O programa de dinamización lingüística Bocaberta premia o talento dos máis novos nas letras galegas

O programa de dinamización lingüística Bocaberta premia o talento dos máis novos nas letras galegas a través do concurso de microrrelatos da actividade A guerra das bruxas, que organiza a Secretaría Xeral de Política Lingüística en colaboración coa Editorial Rodeira.

A gañadora e a finalista do concurso, Patricia Vázquez e Inmaculada Alonso, dúas rapazas de 3º de ESO do CPR Divino Maestro de Lugo, recibiron o premio esta mañá en Santiago de Compostela, nun acto que estivo presidido polo responsable de Política Lingüística, Anxo Lorenzo. O secretario xeral felicitou as galardoadas e recordoulles a todos os mozos e mozas que asistiron ao acto –compañeiros e compañeiras das premiadas– que eles son os auténticos protagonistas do programa Bocaberta, unha iniciativa que busca “achegarlles aos máis novos a lingua galega dun xeito lúdico, con actividades ligadas ao seu tempo de lecer e aos seus intereses”. “Con esta iniciativa –engadiu– queremos favorecer o uso do galego entre as franxas de idade máis novas, un sector prioritario na planificación da actividade dinamizadora da secretaría xeral, e promover unha visión positiva do idioma”.

Pasado, presente e futuro nunha pedra, de Patricia Vázquez, foi o relato gañador do concurso de microrrelatos d’A guerra das bruxas. O texto finalista, da autoría de Inmaculada Alonso, foi O feitizo da besta. Ademais, o xurado decidiu outorgarlle un accésit a Paula Torea, do IES Ramón Otero Pedrayo da Coruña.

Xunto con Anxo Lorenzo tamén participaron no acto, que tivo lugar na Biblioteca Pública  Ánxel Casal, a subdirectora xeral de Planificación e Dinamización Lingüística da secretaría xeral, Cristina Rubal; a directora da empresa Reverso, Concha Diéguez; e a responsable de edición da Editorial Rodeira, María Xesús Gómez. A representante da editorial, que formou parte do xurado do concurso, destacou “a dificultade que implica unha composición literaria narrativa breve como o microrrelato” e “asegurou que se hai algo complicado é conmover o lector, sacudilo, deixalo abraiado a través dunhas poucas liñas de texto”.

Unha viaxe lúdica pola lingua

O eixo central da actividade de Bocaberta A guerra das bruxas foi a realización de xincanas, para o que a Editorial Rodeira contou coa colaboración da empresa de servizos lingüísticos Reverso. A través da actividade, os rapaces e rapazas de entre 12 e 16 anos puideron realizar unha viaxe lúdica pola lingua baseada na historia do libro O clan da loba. Os mozos e mozas tiveron ocasión de continuar esta viaxe pola rede, a través dunha serie de actividades, entre elas o concurso de microrrelatos, para traballar contidos relacionados coa historia d’O clan da loba, como a cultura popular galega máis máxica, mitolóxica e lendaria.

Bocaberta 2010-2011 foi unha das apostas máis importantes en materia de dinamización lingüística da secretaría xeral, que levou máis de 700 actividades –obradoiros de banda deseñada, concertos para a mocidade e o público infantil, xincanas, espectáculos de maxia, monicreques etc.– polos 315 concellos de Galicia desde outubro de 2010 ata o pasado mes de maio. Para o deseño e execución das actividades que conformaron Bocaberta, a Secretaría Xeral de Política Lingüística contou  coa colaboración de 14 artistas e entidades, entre eles editoriais, discográficas e empresas de dinamización propiamente dita: UTE Azou, Eme2, OQOeditora, Editorial Galaxia, El Patito Editorial, Everest, Edicións Xerais, Kalandraka, Tambre, Ir Indo e Rodeira, ademais de Pablo Díaz e Anxo Fariña,