Galicia pide ao Goberno do Estado que conte coas CCAA no deseño dos fondos europeos para a educación, con criterios de reparto xustos e sostibles a medio prazo

Galicia comparte as liñas estratéxicas da educación do futuro centradas na dixitalización, na potenciación da FP e na equidade do sistema que foron prefixadas desde o Goberno do Estado sen contar coas CCAA, polo que agora a Xunta pide a participación autonómica na definición, o desenvolvemento e a planificación das accións concretas á hora do reparto de fondos europeos, así como criterios claros, transparentes e sostibles cunha planificación consensuada e rigorosa a medio e longo prazo.

Así o expuxo esta mañá o conselleiro de Cultura, Educación e Universidade, Román Rodríguez, que desde Galicia ofreceu a máxima colaboración ao tempo que reclamou unha “verdadeira cogobernanza, que vaia máis aló da retórica” que conte coas CCAA posto que “somos as xestoras do sistema”.

O titular de Educación comparte as liñas de traballo xenéricas do Goberno central, pero bota en falta que non se lle dera a oportunidade ás comunidades autónomas de "enriquecer as propostas, con medidas que posibiliten unha aplicación máis concreta e máis acorde á realidade educativa de cada un dos territorios”.

Planificación eficiente dos recursos a medio e longo prazo

Na súa intervención ante a Conferencia Sectorial, o representante autonómico reclamou que os criterios de reparto dos fondos europeos para a educación deben ser “transparentes e xustos”, ao tempo que demandou “flexibilidade” á hora de aplicar en cada territorio as distintas accións.

“Pedimos colaboración e flexibilización real para a execución destes fondos en base ás características propias de cada autonomía”, dixo o conselleiro, quen advertiu da necesidade de acadar unha planificación eficiente “que non xere un gasto público insostible a medio prazo”.

Ademais, dado que a execución dos fondos esixe dunha importante estrutura administrativa (co desenvolvemento de convocatorias, procesos de contratación...), Galicia expuxo que sería necesario coñecer canto antes tanto as accións como a planificación temporal das mesmas, para non poñer en risco a súa viabilidade.

Fondo específico para gastos de adaptación covid no próximo curso

Doutra banda, Román Rodríguez aproveitou a súa intervención na xuntanza para plantexar a organización dun fondo específico para que as CCAA poidan seguir facendo fronte aos gastos de adaptación ao contexto covid no sistema educativo durante o próximo curso escolar, unhas medidas que en Galicia supuxeron máis de 160 millóns de euros ata o de agora.

O conselleiro advertiu que “setembro está á volta da esquina”, polo que, ademais de falar de futuro, “tamén temos que falar de presente” para garantir a seguridade nas aulas. De aí que propoña un fondo non condicionado para seguir mantendo os protocolos e as medidas fronte a covid no vindeiro curso.

Tamén aproveitou para facer un resumo da situación epidemiolóxica nos centros educativos galegos, onde nestes momentos hai un claro descenso de número de casos, cun 23% menos que hai unha semana, logo dos picos acadados tras as vacacións de Nadal cando os centros estiveron pechados.

Estas cifras reflicten que os centros educativos, tal e como aseguran as autoridades sanitarias, son lugares seguros onde, salvo casos puntuais, non hai transmisión interna. Pero é preciso seguir mantendo todos os protocolos e medidas para garantir a máxima seguridade de aquí a final de curso.

Todas as comunidades autónomas coincidiron no diagnóstico da situación sanitaria, cunha evolución alcista de casos tralas festas, derivada principalmente das interaccións sociais e familiares, en consonancia coa dinámica do conxunto da poboación.