Saídas educativas

Esta semana alumnado de 2° de ESO participou nun roteiro polo noso barrio, Coia.

Un agradable paseo, cos profesores Luis e Xulián exercendo de guías pola nosa parroquia e centrado na súa toponimia, historia e espazos naturais. Un deles, o parque da Bouza, é un dos tres parques máis importantes da cidade, con máis de 30 especies diferentes de árbores, con zonas especiais onde crían moitas especies de fauna.

Esta xa é unha saída obrigada no noso centro e que lles permite coñecer e valorar máis a contorna onde vivimos.

O alumnado de 2º ESO tivo a oportunidade de participar na xornada do Día da Muller e a Nena na Ciencia no Verbum.

Alí puidemos coñecer en primeira persoa a científicas galegas, unha delas do noso barrio, que nos falaron do que supuxo e supón para elas ser investigadoras. Tamén nos falaron de grandes mulleres que fixeron importantes achegas científicas e nunca recibiron o recoñecemento social que merecían.

Despois, o noso alumnado puido desenvolver pequenos experimentos, como a elaboración de sales de baño, moldear polímeros, analizar con microscopios ou mesmo darlle luz a Hedy Lamarr, a actriz austriaca que inventou o wifi.

Unha apaixoante xornada de Ciencia que nos ensinou que o coñecemento e a investigación non entende de xéneros!

O pasado 6 de marzo, o alumnado do club de ciencias que participa no proxecto CanSat acudiu á Cidade da Cultura a Santiago de Compostela para compartir unha xornada co resto de centros que preparan este proxecto.

Os nosos equipos (CoiaSat e P4noramix7), tiveron a oportunidade de coñecer ao resto de grupos galegos e pasar un día de convicencia todos xuntos. Tamén puideron desfrutar das charlas de El Barroquista, SpaceLab, e coñecer o proxecto MarumaSat.

Seguiremos traballando nos nosos proxectos agardando ao día do lanzamento!

O pasado 21 de decembro, o alumnado de 1º ESO desfrutou dunha mañá diferente na pista de xeo de Samil. A actividade, organizada polo Departamento de Educación Física, é un éxito cada Nadal. A rapazada puido patinar nun entorno inusual como é o xeo, vivindo unha experiecia novidosa para moitos.

O pasado martes 14 de novembro, o alumnado de francés de 1° e 2° de Bach asistiu ao Auditorio do Concello de Vigo para ver unha película en versión original francesa titulada "La Traversée",  incluida no festival de cine Fiestinema organizado pola Alianza Francesa.