Orientación

Consellos para saír á rúa cos nosos cativos

Como seguramente xa todos sabedes, a partir do próximo 26 de abril os nenos menores de 14 anos poderán saír á rúa unha vez ao día e acompañados dunha persoa adulta. Sen embargo, estas saídas non van ser como as que estabamos acostumados a facer antes do confinamento e por iso é moi importante explicarlle aos nenos e nenas as normas que hai que seguir. Co obxectivo de facilitar esta tarefas ás familias, compartimos unha guía con recomendacións básicas para esta nova situación e tamén dous contos que podedes ler cos máis pequenos e que, sen dúbida, lles axudarán a comprender mellor como deben comportarse na rúa.

Ciclade nas imaxes para acceder aos documentos en PDF

Xornadas de portas abertas virtuais na UDC

A Universidade da Coruña organiza para os días 23 e 24 de abril unhas xornadas de portas aberas virtuais para darse a coñecer a todos aqueles alumnos/as e familias que estean interesados en saber máis sobre a propia universidade e os estudos que ofertan. O horario será de 9:30 a 14:00h e de 16:00 a 20:00h.

Ademais de obter información sobre toda a oferta de titulacións para o curso 2020/2021, tamén poderás coñecer outros servizos que ofrece a Universidade relacionados coa cultura, o deporte, o voluntariado, a titoría e orientación, a atención á diversidade, o medioambiente, etc. Todo isto organizarase arredor das seguintes actividades:

- Videoconferencias en directo sobre cada titulación.

- Vídeos de Centros Universitarios.

- Vídeos de alumnado matriculado na UDC e de alumnado xa titulado.

- Dous espazos permanentes para obter información xeral sobre as xornadas e para obter información sobre o acceso e admisión na Universidade.

- Unha sección con obradoiros e retos, con premios para quen os consiga superar.

Para acceder podes facelo de dúas formas:

- No seguinte enlace: https://www.udc.es/futuros_estudantes/portas_abertas

- Descargando a aplicación móbil UDC.gal

Consellos para afrontar o terceiro trimestre

Para comezar o terceiro trimestre e levalo a cabo con éxito, podedes consultar estes consellos que vos axudarán a organizar o estudo dende a casa. Clica na imaxe para descargalos.

Non esquezades que para que o estudo sexa eficaz require dun bo método e este pode ser un bo momento para deseñar o que máis se adapte ás vosas características persoais. Para iso, podedes consultar estas ferramentas que elaboraron os compañeiros de Aulas Galegas sobre as principais técnicas de estudo:

- O subliñado.

- Os esquemas.

- Os mapas conceptuais.

- O resumo.

- As regras mnemotécnicas.

Plataforma online Onda Educa

ONDA EDUCA é unha plataforma online para a estimulación e intervención en linguaxe e audición. Sensibilizados coa situación provocada polo COVID-19, os responsables desta plataforma estableceron un período de acceso libre e totalmente gratuito para familias e profesionais ata o restablecemento da actividade escolar e profesional. Para acceder simplemente tedes que rexistrarvos co voso correo electrónico premendo aquí: ENLACE PARA O ACCESO Á PLATAFORMA

Se precisades asesoramento e/ou axuda para o acceso aos contidos non dubidedes en consultar co Departamento de Orientación.

Alternativas de ocio sen saír da casa

Hoxe compartimos un enlace á paxina do xornal El mundo onde podedes atopar unha gran variedade de "plans para ir moi lonxe sen saír da casa". Entre a oferta de actividades hai espectáculos teatrais, festivais de música, museos, parques e monumentos virtuais, lecturas, películas, actividades gastronómicas e aplicacións para xogar online con amigos ou familiares. Podedes consultar todo isto no seguinte enlace: https://saposyprincesas.elmundo.es/especiales/planes-para-ir-muy-lejos-sin-salir-de-casa/

Desfrutade das tan merecidas vacacións de Semana Santa, pero iso si, na casa! "Vémonos" á volta!

2 de abril: Día Mundial de Concienciación sobre o Autismo

Hoxe, 2 de abril, celébrase o Día Mundial de Concienciación sobre o Autismo baixo o lema "Podo aprender. Podo traballar". Deste xeito, preténdese poñer en valor a necesidade de favorecer o acceso a unha educación e a un emprego de calidade que se adecúe ás capacidades, prioridades e necesidades específicas de cada persoa con Trastorno do Espectro do Autismo (TEA).

Para acherganos un pouco máis á realidade das persoas con autismo, compartimos dúas curtametraxes producidas pola Fundación Orange (fai clic nas imaxes para velas).

E para rematar con un pouco de humor, podedes descargar Los lunes, Autismo un libro tamén da Fundación Orange que recolle varias ilustracións sobre as características e comportamentos das persoas con TEA (preme na imaxe para acceder ao documento).

Encontros virtuais da USC

A Universidade de Santiago de Compostela (USC) está a organizar encontros virtuais para dar a coñecer as súas titulacións ao alumnado de secundaria e ás familias.

Os encontros terán lugar os días 6, 7 e 8 de abril e poderedes acceder a través do seguinte enlace:

https://www.usc.gal/gl/encontros-virtuais

Nesta páxina, que estará dispoñible a partir do 4 de abril, atoparedes:

Presentacións das titulacións.
Obradoiros e retos.
Opinións de alumnos/as sobre a titulación.
Pílulas relacionadas coa titulación.
Concursos
Unha videoconferencia para cada titulación.

Consultade os horarios na web e anímadevos a participar!

GaliciaLe: unha plataforma para seguir cultivando o noso gusto pola lectura!

A Rede de Bibliotecas Públicas de Galicia xa ten dispoñible para toda a poboación o acceso a GaliciaLe mentres dure a corentena. Trátase dunha plataforma de préstamo de obras en formato electrónico onde poderás atopar libros, revistas, audiolibros e películas, tanto no seu catálogo en galego como en castelán.

Se xa es socio dalgunha biblioteca da Rede de Bibliotecas Públicas de Galicia poderás acceder co usuario e contrasinal que che facilitaron na biblioteca. En caso contrario, só terás que rexistrarte e acceder coas claves que recibirás. Unha vez rematada a corentena disporás de 30 días para achegarte á biblioteca e solicitar o teu carné para seguir gozando de GaliciaLe.

Listado de test de orientación vocacional

O remate do curso é unha época na que toca tomar decisións (elección de itinerarios, de materias, de estudos, de centro, etc), especialmente cando finalizamos a etapa da ESO. Por iso anímovos a que durante estes días que temos que permanecer na casa dediquedes algún tempo a reflexionar sobre o voso futuro académico e profesional e profundicedes no voso autocoñecemento, algo básico para que as decisións tomadas sexan acertadas.

Unha ferramenta útil para coñecer os nosos gustos, intereses e habilidades a nivel profesional son os test de orientación vocacional. A continuación podedes atopar os enlaces a varios test dese tipo para realizar online. Anímovos a que fagades máis dun para contrastar os resultados e, sobre todo, a que sexades sinceros con vós mesmos para que os resultados vos poidan ser útiles.

Listado de test de orientación vocacional (preme aquí para acceder ao documento cos enlaces).

Tamén vos deixo un vídeo da Fundación Adecco titulado "Tu propósito" (cicla no título para velo) que me parece moi interesante para comezar esa reflexión sobre o futuro profesional.

Propostas para Infantil e Primaria

Os mestres Iago (AL) e María (PT) elaboraron para o alumnado de Educación Infantil e Educación Primaria, un listado con propostas de actividades para realizar na casa e unhas recomendacións sobre aplicacións educativas que podedes descargar nos vosos ordenadores, móbiles ou tablet. (Preme na imaxe para acceder ao documento)

Escollede a que máis vos guste e disfrutade xogando e aprendendo!