A Consellería de Cultura e Educación presenta en Santiago a actividade de dinamización lingüística ‘O Señor das Dunas’

A Consellería de Cultura, Educación e Ordenación Universitaria, por medio do seu secretario xeral de Política Lingüística, Valentín García, anunciou hoxe en rolda de prensa que a actividade de dinamización lingüística ‘O Señor das Dunas’, destinado ás entidades da Rede de Dinamización Lingüística (RDL), chegará esta fin de semana á capital de Galicia no marco do programa ‘FalaRedes’.

O espectáculo de contadas ilustradas en area rescata da tradición oral galega un total de cinco historias narradas por un vello contacontos que o discípulo e compañeiro de viaxes deste vai debuxando por medio de viñetas proxectadas. O público pode seguir, a tempo real, a elaboración dos debuxos nunha pantalla grande na que se plasman as imaxes ilustradas.

Na rolda de prensa de presentación acompañaron a García Gómez a concelleira de Normalización Lingüística, Rebeca Domínguez, e mais Francisco Castro, representante da empresa xestora, Merlín Comunicación. O secretario xeral destacou a importancia deste tipo de actividades para “ofrecer unha imaxe renovada da lingua galega, asociada á modernidade é a técnicas novidosas”. Manifestou ademais que son as actuacións coma estas as que permiten achegarlle o idioma ao público de todas as idades por medio da creación de  “espazos de uso que favorezan a interacción en galego”.

Ademais, o secretario xeral avanzou que ao remate da función, cada espectador recibirá como agasallo a versión física dos ‘Cinco contos galegos’ nos que se centra o espectáculo “para fomentar a lectura, a aprendizaxe da lingua e a transmisixón interxeneracional do galego”. Os máis interesados na vella arte de contar historias poderán manexar un manual dispoñible no web institucional da Secretaría Xeral de Política Lingüística: www.xunta.es/linguagalega/arquivos/contos_arredor_microondas.pdf.

Rede de Dinamización Lingüística

O programa de dinamización lingüística FalaRedes botou a andar o pasado mes de marzo, cos obxectivos de crear espazos de uso e aprendizaxe do galego ligados ao lecer, á cultura xuvenil e ás tecnoloxías da información e da comunicación (TIC). As tres actividades que se impulsaron, destinadas a segmentos de idade diferenciados – O Señor das Dunas para o público xeral, Títerehop para adolescentes e Galego de Cine para cativos-,  contabilizan máis de 235 sesións repartidas polos máis de cen municipios que conforman a RDL.

A RDL é unha iniciativa impulsada pola Xunta de Galicia, a través do departamento que dirixe Xesús Vázquez co obxectivo de establecer vías estables de colaboración, cooperación e coordinación entre as administracións local e autonómica para avanzar na promoción planificada do noso idioma .Entre os seus principais propósitos figuran os de ampliar os usos do galego, incrementar o seu prestixio e favorecer a súa visibilidade nos distintos ámbitos sociais.

Na actualidade configuran a RDL preto de 130 entidades, entre municipios, fundacións, asociacións, colexios profesionais e consorcios, o que supón unha nova dinámica de traballo que permite optimizar os recursos e evitar duplicidades para favorecer unha promoción social da lingua máis eficiente e eficaz.

Toda a información sobre FalaRedes e o seu calendario de actividades por concellos están dispoñibles no web institucional da Secretaría Xeral de Política Lingüística www.xunta.es/linguagalega/falaredes e tamén nas redes sociais.