A Xunta prevé realizar 2.400 actividades para actualizar a formación de preto de 20.000 docentes

A Consellería de Cultura, Educación e Ordenación prevé realizar o curso que vén 2.400 actividades de formación destinadas a preto de 20.000 docentes. Así o destacou hoxe o conselleiro Román Rodríguez con motivo da presentación do programa do curso 2016/2017 que, como principal novidade, deseña todos os contidos en base ás competencias que deben adquirir os docentes para axudalos no desenvolvemento da súa profesión, entre as que destaca a potenciación das competencias STEM (Ciencias, Tecnoloxía, Enxeñaría e Matemática).

Deste xeito, o novo plan establece por primeira vez un marco xeral de competencias profesionais docentes (entre as que se inclúen as competencias en TIC, ser interlocutor e guía no proceso de ensino e aprendizaxe, etc.), que favorecerán a mellora dos programas de formación, unha liña de traballo que a Consellería iniciou o curso pasado e que agora se ve reforzada.

Neste contexto, tamén compre lembrar a posta en marcha dun programa Erasmus +, en conxunto con cinco países da UE, que permitirá concretar aínda máis este marco competencial; así como o desenvolvemento dun grupo de traballo conxunto coas universidades galegas para analizar as necesidades no desempeño profesional dos futuros docentes.

Afondar nas linguas estranxeiras, nas TIC e na convivencia

Tal e como explicou o conselleiro, que estivo acompañado polo director xeral de Educación, FP e Innovación Educativa, Manuel Corredoira, así como por diferentes representantes do seu departamento, este novo programa axudará a personalizar a traxectoria formativa do docente nas diferentes fases.

Ademais, fundaméntase en dez obxectivos principais: acompañar aos docentes na implantación dos novos currículos e das novas materias de libre configuración, impulsar os plans de formación permanente nos centros, mellorar a competencia lingüística en linguas estranxeiras, potenciar os itinerarios formativos TIC, promover a atención á diversidade, mellorar a convivencia escolar, favorecer iniciativas formativas no ámbito STEM como nova liña de traballo, establecer accións de formación específica nas funcións directivas, incrementar a oferta en rede e potenciar os procesos de innovación educativa. 

Máis de 12 actividades diarias

Durante a súa intervención, o titular do departamento educativo da Xunta de Galicia aproveitou para facer un balance do último curso, así como dos logros acadados durante os últimos anos. Deste xeito, no 2015/2016 organizáronse 2.224 actividades formativas, un 6,5% máis que o ano anterior, o que supón máis de 12 actividades diarias por día lectivo. No 60% dos casos, as accións desenvolvéronse no entorno dos propios centros. Ao abeiro destas accións formáronse máis de 19.200 docentes, o que supón o 60% do profesorado galego. O número de horas superou as 57.000 e outorgáronse máis de 39.000 certificados de formación.

Román Rodríguez subliñou que ao longo destes últimos catro anos se avanzou significativamente na formación permanente do profesorado. En concreto, leváronse a cabo un total de 8.148 actividades formativas, un 17% máis que no período anterior; ofertáronse 215.000 horas, un 6% máis; e outorgáronse preto de 143.000 certificados de formación, fronte aos 120.000 anteriores. Ademais, a valoración das actividades foi superior, pasando do 4,06 ao 4,15 de media sobre cinco puntos.

Maior autonomía dos centros

A maiores, tamén cómpre destacar a aposta dos centros educativos por desenvolver o seu propio plan de formación, establecendo así accións concretas vinculadas ás necesidades dos seus proxectos educativos. Deste xeito, e mentres que no curso 2012/2013 só había 68 centros con plans específicos, hoxe xa son 297 os que o teñen, un número que se incrementará o vindeiro ano académico, posto que para o curso 2016/2017 xa se recibiron un total de 427 solicitudes. Isto amosa, en palabras de Román Rodríguez, “a forte implicación do profesorado na súa actualización continua”.