O conselleiro de Educación e Ordenación Universitaria, Xesús Vázquez Abad, asistiu hoxe ao acto de inauguración da cátedra de Hidroloxía Médica USC-Balnearios de Galicia. No mesmo acto tamén quedaron abertas as clases de libre configuración para 116 alumnos e alumnas.

Durante a súa intervención o conselleiro sinalou que “o Turismo Termal de Galicia encóntrase a cabeza de España pola diversidade da súa oferta e os servizos que ofrece. O que deu lugar a elaboración deste gran proxecto entre a Asociación de Balnearios de Galicia e a Facultade de Medicina de Santiago de Compostela que rematou coa segunda cátedra de Hidroloxía Médica a nivel de España, o que supón un importante avance e estímulo para o sector do termalismo”.

A cátedra estase a impartir na Facultade de Medicina- Universidade de Santiago de Compostela- e é respaldada pola Secretaría Xeral de Turismo. No acto de apertura estiveron o reitor da USC, Senén Barro; o director da cátedra, Dr. Gestal; o presidente da Asociación de Balnearios de Galicia, Rafael Luaña; o decano da Facultade de Medicina da USC, Dr. Fraga, a Secretaria Xeral para o Turismo da Consellería de Cultura, Carmen Pardo. O relatorio correu a cargo do profesor Luis Rodríguez Miguez que interveu co ‘O termalismo en Galicia de cara ao século XXI’.

Obxectivos do curso

O principal obxectivo destes estudos son fomentar o traballo docente, así como a investigación e a difusión dos coñecementos no campo da Hidroloxía Médica. Ademais a través da cátedra organízanse cursos, seminarios ou conferencias; ao tempo que  se promove a investigación neste eido; favorecendo a difusión e todos os coñecementos relativos á aplicación da hidroloxía no eido da medicina. Os estudos que se imparten en Santiago son os segundos desta rama aos que os estudantes poden acceder en España, a primeira impártese na Facultade de Medicina da Universidade Complutense de Madrid.

Partindo destes obxectivos, a Cátedra desenvolverá ao longo deste ano numerosas actividades que abranguen a actividade docente de grao, posgrao e formación continua, actividade investigadora e o fomento de vocacións profesionais en Hidroloxía Médica. Deste xeito, dentro da licenciatura de Medicina impartirase a materia de libre elección ‘Hidroloxía Médica’, cun programa de estudos xa adaptado a Bolonia. Ademais está prevista a elaboración dunha monografía cos materiais docentes que sirva como guía aos estudantes. 

Fomentar a investigación

No eido do posgrao, a Cátedra organizará en colaboración cos colexios oficiais de médicos de Galicia nas súas sedes provinciais e comarcais unhas sesións específicas dirixidas aos médicos de atención temperá. E, coa finalidade de fomentar a investigación, están previstas dúas sesións monográficas organizadas por Manuel Freire Garabal que levan por lema ‘Hidroterapia, dende o empirismo á evidencia científica’. Nelas incidirase na hidroterapia como coadxuvante do cancro e na cura termal na patoloxía dermatolóxica.

Na liña de favorecer o fomento deste campo de estudo entre os estudantes de Medicina, estase a traballar con Balnearios de Galicia na creación e financiamento dunhas bolsas dirixidas a alumnos de 4º e 5º curso para a realización de estadías nun balneario de dous a tres meses no período estival, participando activamente nas actividades que se organizan nestes centros.