Complementarias

A Revista da Tarde, programa da TVG emitido o luns 17 de decembro recolleu a nova da publicación do noso libro Cántame e Cóntame Avoa. Na noticia podedes escoitar aos profes e aos alumnos falando e tamén ao señor Eladio de Confurco abraiado coa repercusión mediática das súas cantigas. Picade directamente no minuto 19:37

Estreamos mural no comedor escolar, coas froitas como protagonistas e con el queremos motivar ao alumnado ao cumprimento das normas de convivencia neste espazo escolar: comer un menú saudable e variado, manter un ton de voz baixo cando estamos sentados á mesa, usar correctamente os cubertos, pedir por favor as cousas... Son só algúns dos útiles consellos que debemos cumprir para unha convivencia feliz e harmoniosa á hora de comer.

A quen non lle ten pasado voltar á casa onde viviu de pequeno, á escola onde estudou, ao parque onde xogou... e lembrar. Decatarse de que todo é máis pequeno, activar os pequenos recordos, os sons, os cheiros, as cores, as formas. Descubrir como detrás dese recanto segue estando aquelo que ten que estar. Así lle aconteceu á xornalista e ex-alumna do noso centro Fátima Fernández o pasado 15 de novembro cando acudiu como representante da xeración de alumnado que recolleu as cantigas do noso libro. E de regalo deixounos este marabilloso e emocionante texto. Para todos os que non puidestes estar e máis para todos os que o queredes ler de novo, aquí vos vai.

Este é o castro que os rapaces e rapazas construíron no recreo para as formigas do CPI.

Que sorte teñen estas formigas!!!

Aquí tedes o noso tesouro de cantigas. Pedras preciosas da enciclopedia do saber popular que viaxan pola rede ata as vosas panallas para que cantedes, recitedes ou simplemente gocedes coa súa lectura. Cántame e cóntame avoa é unha recompilación de cantigas recollidas nos concellos de San Cristovo de Cea, Piñor, Maside e Ourense.
O traballo xa empezou o ano 2004. O alumnado de infantil, dirixido pola profesora María Carmen Fernández Vázquez, realizou a recollida das cantigas utilizando unha gravadora e un caderno. Este traballo prolongouse durante dous cursos.
O curso pasado, coa axuda da tecnoloxía, dixitalizamos as gravacións e fixemos o deseño do libro, que a dirección do centro imprimiu en papel en edición limitada para as familias que participaron no proxecto e que podemos ler na súa edición dixital. Tamén fixemos un vídeo para presentar o traballo no que o alumnado do primeiro ciclo de primaria recita unha selección das cantigas.
No libro recóllense máis de 600 cantigas agrupadas nos apartados animais, sentimento, emigración, lugares, para cantar e bailar, relixiosas, satíricas e humorísticas, traballo e temas varios. Cada cantiga r ven acompañada do nome, idade e lugar da persoa que a aportou. O escritor Xosé Carlos Caneiro, profesor do centro durante o curso 1986-1987, fixo o prólogo do libro.