Román Rodríguez felicita o IES Urbano Lugrís da Coruña polo seu 50º aniversario e subliña o seu compromiso coa formación de calidade

O conselleiro de Educación, Ciencia, Universidades e Formación Profesional, Román Rodríguez, asistiu hoxe á celebración do 50º aniversario do Instituto IES Urbano Lugrís, ao que cualificou como “un referente educativo na Coruña, sempre en constante evolución para dar resposta aos retos que presentan as novas xeracións de estudantes”. O centro, que conta actualmente con máis de 700 alumnos, continúa a súa traxectoria educativa cun compromiso coa formación de calidade.

Román Rodríguez estivo acompañado polo director xeral de Centros e Recursos Humanos, Jesús Álvarez, eloxiou o labor da comunidade educativa do IES Urbano Lugrís ao longo deste medio século e destacou a súa dedicación á formación da mocidade coruñesa. “Este instituto converteuse en moito máis ca un centro educativo, porque forma parte xa da memoria afectiva e académica de varias xeracións de coruñeses”, salientou o conselleiro.

O evento de celebración reuniu a docentes, alumnos e exalumnos. A xornada incluíu a proxección dun vídeo conmemorativo, intervencións de membros da comunidade educativa e a entrega de obsequios creados polos Polos Creativos e o Equipo de Dinamización da Lingua Galega. Como peche simbólico, soterrouse unha cápsula do tempo que se abrirá dentro de 50 anos, e os corredores do centro albergan unha exposición con imaxes e documentos que percorren a súa historia desde a súa fundación.