A Xunta apoia ao Centro de investigación mariña con case 5 M€ para reforzar o seu traballo nas áreas de cambio climático e biotecnoloxía azul

O secretario xeral de Universidades, José Alberto Díez, e o reitor da Universidade de Vigo (UVigo), Manuel Reigosa, visitaron hoxe o Centro de investigación mariña, CIM, da UVigo, para coñecer as súas liñas de investigación e funcionamento. O centro, ao que a Xunta de Galicia apoia con case 5M€ e no que traballan 186 investigadores, forma parte da Rede CIGUS que agrupa aos dez centros de investigación excelente do Sistema Universitario de Galicia.

O representante da Consellería de Educación, Ciencia, Universidades e FP destacou o traballo que se realiza no CIM, centrado no cambio climático e na biotecnoloxía azul con catro liñas de investigación actuais baseadas nas prioridades científico-técnicas actuais: acuicultura e marisqueo, contaminación mariña, impacto do cambio climático e enerxías renovables mariñas. 

Durante a visita tamén se puxo en valor o apoio do Goberno galego a este centro da UVigo, no que se leva investido case 5M€ a través das convocatorias dos centros de excelencia e de equipamento científico, entre outras. Este financiamento fixo tamén posible o desenvolvemento doutras infraestruturas singulares, como un buque oceanográfico propio, que constitúe unha fortaleza estratéxica para o impulso das liñas de investigación do centro.

O CIM naceu coa misión de contribuír á conservación e uso sustentable dos océanos, mares e recursos mariños a través da xeración e transferencia de coñecemento baseado na ciencia, na tecnoloxía e na innovación. Ten acadado numerosos logros, entre os que destacan fitos científicos como a regulación da inxesta en peixes para unha alimentación máis sustentable ou o desenvolvemento de ferramentas informáticas para avaliar cambios en poboacións ao longo de xeracións, así como o fortalecemento das infraestruturas do centro de investigación.

Así mesmo, vincúlase activamente coa transferencia de resultados de I+D+i. A través do convenio de I+D asinado entre a Xunta de Galicia e a Universidade de Vigo para o período 2023-2024, promovéronse 52 patentes e 16 spin-offs no conxunto da Universidade, o que reflicte o impacto real da investigación na economía e na sociedade galega.