A Consellería de Cultura e Educación recoñece a excelencia científica dos investigadores do Programa Isidro Parga Pondal do ano 2008 coa acreditación da súa produción

A Consellería de Cultura, Educación e Ordenación Universitaria vén de resolver o proceso de acreditación do cumprimento dos requisitos de calidade de produción e actividade científico-tecnolóxica, que implican unha traxectoria destacada para os investigadores do último ano do Programa Parga Pondal convocado en 2008. Dos 17 expedientes sometidos a este proceso de análise, levado a cabo a través da Axencia de Calidade do Sistema Universitario de Galicia, todos eles foron avaliados positivamente, e recibirán a certificación que o acredita.

Deste xeito o departamento educativo da Xunta de Galicia dá un novo impulso ao sistema galego de I+D. Non en balde, esta avaliación, que se realiza no último ano do contrato, supón para os investigadores que a superaron o recoñecemento de que o seu traballo está acorde cos requirimentos de excelencia científica.

Dos investigadores avaliados, 9 corresponden á Universidade de Santiago de Compostela, 6 á de Vigo e 2 á da Coruña. A duración do contrato de cada investigador foi de cinco anos e desenvolveuse entre o 2008 e o 2013.  O custe total do Programa Isidro Parga Pondal correspondente a adxudicación do ano 2008 foi de 4.248.000 euros e nel participaron un total de 25 investigadores dende o seu inicio. En concreto, cada un dos 17 investigadores avaliados percibiu unha media de case 180.000 euros durante todo o tempo que estivo no programa.

O obxectivo do Programa Parga Pondal é contribuír á incorporación de recursos humanos do sistema de I+D de Galicia mediante as axudas á contratación de doutores cunha formación investigadora acreditada en organismos científicos estatais ou estranxeiros, nas universidades do Sistema Universitario de Galicia.