Este sábado asistimos á Xornada de Bibliotecas Escolares, unha cita anual para todos os docentes que xestionamos e dinamizamos as bibliotecas dos centros escolares. Foi unha oportunidade de continuar formándonos, de descubrir e compartir experiencias doutros centros e de aprender moito sobre teatro de expertas/as como Paula Carballeira, Rosalía Fernández Rial ou Manuel Núñez Singala, unha gozada! Agora a continuar traballando día a día para que a BBS sexa  un espazo único para aprender, descubrir, crear, compartir e medrar. 

Na primeira semana de novembro os axudantes non pararon: revisar e sortear Mochilas Viaxeiras, repoñer libros nos andeis, selar novidades, repartir Mochilas, recoller o Espazo Argalleiro, emitir nos directos do recreo da Radio BBS... Dá gusto con vós!

Xa temos a todos os grupos de axudantes da BBS en acción; esta semana asinaron o contrato e prepararon os carnés as seter axudantes do cuarto grupo, completando así os 25 nenos e nenas que colaborarán coa biblioteca este curso. Bravo!

A clase de 4º levounos hoxe a un museo arqueolóxico, concretamente á sala de Exipto. Representaron para nós un fragmento da obra Momias en transito de Sagrario Pinto. Foron os encargados/as de pechar unha semana de moito teatro na biblio, que nos encantou, e fíxerono por todo o alto, con estupendas interpretacións. Quedamos con ganas de moito máis teatro para representar e para ler. 

Grazas Cuarto!

Gustounos moito ir ao museo con vós. 

Hoxe saíron as Mochilas Viaxeiras 2024-2025! Onte os axudantes da BBS encargáronse de sortealas e hoxe á volta do recreo 6 afortunados e afortunadas recolléronas na biblioteca. Comezan a viaxe que as levará, ao longo do curso, polas casas de todos os nenos e nenas do cole, para compartir unha pequena mostra dos libros que temos na biblioteca.

Boa viaxe Mochilas!

Que sexades moi ben recibidas en todas as casas e

que creedes bos momentos de lectura en familia!

Seguimos descubrindo fantásticas obras de teatro representadas polas diferentes aulas do cole e coñecendo un pouquiño a vida e a obra de escritoras que están a ser as protagonistas deste mes de outubro na BBS.

Este xoves, Día das Bibliotecas, os nenos e nenas de 3º A representaron un anaquiño de A formiga fóra do carreiro, de Raquel Castro. Como nos gustaron! Ata musicaron e cantaron un dos textos da escena!

Grazas, 3º A polas vosas formigas e arañas! Fantásticas!

Un rato díxolle á lúa é a caixa dos tesouros da poesía de Antonio García Teijeiro. Dentro dela gárdase a esencia dos seus versos, a apócema máxica coa que, en palabras de Fran Alonso, «a lúa imprimiu neles un sabor antigo, un sabor de berce, un sabor sincero que se nos mete dentro».

Os nenos e nenas de Primeiro abriron a caixa dos tesouros e elaboraron esta marabilla de podcast, o primeiro deste curso. Dá gusto escoitalos! De seguro que han compartir moitos máis tesouros coma este ao longo do curso. 

Parabéns, Primeiro! Sodes uns cracks!

Preme no enlace para escoitar o podcast: 

Un rato díxolle á lúa

A aula de 2º tamén compartiu con todos nós o texto que recibiron o Día das Escritoras. Representaron para todos nós un fragmento de Os contos do Lobicán, de Eva Mejuto. Con eles descubrimos que os lobicáns, como os nenos e nenas do Brea Segade, son moi divertidos e un pouco pillabáns e que as súas nais tampouco se quedan atrás. 

Grazas Segundo!

Moito nos gustou a vosa interpretación!