Educación reforza o Campus de Lugo como referente da investigación veterinaria coa mellora do Hospital Universitario Rof Codina

O conselleiro de Cultura, Educación e Ordenación Universitaria, Román Rodríguez, destacou que a mellora do Hospital Veterinario Universitario Rof Codina reforzará o Campus de Lugo como referente no eido da investigación veterinaria en Galicia, en España e en Europa. Así o expuxo con motivo da presentación do proxecto de remodelación e modernización do centro hospitalario, unha obra promovida pola Fundación Rof Codina e que conta co apoio financeiro da Consellería. Ao acto tamén asistiu o secretario xeral de Universidades, José Alberto Díez de Castro; o vicerreitor do Campus de Lugo, Javier Bueno; o director xerente da Fundación Rof Codina, Luis Felipe de la Cruz Palomino; o delegado territorial da Xunta na provincia, José Manuel Balseiro Orol; a alcaldesa de Lugo, Lara Méndez; e o presidente da Deputación, Darío Campos.

O titular do departamento educativo da Xunta de Galicia, na súa condición tamén de presidente da Fundación, explicou que o orzamento da obra ascende a preto de 900.000 euros –dos que a Secretaría Xeral de Universidades, como patrón da Fundación, achegará en torno a 375.000 euros– e que os traballos consistirán nunha reforma de xeito integral en aras de que o hospital siga funcionamento como un complexo docente, asistencial e investigador moderno e competitivo.

Reforma integral

En concreto, reestruturaranse determinados espazos mellorando as circulacións interiores da edificación e a propia habitabilidade dos recintos; renovaranse os acabados dos chans, teitos e paramentos verticais; substituiranse as portas interiores; e renovaranse determinados elementos das instalacións como tomas de osíxeno, protección contra incendios, etc. Por último, dotarase de novos elementos de instalación e ventilación e climatización naqueles espazos nos que a normativa actual os esixe. Estímase un prazo de execución de 42 semanas.

Provincia referente en ciencia veterinaria

Tal e como destacou Román Rodríguez, esta actuación súmase á inauguración o ano pasado do Centro de Biomedicina e Veterinaria, o Cebiovet, no que a Xunta investiu máis de 3,6 millóns de euros. Un centro de investigación e innovación de primeiro nivel que, xunto ao Hospital e á Facultade de Veterinaria, converten a provincia de Lugo nun territorio referente en canto a ciencia veterinaria se refire, favorecendo e promovendo tamén a transferencia á industria e aos sectores produtivos da zona.

Estes tres centros desenvolven o seu traballo no marco dun entorno favorable como é o Campus Terra, no que actualmente se está a traballar no seu Plan de Actuación 2017-2019. Cómpre lembrar que a especialización deste campus impulsará a investigación vinculada co territorio e cos sectores produtivos da zona, nomeadamente o agrario, o veterinario e o gandeiro.