Este xoves ás 12:20 no IES A Sangriña celebrarase o acto literario de homenaxe á poeta Xela Arias.
O acto iniciarase coa conferencia da profesora da universidade de Santiago, María Xesús Nogueira, que nos aproximará á obra de Xela Arias así como á importancia da literatura feminina creada nos últimos anos en lingua galega.
A continuación alumnas do instituto ofrecerán un recital de poemas da autora homenaxeada.
Finalmente entregaranse os premios do Terceiro Certame de Poesía Xela Arias, que lle corresponderon ás seguintes persoas.
* 1º premio da modalidade A: Rosabel Rodríguez Ku, alumna de 3º de ESO do IES A Sangriña.
* 1º premio da modalidade B: Pablo Lomba Riego alumno de 1º de bacharelato do IES A Sangriña.
* 2º premio da modalidade B: Lucía Barrera López, alumna de 1º de bacharelato do IES Perdouro de Burela.
* 3º premio da modalidade B: Moisés Martínez González, alumno de 2º de bacharelato do IES Pedra da Auga de Ponteareas
* Mención especial para María Lueiro García, alumna de 1º de bacharelato do colexio Maristas-Cristo Rei da Coruña.
A asistencia a este acto literario é aberta para todas as persoas que o desexen. Desde a Dirección do IES A Sangriña convidámosvos a vir gozar deste tempo para a poesía.
As persoas que asistan recibirán como obsequio a publicación dos poemas gañadores da segunda edición na que tamén atopamos unha aproximación á obra de Xela da profesora e crítica literaria María Xesús Nogueira. Este libro, igual que na edición anterior, está publicado pola Deputación de Pontevedra.
