Educación presentou en Bruxelas o curso multimedia de chinés ‘Chinesecom’ na Conferencia de Multilingualismo EU-China

A Consellería de Educación e Ordenación Universitaria vén de presentar o curso multimedia de chinés que está a impulsar no marco do proxecto CHINESECOM (www.chinesecom.eu) na Conferencia “EU-China Conference on Multiligualism” (Conferencia en Multilingualismo EU-China) titulada “Language learning: an open window to the world” (Aprendizaxe de linguas: unha fiestra aberta ao mundo), celebrada en Bruxelas co gallo do Ano EU-China da Mocidade.

CHINESECOM foi seleccionado pola Comisión Europea para participar neste evento, que contou con máis de 200 asistentes, estudantes universitarios europeos e chineses, así como diversos representantes de la Comisión Europea e autoridades chinesas entre los que se atopan o director xeral da Dirección Xeral de Educación e Cultura da Unión Europea, Jan Truszczynsky, o director do Programa de Aprendizaxe Permanente da Dirección Xeral de Educación e Cultura da Unión Europea, Pierre Mairesse, e o conselleiro de educación na misión chinesa diante da UE, ME Yansheng.

Este proxecto impulsado desde a Consellería ten como obxectivo contribuír á mellora da competitividade das empresas europeas promovendo a adquisición de competencias en lingua chinesa, formación que vai dirixida tamén a aqueles mozos e mozas que queiran comezar a aprendizaxe do chinés, como medio para lograr una inserción laboral privilexiada.

Cómpre lembrar que o portal www.chinesecom.eu , está situado entre os catro cursos online de chinés máis valorados polo principal buscador da rede a nivel internacional, sendo un dos máis visitados. Este curso, o primeiro de chinés-galego, é o ademais o único existente en Europa con tradución a unha lingua minoritaria, o que pon á nosa comunidade nunha situación de líder en canto á formación en lingua chinesa.

Promoción da aprendizaxe de linguas

O encontro celebrado en Bruxelas tivo como obxectivo principal a promoción da aprendizaxe das linguas entre a mocidade europea e chinesa. Nesta liña presentáronse diversos proxectos relacionados coas linguas europeas e o chinés. Ademais realizáronse grupos de traballo arredor da aprendizaxe de idiomas e carreiras nun mundo globalizado, ás novas formas de aprender idiomas no marco dos retos que plantexan as novas tecnoloxías da información e a comunicación, e do diálogo intercultural.

O encontro celébrase co gallo do Ano da Mocidade EU-China, que busca promover o diálogo intercultural e fortalecer o entendemento mutuo entre as mozas e mozos europeos e chineses, incitar aos máis novos a apoiar o desenvolvemento das relacións entre Europa e China e a contribuír a asegurar unha cooperación estable e continuada entre os responsables políticos e as organizacións da mocidade.

Un proxecto europeo

CHINESECOM desenvolveuse a través dun proxecto desenvolvido dentro do marco do programa 'Lifelong Learning', da Unión Europea, e nel participaron socios de seis países europeos, ademais dunha universidade de Pequín. O éxito débese en gran medida ao carácter innovador do mesmo, que incorpora abundantes recursos multimedia dunha gran calidade, e ao importante esforzo que se vén realizando para a súa difusión internacional.

O proxecto, conta con dez unidades de aprendizaxe, así como información cultural e xeral sobre o país asiático, polo que está a ser xa utilizado como material didáctico para o ensino do chinés en centros tan prestixiosos como a Universidade de Manchester ou a de Amberes e algunhas delegacións do Instituto Confucio, institución oficial do Goberno Chinés para promover a súa lingua.

O que inicialmente comezou como unha ferramenta que respondía a unha necesidade empresarial de favorecer o acceso a un mercado emerxente, está a constituírse nun referente en termos de aprendizaxe tanto da lingua como da cultura chinesa, que está a ser unha das linguas máis demandada a nivel internacional.

O feito de dispor de traducións dos seus contidos a seis idiomas (castelán, galego, inglés, francés, alemán, italiano) fixo que a súa utilización se disparase nestes países, onde os escasos recursos multimedia dispoñibles eran ofrecidos unicamente con tradución ao inglés. Neste sentido, a inclusión do galego confirma o compromiso da Consellería de Educación e de toda a Xunta de Galicia coa difusión e promoción da lingua galega.