As escolas de Arte e superiores de Deseño Pablo Picasso (A Coruña) e Ramón Falcón (Lugo) impartirán catro ciclos plurilingües o vindeiro curso

As escolas de Arte e superiores de Deseño Pablo Picasso (A Coruña) e a Ramón Falcón (Lugo) impartirán catro ciclos plurilingües o vindeiro curso. Así se desprende da a resolución do PluriArt publicada hoxe no Diario Oficial de Galicia, programa polo que a Xunta de Galicia implantou por primeira vez no curso 2022/23 o plurilingüismo nas ensinanzas artísticas profesionais de artes plásticas e deseño que se imparten nas escolas de arte e superiores de deseño de Galicia.

En concreto, a Consellería de Educación, Ciencia, Universidades e FP autoriza a impartición na modalidade plurilingüe dos ciclos formativos de grao superior en Dourado, Prateado e Policromía e o de Ilustración, ambos da escola Pablo Picasso da Coruña. No caso da Escola de Arte e Superior de Deseño Ramón Falcón de Lugo, serán plurilingües o ciclo de grao medio en Serigrafía artística e o de grao superior en Fotografía. Ata o momento todos os proxectos optaron polo inglés como lingua estranxeira para o seu desenvolvemento.

Prórroga de seccións bilingües

Doutra banda, o Diario Oficial de Galicia publica hoxe a prórroga de seccións bilingües nas ensinanzas artísticas, co fin de seguir favorecendo a práctica de idiomas entre o alumnado. En concreto, desenvolveranse durante outros dous cursos as seccións en lingua inglesa nos conservatorios profesionais de música da Coruña, Santiago de Compostela e Vigo, así como a do Conservatorio Superior de Música de Vigo. Tamén se prorroga por outro bienio a sección bilingüe de lingua alemá na Escola de Arte Superior de Deseño Pablo Picasso (A Coruña).

Esta liña de actuación enmárcase na Estratexia Galega de Linguas Estranxeiras, Edulingüe 2030, que entre os seus obxectivos consolidar os programas de éxito de impulso do plurilingüismo e estendelos ás ensinanzas de réxime especial.