O recuncho TIC na BiblioBN

Vostede está aquí

O recuncho TIC na BiblioBN

O traballo coas tecnoloxías da información e da comunicación na EEI Barrionovo

Neste artigo presentamos unha síntese do traballo do alumnado e do profesorado coas ferramentas TIC aloxadas na biblioteca escolar. Faremos tamén referencia ao proxecto TIC do centro, que promove o achegamento a estas ferramentas para desenvolver os obxectivos do proxecto anual de traballo.

María José Pousa Rodríguez,
mestra de educación infantil e coordinadora de biblioteca.
mariapousa@edu.xunta.es

Aida Dourado Gantes,
mestra especialista en Audición e Linguaxe e coordinadora TIC.
aidadourado@edu.xunta.es

A EEI de Barrionovo é unha escola de tres unidades de educación infantil situada en Pastoriza, Arteixo (A Coruña).

No curso actual contamos con 66 alumnas e alumnos distribuídos en cuarto, quinto e sexto de infantil e con seis mestras (catro mestras de Educación Infantil, un especialista en Lingua Inglesa e un especialista en Audición e Linguaxe). Levamos cinco cursos traballando cun proxecto anual de centro, coordinado desde a biblioteca escolar. A biblioteca tamén está integrada no PLAMBE desde hai cinco cursos. A liña do PLAMBE é a biblioteca como xeradora dos proxectos de traballo e centro de recursos para a aprendizaxe.

O centro, así mesmo, conta cun proxecto TIC desde o curso 2012/13 que anualmente revisamos e adaptamos aos obxectivos en marcha. Este proxecto recolle a formación no eido das TIC tanto do profesorado como do alumnado.

As familias son informadas na reunión de inicio de curso da programación do PLAMBE e do proxecto TIC, na de final de curso reciben tamén a información do traballo realizado ao longo do ano. Estas programacións son avaliadas trimestralmente igual ca o resto de programacións e coordinacións, a finalidade é comprobar o cumprimento dos obxectivos e a posible desviación destes.

Desde o curso 2011/12 lévase a cabo co alumnado un taller TIC que pretende lograr o uso autónomo das ferramentas e programas cos que conta o noso centro. Todo o traballo deste taller e as producións do alumnado difúndense á comunidade educativa mediante un blog, TicsBn (http://ticsbn.blogspot.com.es/), que está aloxado dentro do blog da biblioBN (http://bibliobn.blogspot.com.es/).

Desde o curso 2013/14, a totalidade do claustro participa nun PFPP na liña TIC, no que levamos traballado o funcionamento coas tabletas e ipads, creación de apps, realidade aumentada, códigos QR, técnica do Croma, Moodle e programación con Scratch. De cara ao vindeiro curso, ao ser o noso centro un dos 20 elixidos no proxecto Escornabots na Biblioteca Escolar, precisamos formación para a programación co Arduino.

As ferramentas TIC do centro está aloxadas nun recuncho dentro da biblioBN, onde o alumnado atopa tabletas, ipads, cámaras fotográficas, videocámaras, trípode, beebots, escornabots, tableta gráfica, cámara web, disco duro, cascos, micrófonos, tea para o Croma e diversos complementos para estas ferramentas. Este recuncho está á disposición do alumnado durante toda a xornada lectiva.

Tanto a biblioBN, como os demais espazos contan con ordenadores de mesa, portátiles, EDI e canóns de ultracurta distancia.

O gran peso das tecnoloxías no noso centro é debido a que cremos que esta linguaxe forma xa parte da nosa vida educativa e, como tal, procuramos desenvolvela na busca, tratamento e exposición da información, no fomento da creatividade, no traballo lectoescritor, no fomento da lectura, na competencia matemática e na diversidade e autonomía do alumnado. Todo este traballo é difundido á comunidade educativa para adquirir conciencia da importancia desta linguaxe para o futuro dos seus fillos e fillas.

Deseguido pasamos a mostrar algúns dos traballos que desenvolvemos nestes anos co noso alumnado, todos eles aloxados nos blogs da escola:

Vídeo presentación da nosa biblioteca polo Día do Libro Infantil en abril de 2014.

http://bibliobn.blogspot.com.es/2014/04/dia-do-libro-infantil-na-bibliobn.html

Para a celebración do Día do Libro deste curso, elaboramos un vídeo coas técnicas do Croma e Stopmotion, inspirado no texto de Pedro Feijoo para as Bibliotecas Escolares de Galicia.

http://bibliobn.blogspot.com.es/2016/04/os-libros-son-para-valentes.html

Traballo coas tabletas e ipad e creación de apps co Scratch, Tiny Tap e Make It.

http://noaltodobarrio.blogspot.com.es/2016/05/xogando-e-apprendendo.html

Dentro do proxecto anual de traballo Pastoriza 101 Nomes, empregamos a realidade aumentada para acceder aos vídeos gravados polo alumnado coa información recompilada cos lugares de interese da parroquia.