‘FalaRedes’ e ‘Os Axóuxeres’ enchen esta ponte de actividades nos concellos da Rede de Dinamización Lingüística

A Consellería de Cultura, Educación e Ordenación Universitaria, a través da Secretaría Xeral de Política Lingüística, nutre dun amplo abano de actividades as localidades da Rede de Dinamización Lingüística (RDL) durante a ponte de novembro. En total, serán sete municipios das provincias da Coruña e Ourense os que ofrezan ás súas veciñanzas os espectáculos de artes escénicas e plásticas cos que a Xunta de Galicia pretende achegar unha imaxe moderna da lingua galega e favorecer o seu uso e transmisión interxeracional.

Porqueira, Ferrol, Oleiros, San Cristovo de Cea, A Coruña, Vilamarín e A Peroxa serán nesta ocasión os concellos anfitrións das accións dinamizadoras de dous dos programas impulsados polo departamento que dirixe, en funcións, Xesús Vázquez Abad: Os Axóuxeres e FalaRedes.

Cantar e brincar cos Axóuxeres

A xente miúda da casa moverase ao ritmo do espectáculo musical dos Axóuxeres, deseñado especificamente para bebés de 0 a 3 anos acompañados polos seus pais e nais. Os protagonistas son membros dunha familia de bonecos de xoguete que vive encol dunha mesa: Xan, Iria e Pelouro, xunto co seu amigo marciano R01 –ou Roi para os pequenos-, que cantarán e bailarán cos máis pequenos en galego para fomentar a transmisión interxeracional da lingua propia de Galicia.

Estes encontros teatrais desprazaranse durante a fin de semana a Ferrol, a Oleiros e á Coruña dinamizando o idioma galego no tempo de lecer. Á sesión de Ferrol, o sábado ás 12:00 horas na Sala de Usos Múltiples do Pavillón Municipal da Malata, asistirá o secretario xeral de Política Lingüística e presidente da RDL, Valentín García Gómez.

A entrada dos encontros é de balde, pero cómpre reservar –telefonicamente- praza dende unha semana antes da súa celebración. Para coñecer as experiencias das familias nos encontros teatrais, xa está aberto un espazo de participación en internet, na que aqueles asistentes que narren a súa vivencia entrarán no sorteo de 15 lotes de produtos infantís de lecer en galego: http://www.xunta.es/linguagalega/experiencia_encontros_axouxeres

Amais destes encontros, o programa dos Axóuxeres 2012 vén cargado de sorpresas. A súa concepción como proxecto transmedia está a facer posible que os máis pequenos da casa vibren coas aventuras desta particular familia por medio un espazo televisivo propio na TVG2, que se emite en tres franxas horarias: pola mañá, ao mediodía e á tarde. Ademais de pasar un anaco divertido na compaña dos bonecos, os cativos irán aprendendo a palabras, xogos e cancións en galego.

Os encontros dixitais, que se porán en marcha a partir do 10 de novembro, achegarán o cinema interactivo en gran formato a outras 20 localidades da RDL. Os destinatarios serán, neste caso, os pequenos de 3 a 6 anos e as súas familias.

O ambicioso proxecto dos Axóuxeres 2012 compleméntase cunha plataforma en internet, na que xa se pode descargar música e xogos para continuar brincando dende o ordenador ou os dispositivos móbiles. Todas as aplicacións, calendario e información, pódense consultar na web www.xunta.es/linguagalega/os_axouxeres_2012.

Historias contadas sobre area

Outra das actividades coa que a Secretaría Xeral de Política Lingüística quere dinamizar o uso da lingua galega chegará durante a ponte a Porqueira, a San Cristovo de Cea, a Vilamarín e á Peroxa.

Trátase do espectáculo de contacontos e ilustración sobre area do Señor das dunas, encadrada nun programa máis amplo: FalaRedes. Por medio de sesións de 50 minutos de duración un lendario bibliotecario vaille achegando aos participantes cinco historias tradicionais galegas, mentres que o seu discípulo debuxa as pasaxes sobre a area. A oralidade, a imaxe e a música adentrarán os asistentes nun ambiente máxico, co que o programa FalaRedes quere chegar ao público de todas as idades.

Ao remate da sesión, e para fomentar continuar coa tarefa de ler e contar nos fogares, cada asistente recibirá un libro que recompila os Cinco contos galegos da actuación, ilustrado cos debuxos feitos na area. A maiores, para quen queira afondar na vella arte de contar historias, xa está ao seu dispor un manual dixital en: http://www.xunta.es/linguagalega/arquivos/contos_arredor_microondas.pdf

Toda a información, calendario e actividades de FalaRedes en: www.xunta.es/linguagalega/falaredes