"Facer ciencia cidadá a través da participación en proxectos interdisciplinares, co obxectivo de levar a cabo un completo proxecto de investigación sobre economía azul."
O alumnado de 1º Bacharelato de Bioloxía e Economía do IES Coruxo participa nun proxecto denominado POSTGROWTH S.A. – Vigo, que consiste en facer un proxecto de investigación sobre a economía azul na cidade de Vigo.
Trátase dun proxecto interdisciplinar onde, por unha banda, o alumnado de Economía tratará os aspectos relacionados coa economía dunha actividade económica relacionada co mar e, por outra banda, o alumnado de Bioloxía os aspectos máis técnicos desta actividade.
Na primeira sesión desenvolveuse un obradoiro onde ó alumnado, a través de distintas dinámicas, achegou ideas sobre posibles actividades relacionadas co mar a investigar e a súa problemática, guiados en todo momento por Cristina, investigadora da Universidade de Vigo.
Os seguintes pasos, guiados por este equipo de investigadores e o profesorado de Economía e Bioloxía, serán concretar a temática a investigar, desenvolver o traballo de campo (enquisas, entrevistas, etc.), analizar os datos mediante táboas e gráficas (entre outras) e deseñar unha presentación final na que o noso alumnado presentará o seu proxecto nunha Conferencia de Ciencia Cidadá en Pontevedra a finais de curso. xunto cos traballos dos outros centros educativos participantes.
O obxectivo é introducir os contidos destas materias empleando metodoloxías activas, onde a adquisición de contidos desenvólvese a través de proxectos.
O proxecto POSTGROWTH S.A. – Vigo ten como fin involucrar a alumnado e profesorado de institutos de Vigo na investigación sobre cómo a cidade pode lograr unha economía azul xusta e sostiible.
