O Consello da Cultura Galega (CCG) e a Consellería de Educación e Ordenación Universitaria asinaron hoxe un protocolo de colaboración para promover a lingua galega. O acto de sinatura realizouse na sede do Consello e foi presidido polo conselleiro de Educación, Xesús Vázquez, e mais polo presidente do CCG, Ramón Villares, que estiveron acompañados polo secretario xeral de Política Lingüística, Anxo Lorenzo, e polo secretario do CCG, Henrique Monteagudo.

Trátase da primeira vez que a Xunta de Galicia asina un protocolo de colaboración desta natureza co CCG. Neste sentido, Ramón Villares agradeceu o interese da Consellería de Educación por cooperar coa actividade da entidade que dirixe, así como o esforzo realizado na actual situación de crise económica. Pola súa parte, Xesús Vázquez incidiu durante a súa intervención no interese do seu departamento por darlle continuidade á cooperación entre as dúas entidades a prol do fomento da lingua galega.

Intercambio de recursos e difusión de material de interese

Grazas a este acordo, a Consellería de Educación, a través da Secretaría Xeral de Política Lingüística, e o CCG cooperarán en diversas iniciativas ao longo de todo este ano. Por unha banda, o protocolo favorece o intercambio de información sobre recursos sociolingüísticos e mais a visibilización e a difusión de material de interese en lingua galega de ambas as entidades.

Por outra banda, o Centro de Documentación Sociolingüística de Galicia (CDSG) do Consello e Política Lingüística intercambiarán os recursos documentais necesarios na planificación das súas actividades. Ao mesmo tempo, a secretaría xeral apoiará a dixitalización e o procesamento dos principais recursos documentais históricos que leve a cabo o CDSG.

O CDSG formará parte da Rede de Dinamización Lingüística

Grazas a este marco de colaboración, o CDSG pasará a integrarse na Rede de Dinamización Lingüística, un proxecto co que a secretaría xeral busca fomentar a dinamización e a cooperación entre as distintas entidades locais, co fin de potenciar o proceso de extensión do uso do galego de xeito coordinado e planificado. O labor do CDSG nesta rede incidirá na realización de labores de apoio e difusión documental. Ademais, os fondos dixitalizados do centro de documentación estarán dispoñibles para as unidades técnicas e os membros integrantes da rede a través da web.

Oferta formativa e organización de encontros

Ademais, o protocolo establece un marco de colaboración en materia de formación e desenvolvemento de espazos de reflexión. Neste sentido, Política Lingüística e o Consello cooperarán na organización dos Encontros para a Normalización Lingüística, de carácter anual, que buscan promover a formación dos técnicos dos servizos lingüísticos de Galicia, así como difundir novas iniciativas dinamizadoras, materiais e estudos sobre lingua galega.

Unha política lingüística transversal

Co fin de promover o uso da lingua galega desde unha perspectiva transversal e da implicación dos axentes sociais, a Consellería de Educación, a través da Secretaría Xeral de Política Lingüística, mantén unha colaboración permanente con entidades de diferentes ámbitos, a través, coma neste caso, de acordos que contribúen ao desenvolvemento da súa actividade.

O Consello da Cultura Galega

O Consello da Cultura Galega créase pola Lei 8/1983, do 8 de xullo, como un ente estatutario con personalidade xurídica propia e plena capacidade para o cumprimento dos seus fins. Ten carácter de órgano asesor e consultivo, con capacidade de iniciativa, investigación e organización, e compételle a defensa e a promoción dos valores culturais do pobo galego. Está composto por representantes de entidades e personalidades sobranceiras dos diversos campos da cultura galega.

Entre os obxectivos do CCG, figuran a consideración da realidade cultural desde unha perspectiva integradora, a recuperación da cultura propia aberta ao diálogo coas outras culturas da humanidade e, especialmente, coas do noso contorno. Entre as súas competencias figuran, entre outras, fomentar a lingua e a cultura galegas como creacións orixinais do pobo galego, entendidas non só como unha herdanza que cómpre conservar e transmitir, senón como patrimonio que cada xeración debe coidar e mellorar.