A Primavera… a sangre altera.
Esta semana no CEIP de Vilarmide Eduardo Noya (Muxía) celebramos por todo alto a chegada da Primavera.
Tras un trimestre de duro traballo, tanto as profes como os alumn@s esperábamos impacientes a chegada das vacacións. E que mellor forma de facelo que conmemorando tres datas importantísimas? Día Mundial dos Bosques (21 de marzo), Día Mundial da Poesía (21 de marzo) e Día Mundial da Auga (22 de marzo)
Durante toda a semana o alumnado traballou sobre a importancia da auga para a vida no planeta.
Todos os alumn@s convertéronse en Superheroes e Superheroínas ao rescate da gota estragada. Decoraron as paredes con debuxos (unha imaxe vale máis que mil palabras…) nos que se resumen as razóns de Por que temos que aforrar auga en Galicia? E nos que se dan consellos para rescatar a gota estragada E logo eu, que podo facer? Incluso levaron unhas recomendacións caseiras e ecolóxicas para limpar os fregadoiros e os desaugues. Todas estas actividades presentarémolas ao concurso GENERACIONECO.
Para celebrar o Día Mundial da Árbore e da Poesía (e tamén para celebrar a chegada das vacacións), retomamos unha actividade que levabamos tempo sen facer: saída á area recreativa do Castro, comer alí e gozar do noso patrimonio paisaxístico.
Antes de subir ao autobús, os nen@s xuntáronse na biblioteca para ler poesías relacionadas coas árbores, e coa auga. Adornaron as paredes do colexio con debuxos sobre a importancia que as árbores teñen para o medio ambiente e con algunhas frases que fan reflexionar sobre a vida. Foi unha xornada moi produtiva a nivel pedagóxico. na que os alumn@s interiorizaron a sorte de vivir onde viven e o importante que é coidar os recursos naturais aos que moitas veces non lles damos valor.
Álbum: Sen categoría -> Castro 2024
