A Consellería de Cultura, Educación e Ordenación Universitaria, representada polo secretario xeral de Política Lingüística, Valentín García, inaugurou hoxe a XXV edición dos Cursos de verán de lingua e cultura galegas para estranxeiros e españois de fóra de Galicia, que se están a desenvolver na Universidade de Santiago de Compostela (USC) ata o vindeiro 27 de xullo.

No acto de inauguración, que tivo lugar na sede da Real Academia na Coruña (RAG), participaron, amais de García Gómez, o presidente da RAG, Xosé Luís Méndez Ferrín; o vicerreitor de Relacións Exteriores e Internacionalización da universidade compostelá, Víctor Millet; a directora do Instituto da Lingua Galega (ILG), Rosario Álvarez Blanco; e o director dos cursos, Francisco Fernández Rei.

O secretario xeral déulles aos 86 alumnos e alumnas matriculados a benvida “a Galicia e ao galego” e animounos “a aproveitar a súa estadía nunha cidade tan emblemática e internacional como é Compostela, como oportunidade única de convivir coa lingua e coa cultura galegas”. García Gómez salientou a importancia “destes cursos na proxección internacional do galego, ao favoreceren dinamizar a lingua de noso máis aló das nosas fronteiras, así como consolidar o uso activo do idioma, en maior ou menor medida, noutros continentes”. O titular de Política Lingüística puxo en valor “o papel crucial que xogan a RAG e o ILG na difusión mundial do galego, tanto a través desta iniciativa coma das outras moitas que desenvolven en prol da súa difusión, coñemento e dignificación”.

Achegarse de primeira man ao galego

O obxectivo dos cursos é o de darlle a oportunidade ao alumnado de familiarizarse coa lingua galega e coa realidade sociocultural de Galicia. Para acadar este fin, a programación dos cursos contempla -amais das habituais clases teóricas e prácticas de lingua- conferencias sobre literatura, historia, música, arte etc., canda o visionado de filmes e documentais de produción galega. O amplo programa de actividades complementarias inclúe visitas de interese cultural e paisaxístico que propiciarán o despregamento do grupo de estudantes por moitos dos lugares máis senlleiros do país.

Catro niveis de aprendizaxe

Os cursos programan distintos niveis: elemental 1, de iniciación á lingua para quen desexe introducirse no seu coñecemento; elemental 2, destinado a quen xa realizou o curso elemental ou que posúa un coñecemento básico do idioma; medio -no que hai matriculado un maior número de persoas, entre as que se atopan estudantes que cursan lingua galega nos Centros de Estudos Galegos dependentes da Consellería de Cultura e Educación, a través da Secretaría Xeral de Política Lingüística- e mais un curso superior de Filoloxía Galega, que inclúe catro seminarios impartidos por profesorado da titulación homóloga da USC, para quen cursou o nivel medio ou acredite un bo dominio do galego.

86 alumnos e alumnas de 22 países de Europa, América e Asia

Logo de vinte e cinco edicións destes cursos de verán, xa levan participado neles arredor de 2.500 alumnos e alumnas de diferentes países do mundo. Nesta, fano un total de 86 estudantes procedentes de 22 estados diferentes: Alemaña, Arxentina, Brasil, Reino Unido, Chile, Croacia, Estados Unidos, Finlandia, Francia, Hungría, Irlanda, Italia, Kazakhstan, México, Polonia, Portugal, Romanía, Rusia, Serbia, Ucraína, Xapón e España. Neste último caso, os lugares de procedencia do alumnado son O Bierzo, Cataluña, Euskadi, Andalucía, Madrid, Estremadura, Canarias e Valencia.

Estreita colaboración institucional para garantir a oferta de cursos de verán

A consellería dirixida por Xesús Vázquez Abad organiza durante este mes cursos de verán de lingua e cultura galegas para persoas estranxeiras en colaboración coa RAG e co ILG (USC) e mais coa Universidade da Coruña. Mercé a esta colaboración un total de 109 alumnos e alumnas procedentes de catro continentes (Europa, América, Asia e África) e de 24 estados diferentes achéganse por primeira vez ao galego, ou perfeccionan a súa competencia previa adquirida sobre o idioma.