8M- Día Internacional da Muller

No IES de Cotobade queremos render a nosa particular homenaxe ás mulleres importantes cuxos nomes non sairán na Wikipedia nin ocuparán unha presadiña de minutos en ningún documental. Unhas mulleres fortes, valentes, decididas, traballadoras, xenerosas, curtidas en moitas batallas case desde o instante de nacer. Uns seres feitos dunha pasta especial, enfundadas as máis das veces nunha bata de cadros coas mans sempre abertas e dispostas. Unhas mans que noutrora agarraron a zapatilla para aplicar o “tough love” á súa prole e que hoxe arrincan amodiño as follas do almanaque ata que nos poidan acariñar de novo. A esas criaturas que dormen cun ollo aberto e outro pechado, capaces de afrontar calquera revés da vida con serenidade e de dicir a calquera hora da madrugada “séntate aí que che frito un ovo”, a elas, ás que están e ás que tiveron que marchar, a todas, por todas as luces que acenderon para nós: GRAZAS, AVOAS!!!