A Xunta presenta ‘Galicia Educa’, o calendario de feiras do ensino para dar visibilidade ao bo traballo dos centros e impulsar a orientación do alumnado

O conselleiro de Educación, Ciencia, Universidades e FP, Román Rodríguez, participou esta mañá na presentación do calendario de feiras educativas de Galicia, Galicia Educa. Unha nova iniciativa, tal e como explicou, que ten como obxectivo difundir estas mostras, que se celebran tanto a nivel autonómico como provincial, comarcal e local, de tal forma que os centros educativos as coñezan e poidan organizar visitas do seu alumnado.

O titular do departamento educativo da Xunta sinala que estas feiras “son unha oportunidade única para a orientación vocacional e profesional dos estudantes e das súas familias”. Neste sentido, destacou que nestes eventos unen as súas forzas os distintos axentes e administracións implicadas na educación, xa que se expoñen diferentes ofertas formativas, desde a de FP e universitaria ata as relacionadas cos Corpos e Forzas de Seguridade do Estado.

“Con este calendario queremos, ademais, dar visibilidade o traballo de centros escolares de toda Galicia, que participan nestas citas tanto como organizadores como expoñendo as súas boas prácticas e proxectos, como exemplo para o resto da comunidade educativa”, afirmou Román Rodríguez.

“É moi importante que o alumnado e os docentes conten con este tipo de escaparates onde amosar orgullosos o magnífico e innovador traballo que se realiza nas aulas galegas día a día, que é unha boa mostra ademais da igualdade de oportunidades que dá o noso sistema educativo”, salientou o conselleiro.

Citas novas neste 2025

Galicia Educa inclúe un total de 17 feiras educativas que se desenvolven ao longo de todo o curso escolar en diferentes puntos da xeografía da Comunidade. Seis delas son de nova creación este ano, tres baixo a organización directa da Xunta de Galicia.

No ámbito autonómico nace este ano STEMgal25, co obxectivo de amosar a integración destas competencias e as dixitais en todas as áreas do currículo e a utilidade das mesmas ao servizo dun sistema educativo de vangarda. Neste evento, que se celebrará no mes de xuño na Cidade da Cultura de Galicia, poranse en valor os proxectos do centros educativos neste ámbito, en especial os vencellados a programas de fomento do pensamento crítico, científico e computacional en todos os campos e saberes.

No eido provincial, Xunta, Deputación e Expourense organizarán unha nova feira educativa para impulsar o intercambio de experiencias, a aprendizaxe colaborativa e o fortalecemento das relacións entre os diferentes niveis de ensino e entre alumnos, centros, docentes, directores e outros expertos vinculados ao sector. O evento desenvolverase no recinto feiral da cidade das Burgas os vindeiros 2 e 3 de abril e servirá tamén como lugar de encontro para compartir experiencias e boas prácticas.

Xa na segunda quincena de maio, impulsarase na Coruña a I Feira da Educación, Formación e Emprego, que se situará en Palexco. Trátase dun espazo de innovación e colaboración educativa, que se realizará da man da Cámara de Comercio, e que porá en valor o traballo re para dar continuidade á orientación académica e facilitar unha adecuada elección na toma de decisións sobre o futuro profesional do alumnado. 

No ámbito comarcal, no mes de xuño Lalín acollerá a Feira da Acción educativa, que se situará en varios espazos das rúas. Coorganizada co Concello, incluirá a participación de centros de diferentes etapas que amosarán o seu traballo en innovación e tecnoloxía, arte e creatividade, aprendizaxe baseada en proxectos e metodoloxías activas.  

Tamén naceron este ano outras dúas citas, xa desenvolvidas: a I Feira de Orientación académica e profesional de Padrón, organizada polo Instituto IES Macías O Namorado, e a I Feira de Orientación Profesional de Verín, impulsada polos IES Castro de Baronceli, Xesús Taboada Chivite e García Barbón.

Próximas grandes citas

A próxima gran feira educativa será FP Innova 2025, o Congreso de Innovación na Formación Profesional, que se celebrará entre os días 26 e 28 de marzo na Cidade da Cultura de Galicia. Trátase da sétima edición dun evento que se constitúe como referente na difusión da innovación didáctica e tecnolóxica, da transferencia de coñecemento e da capacidade de emprender na que está inmersa a FP de Galicia.

O 29 de abril celebrarase en Santiago o Congreso de Inclusión Educativa, co obxectivo de impulsar a formación neste ámbito, sensibilizar sobre a importancia de valorar a diversidade como recurso para enriquecer a aprendizaxe do alumnado e potenciar o intercambio de boas prácticas e experiencias. Está dirixido a profesorado e inspectores.

Xa no último trimestre do ano desenvolverase, tamén en Santiago, o Congreso de Convivencia e Benestar Emocional. Trátase evento de formación docente deseñado para que persoas expertas no ámbito da convivencia e do coidado das emocións poidan achegar aos profesionais galegos da educación as súas experiencias e coñecementos.

O calendario de feiras autonómicas complétase con InnovArt, celebrada o pasado mes de febreiro, o maior evento en Galicia de promoción e difusión as ensinanzas artísticas, de idiomas e deportivas, á que asistiron máis de 7.000 persoas. 

Feiras provinciais

Ademais das dúas novas feiras provinciais, na Coruña e Ourense, este ano celebraranse novas edicións das citas das provinciais de Lugo e Pontevedra. A II Feira de Educación, Formación e Emprego celebrarase os días 9 e 10 de abril na cidade da Muralla. Coorganizada coa Fundación de Feiras e Exposicións de Lugo, céntrase en amosar a ampla oferta académica da provincia, tanto a nivel universitario como de FP.

Entre os días 8 e 10 de outubro desenvolverase en Pontevedra o 14º Salón da oferta de educación e formación de Galicia, Edugal, co obxectivo de dar resposta ás necesidades de información sobre a oferta formativa e orientación educativa de estudantes, centros, profesionais da educación e familias. Co apoio da Xunta, está organizada pola Asociación de empresarios de Pontevedra (AEMPE) e o Concello de Pontevedra.

Igualdade de oportunidades

As feiras educativas son un bo exemplo da igualdade de oportunidades que ofrece o sistema educativo galego. Así, Galicia Educa inclúe ata oito citas nas que os centros, a nivel local, expoñen os seus traballos e bos prácticas. Ademais das creadas este ano, o calendario inclúe a celebración nos próximos días da VI Xornada de Orientación da Comarca de Ferrol (20 de marzo, organizada polo CIFP Leixa) e da IV Mostra sobre Educación e Formación FormaMos (20 e 21 de marzo, organizada polo Concello de Mos).

O 24 de abril desenvolverase en Negreira a Feira das Profesións, organizada polos IES Xulián Magariños, de Brión, do Milladoiro e Plurilingüe de Ames, e do 3 ao 6 de xuño o V Congreso educativo Educods (Tui), impulsado polo Colexio CEIP Plurilingüe nº1, o Concello e a Xunta. O calendario complétase coa XXX Feira da Ciencia, impulsada polo Concello de Ribadeo e os centros do municipio e que se celebrará no mes de xuño.