Román Rodríguez visita os talleres da nova FP de Vídeo dj no CIFP A Farixa

O conselleiro de Cultura, Educación e Ordenación Universitaria, Román Rodríguez, visitou hoxe o CIFP A Farixa, onde tivo a oportunidade de comprobar o funcionamento dos novos talleres do ciclo de grao medio en Vídeo disc-jockey, que se implantou este ano por primeira vez no centro e que é de única impartición en toda a provincia de Ourense. O titular do departamento educativo da Xunta de Galicia cualificou este centro como exemplo de calidade na FP galega, e lembrou que a implantación deste ciclo ten como obxectivo reforzar A Farixa como un dos 3 polos ou centros de referencia desta familia profesional, xunto co IES Imaxe e Son da Coruña e o IES Audiovisual de Vigo.

Román Rodríguez lembrou que o investimento en obras neste centro no 2016 ascendeu a máis de 190.000 euros, cos que se realizaron as reformas de espazos para a instalación desta nova titulación e se executaron outras pequenas melloras. O compromiso co CIFP enmárcase no investimento de máis de 2 millóns de euros programado o pasado ano para o Concello de Ourense en materia de obras en centros de ensino. Cómpre sinalar que neste momento xa está rematada a obra no IES Universidade Laboral de Ourense e están case rematados os trámites para iniciar a ampliación na EOI da cidade.

Aposta pola empregabilidade

O conselleiro quixo agradecer o traballo de toda a comunidade educativa do CIFP A Farixa, que fai deste un polo de referencia nestas ensinanzas, en Galicia e na provincia, un exemplo de innovación e unha clara aposta por dar oportunidades de emprego aos máis novos.

Neste sentido lembrou que o centro conta cun viveiro de empresa que neste momento conta con tres proxectos en xestación, e do que xa saíron outras 3 empresas que están a funcionar fóra do viveiro.