Historia do Centro

A Universidade Laboral foi a primeira en ser construída, cando tomou corpo a decisión de dedicar unha Universidade Laboral para as profesións Marítimo-pesqueiras (alá por xullo de 1962 e dentro do I Plan de Desenvolvemento Económico e Social 1964-1967).

A construción empezouse no 1962. Sita en Acea de Ama, a 5 km. da Coruña, no Concello de Culleredo.

Unha gran praza de acceso dá entrada ás instalacións da Universidade, de 3500 m2., nun extremo sitúase un mastro de navío de 38 metros de altura.

O conxunto harmonízase dende unha idea de funcionalidade do espazo, o que se concreta nunha serie de edificacións intercomunicadas a través de galerías cubertas dando lugar a un Centro singular nun entorno único. Foi proxectada polos arquitectos José López Zanón e Luís Laorga Gutiérrez e elixiuse polo Colexio de Arquitectos da Coruña, no día Mundial da Arquitectura (edición 2001) como exemplo da “recuperación da modernidade arquitectónica no noso país nos anos 60”.

A andadura do centro iníciase en outubro de 1964 co nome de Universidade Laboral “Crucero Baleares”, con dependencia do Ministerio de Traballo e subvencionado polas Mutualidades Laborais. A orientación profesional preferente era Marítimo-pesqueira, e a procedencia do alumnado, que abarcaba toda España, e a súa condición de bolseiros en réxime de internado, implicou a construción dun internado, ademais das aulas e talleres e dun importante complexo deportivo.

Cos anos seguintes viñeron sucesivas mudanzas que irán configurando a súa identidade: primeiro foi adscrito como Instituto Nacional de Ensinanzas Integradas (INEI) ao Ministerio de Sanidade; posteriormente como Centro de Ensinanzas Integradas (CEI) ó Ministerio de Educación e Ciencia, pasando a denominarse Instituto de Educación Secundaria e Profesional (IESP). Na actualidade está transferido á Consellería de Educación e Ordenación Universitaria da Xunta de Galicia coa denominación de CIFP “Universidade Laboral”.

A superficie total tamén se reduciu; primeiro pola expropiación perimétrica de Autopistas do Atlántico no seu tramo Coruña-Santiago no ano 1977, posteriormente (anos 90) coa subdivisión en cinco entidades de funcionamento autónomo: Complexo Deportivo (dependente da Secretaría Xeral de Deportes e Xuventude), Colexio Público Sofía Casanova, Centro Residencial Docente, Instituto de Educación Secundaria Obrigatoria Eduardo Blanco Amor e Instituto de Educación Secundaria Postobrigatoria “Universidade Laboral”. O ano 2016 incrementouse unha zona mais ao inaugurarse o IES Rego de Trabe. Por último, no curso 2020-21, o centro sofre unha nova cercenación da súa superficie xa que vese obrigada a ceder o emblemático edificio de Mariñas, onde se impartían os ciclos de Marítimo Pesqueira, ao recén inaugurado IES Rego de Trabe, xa que este centro pasa a asumir o ensino de bacharelato e secundaria para adultos, e o IES Universidade Laboral impartirá exclusivamente ensino de FP.

A orientación profesional inicial de Marítimo-Pesqueira ampliouse pouco a pouco a outras familias profesionais (Electricidade, Frío e Climatización, Electrónica de Comunicacións e Caldeirería, Enerxía e Auga, Actividades Físicas e Deportivas), BUP, COU, estudos da UNED e ensinanza profesional de adultos, para incorporarse máis tarde ós novos proxectos educativos deseñados polo MEC (Bacharelatos, FP específica, Educación permanente de adultos (EPA) e Programas de Garantía Social). Todo iso condúcenos a outra calidade distintiva do noso centro: a aposta permanente por estar sempre á vangarda do mundo educativo.

Deste xeito, cun equipamento material de enorme potencial pedagóxico-didáctico e cun profesorado dedicado en plenitude profesional ao seu labor docente, chegamos ó convencemento de que a través da orientación persoal e profesional, así como da adecuada interacción das actividades académicas coas complementarias e extraescolares do entorno socio-cultural próximo ou remoto, pretendemos lograr a mellor preparación dos nosos alumnos.