A Domus invita os escolares a participar na creación dunha nova exposición sobre a mente
![](http://www.edu.xunta.gal/eduga/sites/site.eduga/files/styles/node_nova/public/portada/actualidad/domus_exterior.jpg?itok=i4uBxZJz)
Doa a túa neurona
A participación neste proxecto consiste en construír unha neurona cuxa dimensión non debe superar o tamaño dun folio DINA4, é dicir, duns 30 centímetros de longo por uns 22 de ancho. A estrutura deberá ser plana e posuír certa rixidez e resistencia (podería valer o arame que se emprega en manualidades). A construción ha de simplificar ao máximo a anatomía desta célula, reproducindo tan só a súa forma (corpo celular, dendritas e axón, pero pódese achegar creatividade nos materiais e acabados, elixindo, por exemplo, diversos tipos de arames, revestíndoos con abelorios, con teas ou con cintas de diferentes texturas e cores). As neuronas poden levar un título ou un nome, para facer algunha alusión a como se construíron, quen participou, o aspecto que máis se desexe destacar etc.
Destinatarios
Con esta convocatoria, quérese invitar principalmente o profesorado de educación primaria e secundaria a introducir este tema na aula e ofrecer unha actividade que sirva de motivación para abordar e profundar na célula, que é a base do cerebro e de todos os sistemas nerviosos.
Entrega de traballos
Os escolares que desexen participar deberán entregar a súa neurona na recepción da Domus, en horario de apertura ao público, ou enviala ao seguinte enderezo:
Doa a túa neurona
Domus - Rúa de Santa Teresa, 1 - 15002 A Coruña
Deberán chegar acompañadas dos seguintes datos persoais: nome e apelidos, idade, curso e centro educativo; tamén se indicará un enderezo e un teléfono de contacto.
Aínda que o obxectivo é empregar todas as que cheguen, en caso de que sexan demasiadas, a selección será por orde de chegada. O prazo de participación terminará o próximo 30 de xuño.
- Máis información: http://es.mc2coruna.org/2012/02/dona-tu-neurona.html