medidas de calado como a baixada de rateos, de implantación progresiva e que se materializará, xa desde setembro, a partir de 4º de Educación Infantil, e outras como a mellora das condicións salariais, en marcha desde xaneiro pasado, ou a simplificación da carga administrativa nos centros escolares.
Información xeral Consellería de Educación, Ciencia, Universidades e Formación ProfesionalA Xunta felicita polo seu esforzo ao alumnado que se presenta ás probas para os Premios Extraordinarios de Bacharelato
A directora xeral de Ordenación e Innovación Educativa, Judith Fernández, visitou hoxe o o Centro Integrado FP CIFP Politécnico de Santiago co motivo da celebración das probas para a obtención dos Premios Extraordinarios de Bacharelato. Durante esta xornada, os aspirantes deben realizar unha proba que consiste nunha análise e comentario crítico dun texto sobre un tema de carácter xeral, histórico, filosófico, científico ou literario, e en responder cuestións de carácter cultural ou lingüístico sobre un texto na primeira Lingua Estranxeira II cursada polo alumnado como materia común.
Os centros que acollen a realización deste exercicio son o CIFP Universidade Laboral de Culleredo, CIFP Politécnico de Santiago, CIFP As Mercedes de Lugo, CIFP A Farixa de Ourense, CIFP A Xunqueira de Pontevedra e o IES Politécnico de Vigo.
Información xeral Consellería de Educación, Ciencia, Universidades e Formación ProfesionalA Xunta abre o prazo para que novos centros educativos se incorporen ao programa STEMbach que estrea novidades no vindeiro curso
Summary:
Por primeira vez, o alumnado que o supere verá recoñecido o mérito con créditos universitarios
Os centros interesados teñen ata o 1 de xullo para solicitar a súa adhesión
Idioma GallegoA Xunta vén de abrir o prazo para que os centros que o desexan poidan incorporarse ou continuar o vindeiro curso 2024/2025 no Bacharelato de excelencia en Ciencias e Tecnoloxía, STEMbach. Os interesados deberán solicitar a súa adhesión a este programa ata o día 1 de xullo. A directora xeral de Ordenación e Innovación Educativa, coincidindo coa nova convocatoria, visitou este martes o instituto IES As Lagoas.
A iniciativa, impulsada pola Consellería de Educación, Ciencia, Universidades e FP, enmárcase na Estratexia Educación Dixital, Edudixital 2030. O programa busca o desenvolvemento de competencias STEM a través de contidos curriculares asociados ao pensamento computacional e ás tecnoloxías inmersivas (como a realidade virtual e aumentada e a intelixencia artificial). Ademais, quere fomentar a vocación do alumnado cara á investigación científica e tecnolóxica, mediante unha metodoloxía que lle facilite a incorporación e adaptación á ensinanza universitaria. Con este fin, asinaranse convenios coas tres universidades públicas para reforzar a súa implicación no STEMbach.
O STEMbach ten unha duración de dous cursos académicos e pode incorporarse a el o alumnado de calquera das modalidade de Bacharelato. Os estudantes cursan, a maiores do currículo da modalidade na que estean matriculados, unha materia de afondamento relacionada co ámbito STEM extracurricular de dúas ou tres horas semanais. Ademais, deben realizar un proxecto de investigación e actividades complementarias de formación en colaboración coas universidades públicas de Galicia, entidades, organismos e persoas investigadoras de recoñecida competencia.
Ata seis créditos de libre configuración gratuítosA convocatoria deste ano inclúe novas medidas como o recoñecemento de créditos ECTS universitarios para o alumnado que participe neste programa educativo. Grazas a iso, os estudantes que superen o STEMbach e se matriculen posteriormente nalgunha das universidades públicas verá recoñecidos con créditos de libre configuración este mérito. En total, poderán obter 1,5 créditos ECTS por curso académico universitario e, ata un máximo de 6 créditos ECTS. Este feito será aplicable tanto para os estudantes desta convocatoria, como para o alumnado que titulou por primeira vez o programa no curso 2019/2020.
Recursos e difusión de boas prácticasO alumnado, para obter 1,5 créditos ECTS, debe participar no Programa Mentoring STEMbach de cada universidade. Esta novidade forma parte da estratexia do Goberno galego para reforzar o programa educativo, e inclúe accións como o recoñecemento aos mellores traballos de investigación realizados por estes estudantes en colaboración coa Universidade de Santiago de Compostela (USC), coa de Vigo (UVigo) e coa da Coruña (UDC).
A maiores, crearase a Rede STEMbach para impulsar o programa. Trátase dunha estrutura de apoio e reforzo aos axentes implicados na iniciativa con propostas que fomenten a colaboración. No que atinxe ao alumnado, terá preferencia para participar en determinadas accións específicas das universidades, ademais de obter os devanditos créditos de libre configuración de xeito gratuíto. Tamén se promocionará o seu traballo en feiras e publicacións científicas recoñecidas.
No caso dos docentes deste Bacharelato de excelencia, facilitaráselles o acceso ás instalacións e equipamentos do Centro de Innovación Educativa e Dixital para a investigación e creación de proxectos e poderán optar para iso a licenzas de formación. Tamén terán acceso a contidos específicos para o ensino das materias STEM e a un repositorio común de charlas relacionadas con estas disciplinas e difundirase o seu labor en publicacións científicas recoñecidas.
Ademais, organizaranse encontros que poñan en contacto ao profesorado e alumnado do programa para compartir experiencias, dificultades, vantaxes e procedementos de organización e desenvolvemento e farase un acompañamento do profesorado e alumnado desde a Consellería a través dun espazo virtual común con recursos STEM.
Compré lembrar que a Xunta de Galicia implantou o programa STEMbach por primeira vez no curso 2018/2019 e foise consolidando ata chegar a 45 centros e 741 alumnos matriculados no curso 2023/2024. Ao longo das distintas edicións máis de 1.000 estudantes xa titularon no programa. Ademais, teñen participado docentes tan prestixiosos como o xenetista e catedrático de Medicina Legal da USC, Ángel Carracedo.
Información xeral Consellería de Educación, Ciencia, Universidades e Formación ProfesionalCentros de FP de Vigo, A Coruña, Ferrol, Burela, Lugo, Monforte e Ourense proclámanse vencedores dos retos da primeira edición de Innovatech FP
Summary:
Os participantes tiveron que afrontar a solución de 10 retos tecnolóxicos presentados por distintas empresas referentes da nosa comunidade
Resultaron gañadores os centros integrados de FP Valentín Paz Andrade, Imaxe e Son, Ferrolterra, Portovello e Politécnico de Lugo, así como os institutos Politécnico de Vigo, A Sardiñeira, Perdouro e A Pinguela
Deron resposta aos retos propostos por Viaqua, Pérez Rumbao, Diesemm, Finsa, Aceites Abril, L’Oreal, elPulpo, Roberto Verino, Fundación San Rosendo e Naturgy
“As propostas premiadas neste acto son pioneiras e un exemplo do gran potencial que atesoura a nosa FP para contribuír a dar un salto de calidade tecnolóxico e innovador ao tecido produtivo galego”, destaca o conselleiro
Idioma GallegoO conselleiro de Educación, Ciencia, Universidades e FP, Román Rodríguez, acompañado pola directora xeral de FP, Eugenia Pérez, presidiu hoxe a entrega de premios da primeira edición do certame InnovaTech FP a centros de Vigo, A Coruña, Ferrol, Burela, Lugo, Monforte de Lemos e Ourense, un programa que sinalou como “revolucionario para o apoio da formación tecnolóxica e dixital dos futuros profesionais, ao tempo que redunda positivamente no tecido produtivo”.
O titular do departamento educativo galego explicou que o programa naceu este curso para poñer de manifesto a importancia de responder ás necesidades reais do tecido produtivo apoiándose na innovación tecnolóxica e no emprendemento, retando aos estudantes a resolver as propostas das empresas. “As propostas premiadas son pioneiras e un exemplo do gran potencial que atesoura a nosa FP para contribuír a dar un salto de calidade tecnolóxico e innovador ao tecido produtivo galego”, destacou.
Román Rodríguez puxo tamén en valor a importancia do Centro Galego da Innovación da FP Eduardo Barreiros como polo tractor das iniciativas xurdidas ao abeiro do programa. De feito, poranse a disposición do alumnado as instalacións e medios materiais humanos do centro para facilitar o desenvolvemento destes proxectos avanzados no eido tecnolóxico e industrial e a transferencia de coñecemento aos sectores produtivos.
Mellores proxectosInnovaTech FP dirixiuse a centros públicos de FP con dinámica de investigación, innovación e emprendemento, e que contan con viveiros de empresas ou aulas de emprendemento. Os participantes, organizados en equipos multidisciplinares e cunha distribución equitativa de xénero, tiveron que afrontar a solución de 10 retos tecnolóxicos presentados por distintas empresas referentes da nosa comunidade, e cuxas solucións deberán ter un impacto positivo no desenvolvemento do medio rural así como no fomento da igualdade de oportunidades entre homes e mulleres.
Os centros con iniciativas premiadas, dotadas cada unha con 10.000€ para o desenvolvemento do proxecto, son os que se reflicten na táboa. Entre os 10 centros premiados, seleccionouse a maiores ao CIFP Valentín Paz Andrade de Vigo en resposta ao reto plantexado por Viaqua, como premio especial.
Empresa
Reto
Centro gañador
Viaqua
Deseño dun sistema de autolimpeza para reixas de fosas sépticas de zonas rurais
CIFP Valentín Paz Andrade (Vigo)
Pérez Rumbao
Desenvolvemento de robots para o reparto de recambios en talleres de automoción
IES Politécnico de Vigo (Vigo)
Diesemm
Solución dixital para a optimización de experiencias en eventos deportivos
CIFP Imaxe e Son (A Coruña)
Finsa
Creación dun sistema de control de crecemento de especies forestais que permita a monitorización das condicións ambientais
CIFP Ferrolterra (Ferrol)
Aceites Abril
Sistema de medición rápida de graxas en pastas de refinado
IES A Sardiñeira (A Coruña)
L'Oreal
Solucións para a transformación de envases plásticos de produtos cosméticos en produtos duradeiros para salóns de peiteado
IES Perdouro (Burela)
elPulpo
Creación dunha colección téxtil reciclada
IES A Pinguela (Monforte)
Roberto Verino
Deseño dun sistema de análise para unha empresa téxtil que axude a optimizar propostas de colección e a medir a satisfacción do cliente
CIFP Portovello (Ourense)
Fundación San Rosendo
Desenvolvemento dun sistema tecnolóxico para o coidado activo e preventivo de persoas maiores
CIFP Politécnico de Lugo (Lugo)
Naturgy
Deseño de ferramentas para a detección de perdas de enerxía eléctrica para contribuír á súa redución
CIFP Valentín Paz Andrade (Vigo)
InnovaTech FP enmárcase na Estratexia de FP Galicia 2030 e no Plan Innova FP Galicia e desenvolverase entre o presente curso 2023-24 e o próximo 2024-25, ao longo dos cales mobilizaranse máis de 2.000 alumnos e 400 profesores de 100 centros de FP, o que suporá un investimento de 1,5M€ neste período. Nesta primeira edición participaron 85 centros e arredor de 800 alumnos.
Información xeral Consellería de Educación, Ciencia, Universidades e Formación ProfesionalO Informe PISA sitúa ao alumnado galego como o terceiro de España con máis pensamento creativo, por riba tanto da media estatal como dos países da OCDE
Summary:
Galicia é unha das catro comunidades españolas que superan os 34 puntos e que acceden ao nivel 4, no que están os países do mundo con mellores puntuacións
Esta competencia, avaliada en 4º de ESO, determina o grao de preparación do ensino para que os estudantes pensen de forma creativa en distintos contextos
Idioma GallegoO alumnado galego volve destacar en PISA e sitúase no grupo de cabeza de España con mellores resultados en pensamento creativo, segundo se desprende dos datos do informe español dado a coñecer hoxe.
Galicia obtén unha puntuación media de 34,3 puntos, 1,5 por riba da medida de España (32,8 puntos), 1,6 dos países da OCDE (32,7 puntos) e 2,2, da Unión Europea (32,1). No panorama español, a nosa Comunidade sitúase entre as tres onde se rexistraron mellores resultados, a tan só cinco décimas de Madrid, que encabeza o ránking con 34,8 puntos, e tres décimas de Castela e León, que ocupa a segunda posición con 34,6. Son, xunto a Asturias, as catro únicas autonomías que superan os 34 puntos, o que as sitúa no nivel 4, o mesmo no que se atopan os países con mellores puntuacións de todo o mundo.
Ademais, Galicia, xunto con Madrid e Castela e León, destaca tamén en dúas variables especialmente significativas cando se analizan os resultados con maior detalle. Por unha banda, son as tres comunidades con maior porcentaxe de alumnado en niveis altos de rendemento en pensamento creativo. E, por outra, son as que presentan menor porcentaxe de alumnado no nivel baixo, é dicir, os que non acadan o nivel básico.
Así pois, Galicia volve destacar unha vez máis nos resultados PISA, desta vez nunha nova variable que avalía a competencia en pensamento creativo dos estudantes de 15 anos de idade (4º de ESO) co obxectivo de determinar o grao de preparación dos sistemas educativos para que os estudantes pensen de forma creativa en distintos contextos.
Analizar ideas e obter bos resultadosA proba, que forma parte do conxunto das realizadas ao abeiro do Informe PISA 2022, explora ata que punto os alumnos poden xerar ideas diversas e creativas e avaliar e mellorar as ideas de outros para acadar resultados creativos. Para isto, os alumnos tiveron que desenvolver tarefas en catro áreas específicas que foron expresión escrita, expresión visual, resolución de problemas sociais e resolución de problemas científicos.
Tendo en conta a variable xénero, as diferenzas de rendemento de pensamento creativo é en todos os casos favorable ás mulleres, un comportamento que tamén se dá en Galicia, onde as mozas obteñen 2,2 puntos máis que os mozos, exactamente na mesma liña da media de España, e unha diferenza algo inferior aos 2,7 puntos da media da OCDE.
O mesmo acontece atendendo ao nivel socioeconómico, onde os estudantes de contextos favorables presentan un rendemento superior que os seus compañeiros de contextos desfavorecidos, aínda que está diferenza é máis atenuada en Galicia que no conxunto de España e da OCDE, dado que o galego é un dos sistemas educativos máis equitativos.
Información xeral Consellería de Educación, Ciencia, Universidades e Formación ProfesionalA Xunta inviste 115.000 € no proxecto de metaverso ‘Universo Uvigo’
Summary:
O secretario xeral de Universidades, José Alberto Díez, e o reitor, Manuel Reigosa, comproban o funcionamento do sistema, que afonda nas posibilidades do metaverso
Idioma GallegoO secretario xeral de Universidades, José Alberto Díez de Castro, e o reitor da Universidade de Vigo, Manuel Reigosa, comprobaron hoxe o funcionamento de UNIverso UVigo, o proxecto de metaverso impulsado pola universidade viguesa e que se presentou hoxe na Facultade de Comunicación do Campus de Pontevedra. A Xunta inviste 115.000€ nesta iniciativa.
En concreto, hoxe presentouse Simulacro, unha aplicación de realidade virtual inserida neste proxecto para a simulación de procesos de creación audiovisual. A través duns lentes de realidade virtual, permite o alumnado realizar labores de realización, dirección de fotografía e manexo de cámaras nun plató virtual.
O obxectivo de UniversoUVigo é afondar nas posibilidades do metaverso a través dun prototipo que albergará espazos de encontro, ensinanza e aprendizaxe. O plan piloto inclúe a virtualización de laboratorios para que poidan ser empregados por distintas titulacións para diferentes tarefas, o que evitaría ter que duplicar laboratorios idénticos, cun alto custo, dado que a virtualización permitiría o seu uso desde diferentes centros. Grazas ás ferramentas de software xeradas a través da iniciativa facilítase o traballo remoto a este entorno virtual desde terminais con prestacións limitadas.
54M€ desde 2019Tal e como explicou o representante da Consellería de Educación, Ciencia, Universidades e FP, o proxecto está cofinanciado polo Goberno galego a través dos convenios para o desenvolvemento de accións estratéxicas de I+D+i, “que constitúen unha das principais aposta da Xunta de Galicia para o fortalecemento do ecosistema de investigación nas universidades públicas”, afirmou. “Desde 2019, cando se creou esta liña de financiamento para accións estratéxicas de I+D+i, levamos investidos 54M€ nestes convenios”, salientou.
Información xeral Consellería de Educación, Ciencia, Universidades e Formación ProfesionalRueda anuncia para o vindeiro curso a posta en marcha do plan FPGal360, dotado con 24 M€ ata 2028, co obxectivo de reducir o abandono escolar e orientar profesionalmente á mocidade
Summary:
Destaca que a idea é “conseguir que o 100 % dos rapaces galegos sigan formándose ata, polo menos, cumprir os 18 anos”, así como “atraer de novo ao sistema educativo a persoas con baixa cualificación ou que queren mellorar a que teñen”
O plan inclúe máis de 60 medidas de actuacións dirixidas a alumnado e profesorado, así como para a poboación sen cualificación de entre 24 e 34 anos
Trabállase para reducir a cero a taxa de abandono temperá e que o 100 % dos rapaces sigan formándose ata, polo menos, cumprir a maioría de idade
Tamén se busca atraer de novo ao sistema educativo aquelas persoas con baixa cualificación co fin de enriquecer a súa formación e xerar oportunidades profesionais
Idioma GallegoO titular da Xunta, Alfonso Rueda, anunciou hoxe que a Xunta de Galicia porá en marcha o vindeiro curso o Plan FPGal360 de orientación profesional integral, dotado con 24 M€ ata 2028. Unha medida que, tal e como apuntou, conta cun dobre obxectivo: “conseguir que o 100 % dos rapaces galegos sigan formándose ata, polo menos, cumprir os 18 anos e atraer de novo ao sistema educativo a persoas con baixa cualificación ou que queren mellorar a que teñen”, sinalou.
Trátase por tanto, de reducir o abandono escolar na comunidade, a pesar de que Galicia está en “mínimos históricos” na taxa de abandono temperá (8,8%) - adiantándose sete anos ao obxectivo do 9 % fixado pola UE para 2030- fronte ao 13,6% do conxunto de España. “Queremos seguir avanzando e o ideal sería chegar á taxa de abandono escolar cero”, apuntou.
Neste sentido, o Consello da Xunta celebrado esta mañá aprobou o plan da Consellería de Educación, Ciencia, Universidades e Formación Profesional, consistente en 60 accións específicas, co fin de establecer un sistema integral de orientación profesional que guíe e acompañe á cidadanía na súa toma de decisións educativas e profesionais desde idades temperás e ao longo de toda a vida.
Así pois, mediante o FPGal360, a Xunta de Galicia ofrecerá unha orientación profesional integral que lles ensine ás persoas a planificar e tomar decisións sobre a súa vida laboral e a formación que implica.
Isto suporá implantar un conxunto de servizos dirixidos a axudar ás persoas de calquera idade -especialmente para os máis novos e persoas con baixa cualificación- e en calquera momento das súas vidas a tomar decisións axeitadas a nivel educativo, formativo e laboral, a xestionar a súa traxectoria profesional creando o seu itinerario formativo; a reflexionar sobre as súas ambicións e intereses e a súa cualificación e capacidade, e a comprender o funcionamento do mercado laboral.
Alfonso Rueda apuntou que as actuacións previstas no plan artéllanse en “tres eixos” que inclúen “o alumnado que está actualmente dentro do sistema educativo, uns 230.000; a mocidade que abandonou este sistema e que cómpre recuperar, uns 80.000 mozos de 24 a 34 anos con baixa cualificación; e a poboación en xeral que queira ampliar a súa formación para mellorar a súa inserción laboral”, sinalou.
Fomentar a continuidade na formaciónO primeiro dos eixos abrangue iniciativas concretas dirixidas a “fomentar a continuidade dos rapaces no ensino” e, deste xeito, reducir a mínimos o abandono escolar temperá. Isto é, que o alumnado perciba que continuar a súa formación dentro do sistema sexa unha oportunidade para unha mellor cualificación.
Para iso establécense catro liñas e 15 medidas entre as que destacan a elaboración de novos programas de orientación profesional e vocacional e de materiais de apoio á labor orientadora; o reforzo da FP básica coa actualización da oferta e a mellora de recursos; actuacións para reducir o abandono escolar nos colectivos máis desfavorecidos; impulso da formación especializada en orientación profesional, incidindo nas potencialidades da FP básica, e enquisas para alumnado e familias como ferramenta para a mellora da toma de decisións.
O segundo céntrase en “potenciar un sistema de orientación vocacional e profesional que conduza á inserción laboral efectiva”, a través de cinco liñas de actuación e 30 medidas específicas recollidas no plan. Entre elas destaca a creación do Espazo e da Rede FPOrienta, a difusión e promoción das novas tecnoloxías, innovación aplicada á orientación profesional e formación especializada en orientación profesional e vocacional, entre outros.
Itinerarios formativos atractivosO terceiro eixe do plan diríxese a “facilitar a cualificación e titulación da mocidade galega” desde o sistema educativo, con itinerarios atractivos e que supoñan unha porta profesional e persoal de futuro.
A través de catro liñas e 15 medidas impulsaranse a coordinación e colaboración entre os distintos axentes para a cualificación da poboación. Ademais, reforzarase a capacitación profesional a través do procedemento de acreditación de competencias profesionais, a orientación profesional nos centros de educación permanente de alumnos e o desenvolvemento de accións formativas especializadas que respondan ás demandas específicas do tecido produtivo.
Estes tres eixes desenvolveranse a través da colaboración público-privada, coa participación doutros departamentos da Xunta de Galicia, así como de asociacións e outras entidades implicadas na orientación profesional.
Entre as liñas de actuación globais, ao abeiro deste plan, a Consellería de Educación reforzará a información e formación dirixidas ao persoal orientador dos centros educativos e aos equipos directivos e docentes.
No caso do alumnado, incidirase en facilitar información e orientación ao alumnado desde idades temperás e deseñaranse actuacións específicas dirixidas ao alumnado vulnerable, con especiais necesidades de aprendizaxe ou en risco de abandono.
Recuperar a persoas que abandonaron o sistemaTamén se atenderá especificamente ao alumnado que abandonara o sistema educativo sen acadar unha titulación, co fin de recuperalos e darlle unha nova oportunidade de formación e, deste xeito, que melloren as súas oportunidades e expectativas laborais.
Outras liñas de traballo irán dirixidas a actuacións sobre a poboación que non conta con formación acreditada, con propostas específicas, sobre todo con especial atención á mocidade que se atope nesta situación.
O Plan FPGal360 recollerá tamén unha epígrafe de asesoramento personalizado e orientación profesional para colectivos de persoas desempregadas que participen en procesos de acreditación de competencias adquiridas por experiencia laboral.
No período de vixencia do plan, entre este ano e o 2028, o conxunto de medidas que se van poñer en marcha suporán un investimento global de 24 M€, nove dos cales se farán efectivos durante o presente exercicio 2024.
A posta en marcha deste plan enmárcase na Estratexia de formación profesional Galicia 2030, que ten entre os seus eixes a orientación profesional á cidadanía na creación dun itinerario personalizado de formación para o emprego e a difusión das oportunidades da formación, adquisición de competencias e recoñecemento delas.
Información xeral Consellería de Educación, Ciencia, Universidades e Formación ProfesionalA Xunta recoñece o traballo de centros de Abegondo, Santiago, Poio e Vigo en prol da igualdade co selo biblioteca escolar solidaria
Summary:
A directora xeral de Ordenación e Innovación Educativa, Judith Fernández entrega o recoñecemento ao Colexio CEIP Plurilingüe Seis do Nadal, de Vigo
Tamén se premian as experiencias de voluntariado de lectura de 10 centros de Carballo, Muros, Outes, Sober, O Irixo, Bueu, A Estrada, Ponteareas e Vilagarcía
A Consellería de Educación convoca o Plan de Mellora de Bibliotecas Escolares e os Clubs de Lectura para o vindeiro curso
Idioma GallegoA directora xeral de Ordenación e Innovación Educativa, Judith Fernández, visitou hoxe o Colexio Plurilingüe Seis do Nadal (Vigo) para facerlle entrega do Selo Biblioteca Escolar Solidaria, un galardón concedido pola Xunta para recoñecer a centros cuxas bibliotecas traballan de forma salientable a igualdade de oportunidades e fomentan o voluntariado cultural e social entre os seus integrantes.
Ademais do da cidade da oliveira, obteñen este recoñecemento os colexios CEIP Plurilingüe San Marcos (Abegondo), CEIP Plurilingüe de Chancelas (Poio) e CEIP Plurilingüe Frián-Teis (Vigo), así como o Centro Integrado de FP Compostela (Santiago). Os cinco realizaron unha planificación da biblioteca solidaria sobre problemas reais que afectan á comunidade educativa, e que se poidan orientar arredor dos obxectivos da Axenda 2030 da ONU para o Desenvolvemento Sustentable.
Cada un deles recibirá unha asignación de 1.500€, que deberá destinarse a actividades da biblioteca escolar no ámbito da atención da diversidade para facilitar avances na configuración dunha biblioteca inclusiva ou en relacións aos obxectivo da Axenda 2030 e con implicación das familias.
Voluntariado de lecturaPor outra banda, ao abeiro desta convocatoria recoñecéronse outras 10 experiencias na modalidade de Voluntariado na biblioteca escolar entre as bibliotecas dos centros de Educación Primaria, desenvolvido en colaboración coa Consellería de Cultura, Lingua e Xuventude.
Trátase dos colexios CEIP Bergantiños (Carballo), CEIP Plurilingüe de Louro (Muros), CEIP Plurilingüe de Outes (Outes), CEIP Plurilingüe Virxe do Carme (Sober), CEIP Virxe da Pena da Sela (O Irixo), CEIP Plurilingüe Montemogos (Bueu), CEIP do Foxo (A Estrada), CEIP Fermín Bouza Brey (Ponteareas), CEIP A Lomba (Vilagarcía de Arousa) e CEIP O Piñeiriño (Vilagarcía de Arousa).
Neste caso os centros recoñecidos recibirán unha asignación de 600€ para o desenvolvemento dun obradoiro especializado sobre lectura expresiva, narración oral, escrita creativa, a radio como medio de comunicación, a elaboración de booktrailers (pezas audiovisuais de presentación dun libro), os xogos cooperativos ou a música e danza tradicionais.
O obxectivo destes recoñecementos é estimular o voluntariado cultural en relación coa lectura entre o alumnado de 5º e 6º de Primaria, a través de actividades como as lecturas compartidas dentro e fóra do centro (na vila, con outros centros, coa biblioteca pública ou outras institucións do concello, por exemplo), así como as accións de acompañamento na lectura a outros compañeiros do propio colexio, denominados como apadriñamentos e amadriñamentos lectores.
Incremento da participaciónO número de centros que participan no programa de Bibliotecas Escolares Solidarias incrementouse de xeito significativo este curso e son 89 os centros que o desenvolven na modalidade de voluntariado escolar para 5º e 6º de Primaria, un 20% máis ca no 2022/23. Nesta categoría o alumnado forma parte do equipo de colaboradores que, xunto co profesorado, contribúen ao bo funcionamento biblioteca e ao desenvolvemento das súas iniciativas, organizando ademais lecturas compartidas dentro ou fóra do centro, con persoas maiores, entre outros.
Na modalidade de Secundaria e outras ensinanzas hai 132 centros integrados no programa, un 15% máis ca no curso anterior. A súa participación materialízase en actividades de colaboración relacionadas coa biblioteca escolar ou a través de actividades de lectura compartida ou de traballo coa información, organizadas pola biblioteca, dentro ou fóra do centro.
Novas convocatoriasA Consellería de Educación, Ciencia, Universidades e FP vén de publicar tamén as convocatorias do Plan de Mellora de Bibliotecas Escolares (PLAMBE) e dos Clubs de Lectura para o vindeiro curso.
No caso do PLAMBE, poderanse incorporar 25 centros novos a este programa, que este curso chega aos 842 centros educativos de toda Galicia. O orzamento total da convocatoria, que contempla tanto os colexios e institutos de nova incorporación como os que continúan participando na iniciativa, é de 1,5M€. Ademais da achega económica, os centros incluídos neste programa poderán recibir formación específica, así como asesoramento a través da asesoría de bibliotecas escolares da Consellería.
O prazo de presentación de solicitudes estará aberto ata o 18 de xullo e, como é habitual, a convocatoria incide na adquisición de fondos nas librarías de proximidade e dá prioridade aos centros do rural, de tal forma que, en igualdade de puntuación, terán preferencia os situados en concellos de menor poboación.
Por outra banda, o departamento educativo da Xunta pretende superar os 450 centros no programa de Clubs de Lectura o vindeiro curso. Como novidade, este curso haberá unha modalidade de nova incorporación e outra de continuidade, aínda que os centros que xa participaron noutros cursos non terán que achegar un novo proxecto para este ano. O prazo de presentación de solicitudes estará aberto ata o 4 de outubro.
Poderán participar os centros que inclúan un club de lectura na programación de actividades da biblioteca escolar en tempos de lecer ou horario extraescolar. A dotación total do programa ascende a 400.000€ e con estas axudas os centros poderán adquirir libros para as actividades do club.
Información xeral Consellería de Educación, Ciencia, Universidades e Formación ProfesionalOs Bolechas estrean no colexio A Igrexa-Calo un libro adicado ao Camiño en Teo
O conselleiro de Educación, Ciencia, Universidades e FP, Román Rodríguez, e a alcaldesa de Teo, Lucía Calvo, asisten ao Colexio CEIP A Igrexa-Calo, xunto Os Bolechas, co gallo da presentación do libro Os Bolechas visitan Teo.
No libro, os personaxes infantís galegos máis coñecidos percorren o concello de Teo e os seus lugares máis emblemáticos a través do camiño portugués.
Información xeral Consellería de Educación, Ciencia, Universidades e Formación ProfesionalRomán Rodríguez felicita ao instituto IES Illa de Ons de Bueu polo musical Os Miserábeis, no que participan máis de 70 persoas
O conselleiro de Educación, Ciencia, Universidades e FP, Román Rodríguez, asistiu, no Pazo de Cultura de Pontevedra, á estrea do musical Os miserábeis realizado polo Instituto IES Illa de Ons.
O titular de Educación da Xunta felicitou ás máis de 70 persoas que integran o elenco, entre alumnos, profesorado, persoal non docente e algunhas familias. A excelente representación é froito do traballo en conxunto do equipo de montaxe, iluminación, realización, vestiario, maquillaxe e perruqueira, entre outros. O proxecto foi creado durante o horario lectivo, como parte dun proxecto educativo integral do centro.
No ano 2019, o instituto, pola realización dunha obra como esta, recibiu o primeiro Premio de Innovación Educativa en Dinamización Lingüística da Xunta de Galicia. Este galardón, impulsado polo Goberno galego, contribúe ao incremento do uso da lingua, á eliminación de prexuízos lingüísticos entre a comunidade educativa e á posta en valor do galego como lingua de interese e con proxección de futuro para a mocidade.
Información xeral Consellería de Educación, Ciencia, Universidades e Formación ProfesionalUn total de 645 estudantes de Bacharelato participarán este verán nas estadías lingüísticas no estranxeiro impulsadas pola Xunta
Summary:
O Portal Educativo vén de publicar a listaxe de seleccionados, que mellorarán as súas competencias en Canadá, Reino Unido, Francia, Portugal e Alemaña
O Goberno galego destina preto de 2M€ a esta actividade, de tal xeito que se subvenciona ata o 92% da mesma
Ademais, 1350 alumnos de 45 centros galegos poderán integrarse no sistema educativo doutros países o vindeiro curso a través do programa EduExchanges
Idioma GallegoUn total de 645 estudantes de Bacharelato participarán este verán nas estadías lingüísticas no estranxeiro impulsadas pola Xunta de Galicia co fin de mellorar as súas competencias nos idiomas inglés, francés, portugués e alemán tal e como pode consultarse no Portal Educativo.
Nesta convocatoria foron seleccionados un total de 407 alumnos de 1º de Bacharelato e outros 238 de 2º de Bacharelato, que gozarán de tres semanas en réxime residencial ou familiar en Reino Unido, Francia, Portugal, Canadá e Alemaña no período estival, entre xullo e agosto.
Así pois, 339 estudantes desprazaranse a Reino Unido e 230 a Canadá para mellorar as súas competencias en inglés; 60 farano a Francia para mellorar o seu francés; dez irán a Alemaña para perfeccionar o idioma alemán; e seis a Portugal para reforzar o seu portugués.
Curso
Modalidade
Prazas
2º Bacharelato
Inglés en Canadá
90
Inglés no Reino Unido
120
Francés en Francia
20
Portugués en Portugal
3
Alemán en Alemaña
5
1º Bacharelato
Inglés en Canadá
140
Inglés no Reino Unido
219
Francés en Francia
40
Portugués en Portugal
3
Alemán en Alemaña
5
O Goberno galego destina preto de 2M€ a esta actividade, de tal xeito que se subvenciona entre o 92% e o 62% do custo das estancias dos estudantes en Canadá, Reino Unido, Francia, Portugal e Alemaña. Con cargo a esta partida, a Xunta sufraga parte dos gastos de contratación dos monitores que acompañan a cada grupo, mantemento e aloxamento, traslados para actividades, docencia e material escolar, actividades culturais, deportivas e complementarias dos cursos, seguros de accidentes e certificado de realización do curso.
O propósito desta iniciativa, enmarcada na Estratexia Galega de Linguas Estranxeiras Edulingüe 2030, non é só que o alumnado asistente aprenda un idioma estranxeiro, senón tamén entrar en contacto con outras linguas, persoas, culturas e realidades nun contexto de inmersión ou integración nun país estranxeiro. Deste modo, favorécese o desenvolvemento académico e persoal do alumnado. Para acceder a estas axudas os alumnos debían ter acadado unha nota mínima na área ou materia de lingua estranxeira que se vai perfeccionar na estadía de 6 no curso 2022/23, así como ter superadas todas as materias nese mesmo ano académico.
EduExchanges ata o 23 de setembroPor outra banda, ata 1350 alumnos de 45 centros galegos poderán integrarse o vindeiro curso no sistema educativo doutros países a través do programa EduExchanges, de promoción dos intercambios entre estudantes. Poden beneficiarse desta convocatoria os alumnos de 6º de Primaria, ESO e 1º de Bacharelato de centros educativos públicos que desenvolvan programas de intercambio durante o curso 2024/2025. A lingua vehicular do intercambio pode ser a primeira ou a segunda lingua estranxeira cursada e o réxime será de residencia coa familia do alumno de intercambio estranxeiro.
O alumnado galego participante deberá estar acompañado polo profesorado designado polo centro educativo, que realizará durante a súa estadía observación directa das metodoloxías do centro educativo estranxeiro e do seu impacto nos procesos de aprendizaxe do alumnado. Deste xeito, potenciarase o traballo conxunto e fomentarase a reflexión sobre actuacións innovadoras, que redundarán no establecemento de proxectos comúns. O centro educativo será o encargado de chegar a acordo cun centro estranxeiro e de seleccionar ao alumnado participante.
O prazo para solicitar a participación neste programa estará aberto ata o 23 de setembro e as peticións deberán formalizarse a través da aplicación de Programas Educativos. A convocatoria conta cun orzamento de 350.000€.
Información xeral Consellería de Educación, Ciencia, Universidades e Formación ProfesionalA Escola de Cantería de Poio expón o talento do seu alumnado na mostra ‘Arías Xidas’
Summary:
O titular de Educación da Xunta subliña a importancia de potenciar o oficio da cantería fomentando a innovación e a tecnoloxía e atendendo ás demandas do sector
Idioma GallegoO conselleiro de Educación, Ciencia, Universidades e FP, Román Rodríguez, visitou a exposición Arías Xidas, que inclúe as obras do alumnado da Escola de Cantería de Poio, e maquetas do patrimonio cultural, coa obra do veciño José Manuel Magdalena Otero. Ambas exhibicións permanecerán abertas ata o 8 de xullo.
O titular de Educación da Xunta, ademais de felicitar aos estudantes polo excelente traballo desenvolvido, tamén aproveitou para recordar as novidades da Escola de Cantería para o vindeiro curso 2024-2025. O centro converterase nun Centro Integrado de FP, logo de que o Goberno autonómico asumira a súa titularidade, e aumenta a oferta formativa con catro novas titulacións. Os estudantes interesados poderán solicitar praza a partir do 24 de xuño.
O alumnado beneficiarase das melloras, xa que a partir deste curso, as ensinanzas que ata agora eran consideradas como formación non formal pasarán a ser títulos oficiais, ademais de permitir que os antigos alumnos, que non tiñan un título homologado, poidan acreditar a experiencia profesional. Tamén, para o próximo curso, se ofertarán os ciclos duais de Proxectos de Edificación e de Construción. Estas titulacións de alta especialización son unha proposta exclusiva de Galicia onde, atendendo a demandas específicas por parte dos sectores produtivos, deséñanse itinerarios formativos moi especializados feitos ad hoc.
Información xeral Consellería de Educación, Ciencia, Universidades e Formación Profesional- « primeira
- ‹ anterior
- 1
- 2
- 3
- 4
- 5
- 6
- 7
- 8
- 9
- …
- seguinte ›
- última »
![IES David Buján lector de novas - departamentos Distribuir contido](/centros/iesdavidbujan/misc/feed.png)