1. A asociación

Áurega é unha asociación sen ánimo de lucro de familias de nenos e nenas con altas capacidades, talentos e/ou inquietudes intelectuais.

Naceu a finais do ano 2018, debido ao esforzo dun grupo de familias conscientes da necesidade de lles dar visibilidade ás altas capacidades e da falta de atención e recursos para este colectivo na comarca.

Cremos que existe unha necesidade de información ás familias, desde a sospeita ata a recepción da avaliación dos seus fillos e fillas, e somos conscientes de que é imprescindible o apoio e o asesoramento para entender as especiais características deste grupo e axudar a que os demais (familia, amigos, comunidade educativa e sociedade) os entendan.

Segundo o Informe nacional da educación dos superdotados 2018, existe unha infravaloración das altas capacidades. A pesar de que se estima que aproximadamente o 2 % da poboación podería ter altas capacidades, segundo o citado informe, en Galicia, hoxe en día, só está confirmado un 0,39 %. Por iso, consideramos que é moi importante protocolizar a intervención do servizo de orientación nos centros educativos. Se houbese máis alumnado avaliado, é probable que se normalizase a súa situación na escola e que o profesorado puidese colaborar xunto con orientadores e familias na inclusión deste grupo nos colexios e institutos de educación secundaria.

Pensamos que darlle visibilidade a este tipo de diversidade pode ser útil para acabar con determinados prexuízos, posibilitaría traballar as diferenzas e axudaría os nosos fillos e fillas a aceptarse e a que os acepten. Existe unha elevada porcentaxe de acoso escolar entre estes nenos, así como de fracaso escolar ou baixo rendemento académico. Está demostrado tamén que a detección de nenas de altas capacidades é considerablemente menor que a de nenos. En ÁUREGA tamén queremos fomentar a igualdade e a inclusión das nenas neste colectivo intentando derribar as falsas crenzas e mitos que pesan sobre elas.

Dende Áurega pretendemos ofrecerlles ás familias información e axuda, antes e despois da detección das altas capacidades, así como darlles ferramentas para sentirse útiles na educación dos seus fillos. Todo isto queremos facelo mediante a realización de escolas de familias e con obradoiros especiais que motiven a estes rapaces e rapazas, intentando contar co apoio de especialistas e da comunidade educativa.

Hoxe en día, Áurega está formada por case 100 familias e con máis de 90 nenos e nenas nos obradoiros.

2. Fins da asociación

Os fins principais da asociación son os seguintes:

1. Informar, orientar, axudar e acompañar as familias antes, durante e despois do proceso de detección; contribuíndo a crear un sentimento de acción útil entre as familias na educación dos seus fillos.

2. Fomentar e promover a sensibilización do conxunto da sociedade, favorecendo a igualdade de oportunidades e a integración social, e traballar pola eliminación de estereotipos.

3. Crear necesidades de formación e coñecemento entre a sociedade educativa sobre as altas capacidades.

4. Fomentar e animar a detección e diagnóstico para normalizar socialmente esta diversidade, e conseguir un pleno e harmónico desenvolvemento das potencialidades e personalidades.

5. Apoiar o estudo e a investigación científica sobre as altas capacidades intelectuais, o talento e o desenvolvemento intelectual como un ben para a comunidade.

6. Obter fondos que posibiliten actuacións a prol desta asociación e dos seus asociados, tanto de institucións públicas como privadas e/ou persoas físicas e xurídicas.

7. Fomentar a cooperación e alianzas coas administracións públicas e/ou privadas.

3. Actividades que promove a asociación

A resposta educativa que se lles dá aos estudantes de alta capacidade no contorno escolar resulta insuficiente, xa que só inclúe as medidas ordinarias de enriquecemento e ampliación curricular, así como a extraordinaria da aceleración que, ademais, na maioría dos casos non se aplican.

A maiores, os pais necesitan ferramentas e mecanismos para sentírense útiles na educación dos seus fillos, xa que xusto despois de obter una avaliación positiva do seu neno a maioría non sabe como debe de actuar con eles.

Por todas estas razón antes descritas, a asociación estrutúrase arredor de:

- Escolas de pais/nais: é importante que as familias atopen un lugar onde resolver todas as dúbidas que van tendo con respecto á educación dos seus fillos con altas capacidades.

- Obradoiros de enriquecemento, tanto intelectual como emocional, para os nenos e nenas. Distintos exemplos destes obradoiros poden ser obradoiros de expresión, nos que se aprende a identificar e expresar os sentimentos; obradoiros de motivación xeral, que teñen por obxectivo o coñecemento e enriquecemento en novos saberes etc.

Todas estas actividades teñen que estar dirixidas por persoal especialista en altas capacidades, o que supón un custo maior que a organización de calquera outro tipo de obradoiro.

Na actualidade estamos a traballar con distintos profesionais tanto de Galicia como doutras comunidades autónomas cos que desenvolvemos as diferentes actividades:

PARA AS FAMILIAS

- Escola de familias

A prioridade destas escolas é que sexan un lugar de encontro para as familias. Trátase todo tipo de cuestións sobre a educación e como solucionar conflitos no ámbito familiar, educando na validación das emocións, sempre partindo dos intereses e inquedanzas que nos fan chegar as familias.

- Formación para pais/nais

Realizamos conferencias abertas a todo o público e, en especial, á comunidade educativa, poñendo especial énfase en desterrar os mitos máis comúns que existen sobre os nenos de altas capacidades e intentando dotar os profesionais das ferramentas e coñecementos necesarios para poder levar a cabo un traballo satisfactorio dentro das aulas.

Actualmente acabamos de asinar un convenio coa Xunta de Galicia para poder achegar esa formación aos mestres, orientadores e demais profesionais.

PARA OS NENOS E AS NENAS

- Obradoiros

Realizamos cos nenos varias andainas nas que o noso obxectivo principal é fomentar uns hábitos saudables, descubrir a nosa contorna e estreitar lazos entre os nenos e nenas nun contexto máis natural e menos formal do que poden ser as aulas dos obradoiros. Fomentan estas andainas, tamén, un clima de respecto e confianza cos mestres.

- Campamento

No mes de xullo realizamos unhas xornadas de convivencia para todos os nenos da asociación, independentemente de se acoden ou non aos obradoiros. Unhas xornadas nas que pretendemos fomentar a autonomía e o desenvolvemento de habilidades de actividades cotiás; sempre nun clima lúdico e coa finalidade primeira de crear un espazo de diversión, convivencia e desenvolvemento persoal.

- Evento fin de curso

No mes de xuño levamos a cabo o noso evento de fin de curso. Trátase dunha feira onde os nenos lle mostran ao público en xeral os proxectos que levaron a cabo durante o curso.

Esta feira serve, ademais, como plataforma de visibilización da asociación e do traballo realizado por todos os compoñentes. Acoden a ela moitas familias, profesionais do mundo da educación e autoridades dos distintos concellos e das entidades colaboradoras. Cremos que é unha plataforma moi importante para concienciar e desterrar mitos sobre os nenos de altas capacidades na sociedade, levar a concienciación desta diversidade ás aulas e facer chegar aos organismos competentes as nosas necesidades persoais e colectivas.