Rueda reivindica a FP como motor de cambio e progreso ante os desafíos tecnolóxicos e laborais
Celebra o modelo exemplar da FP galega, que conta cunha inserción laboral próxima ao 85% para os seus alumnos e de practicamente o 100% no caso da FP Dual
O encontro rexistra nesta edición preto de 11.000 asistentes, case 2.000 máis que o ano pasadoO encontro rexistra nesta edición preto de 11.000 asistentes, case 2.000 máis que o ano pasado
O presidente da Xunta, Alfonso Rueda, acudiu hoxe á 7ª edición do congreso Innova FP, que se celebra na Cidade de Cultura ata o 28 de marzo, e que reúne as propostas de investigación e innovación máis punteiras desenvoltas no entorno dos centros de FP de Galicia, con énfase este ano na dixitalización e na Industria 5.0. Esta edición conta con preto de 11.000 asistentes, case 2.000 máis que o ano anterior.
Rueda reivindicou o modelo de éxito da FP galega como un exemplo a nivel nacional, salientando os datos de inserción laboral do alumnado (próxima ao 85%, e de practicamente o 100% no caso da FP Dual), do aumento da matrícula (case 96.000 alumnos de FP este curso en Galicia, 7% máis que o ano anterior) e da colaboración do tecido empresarial (preto de 1.800 entidades).
O xefe do Executivo galego insistiu na necesidade de seguir ampliando a oferta académica, mellorando a dotación dos centros e activando programas que se axusten ás novas necesidades do tecido produtivo. Neste senso, describiu Innova FP como o mellor escaparate posible á realidade empresarial para coñecer as tecnoloxías e ferramentas innovadoras axustadas ao perfil profesional.
Exemplos dos expositores deste congreso inclúen o emprego da IA no sector da hostalería; o desenvolvemento de vehículos eléctricos de máxima eficiencia; a incorporación da Internet das Cousas e a robótica no crecemento e tratamento de cultivos; ou obradoiros sobre biotecnoloxía e deseño de videoxogos, entre outros.