Dentro do Programa de Mellora das Bibliotecas Escolares e no apartado de Formación de usuarios queremos promover entre o alumnado o coñecemento e as posibilidades de formación, información e lecer que a nosa biblioteca ofrece. Para tal fin, dende hai varios anos, véñense programando a comezos de curso unha serie de visitas guiadas á biblioteca de todo o alumnado do centro.
Segundo o nivel educativo, a charla orientase nun senso ou outro, atendendo aos contidos impartidos en anteriores visitas. Así, aos alumnos de 1º da ESO preséntaselle a biblioteca por primeira vez, orientándoos sobre a súa organización, servizos e funcionamento.
No resto de niveis educativos a charla introduce aos rapaces no aproveitamento dos recursos informativos que a biblioteca ofrece, facendo especial fincapé nas ferramentas que as novas tecnoloxías da información aportan aos usuarios das bibliotecas, como uso dos catalogos on-line, o apartado biblioteca na páxina web do centro e o uso das ferramentas que ofrece Internet para a procura de información.
As sesións, a cargo dun técnico en biblioteconomía, contan con apoio multimedia, imprescindible para garantir a comprensión do crecente papel das novas tecnoloxías no acceso a información e aos contidos culturais e educativos.
|