Cultura e Educación promove unha unidade didáctica interactiva para axudar os escolares de primaria e secundaria a coñecer a vida e a obra de Celso Emilio Ferreiro

Os centros de ensino son os destinatarios de dúas actividades programadas pola Consellería de Cultura, Educación e Ordenación Universitaria para o último trimestre deste 2012, proclamado Ano Celso Emilio Ferreiro polo Parlamento Galego co gallo do centenario do nacemento do escritor e político ourensán. O vindeiro luns comezará a súa itinerancia nos centros educativos unha instalación multimedia sobre o autor e a partir de hoxe están dispoñibles dúas unidades didácticas interactivas, adaptadas aos niveis de primaria e secundaria, tamén sobre o poeta de Celanova.

Estes dous materias, desenvolvidos pola Secretaría Xeral de Cultura, permitiranlle ao alumnado descubrir, mediante xogos, a obra e a vida de Celso Emilio Ferreiro.

Un enfoque interactivo e lúdico para achegarse a Celso Emilio

As novas unidades didácticas dispoñibles no espazo Abalar da Consellería de Cultura e Educación, de acceso aberto, están diferenciados en dous niveis de dificultade, unha para alumnado de primaria e o outra destinada ao de secundaria. Ambas as dúas, cunha mesma estrutura e metodoloxía, repasan a vida e obra do poeta celanovés a través de seis etapas vitais diferentes, con textos descritivos e propostas de actividades lúdicas interactivas que os introducen tamén na súa creación poética.

A superación dos diferentes retos en forma de dameiros, chuvias de palabras e cuestionarios permítenlle ao alumno ir sumando puntuación como elemento de motivación para superar novas probas. No desenvolvemento destas actividades os participantes acceden a fotografías do autor, os seus textos orixinais e mesmo á voz de Celso Emilio recitando os poemas da súa autoría.

Optimizada para o Abalar

A unidade didáctica de Celso Emilio Ferreiro é unha aplicación web deseñada e optimizada para os ultra-portátiles do proxecto Abalar. Foi desenvolvida con JavaScript e HTML5, atendendo as recomendacións da W3C e con obxectos como canvas e audio para a creación das animacións e transicións, que permiten tamén a reprodución de son sen necesidade de utilizar complementos, reprodutores nin plugins. Está accesible en http://www.edu.xunta.gal/espazoAbalar/espazos/recursos

Celso Emilio, tamén en itinerancia nos centros de secundaria

Logo do seu paso por bibliotecas no primeiro semestre do ano, a mostra interactiva inicia o seu percorrido polos centros de ensino secundario das catro provincias. A partir do luns será o alumnado do IES Rodolfo Ucha de Ferrol o que dispoña desta instalación para ampliar os seus coñecementos sobre Celso Emilio Ferreiro.
A exposición baséase nun formato interactivo e novidoso que inclúe imaxes, poemas musicados, audiovisuais, xogos interactivos e mesmo gravacións sonoras co recitado de Celso Emilio Ferreiro. Xunto coa instalación multimedia, tamén se exhiben algúns dos seus obxectos persoais, entre os que se inclúen unhas lentes, a súa máquina de escribir e unha cámara fotográfica.
A Xunta de Galicia vén promovendo desde o mes de xaneiro un extenso programa para contribuír á difusión social deste autor, que pode consultarse en http://cultura.xunta.es